Read Kalanga Ezekiele 24 Bible Online

Ezekiele 24 - Kalanga bible

Ezekiele 24

¹Mu gole le buzhanalume, mu mwedzi we bugumi, mu zhuba le bugumi le mwedzi we bugumi, dama la Yahwe lakazha kundili liti,

²“Nkololo we nthu, kwala nasi kuti mwedzi nngana nasi zhuba lino nge kuti mambo we Bhabhiloni wakomba Jerusalema nge ngwa.

³Leba ngopesa ku bapanduki ibaba uti, ‘She Yahwe banolebeleka bakati, “ ‘Biga hali pa moto, uibige pa moto udile vula muili.

⁴Ulonge muili thango dze nyama, thango dzose dzakanaka, tjidzwa ne bhandabuko, uizhadze nge mafupa akanaka.

⁵Ushalule inodzipinda dzose mu ngubi ulobele hwuni kusi kwe hali, ukapaidze thango dze nyama dzimu ili ubhike kose ne mafupa muili.

⁶“ ‘Ndizo wali Yahwe banolebeleka bakati, “ ‘Yee mme wee iwe nzi nkulu unotebula malopa hali ina bulala muili, isakatongo sukiwa bulala. Dusa nyama muili thango ne thango usingashalule.

⁷Nge kuti malopa aakatebula amuili wakaitebulila pezhugwi kwe shongwe, aazoitebulila pasi kuti aivukidze nge mavu.

⁸Ku musa bushongola gwangu, kuti ndibgwilizile, ndakadila malopa aakatebula pezhugwi kwe shongwe kuti asivukidziwe.

⁹“ ‘Ndizo wali tjinoleba She Yahwe ndi etji, “ ‘Yee mme wee wapalala iwe nzi nkulu uzhele malopa. Imi namibo ndowothama swinga gulu le hwuni.

¹⁰Ndizo tathikanya hwuni njinji, ubhatidze moto Bhika nyama zubuyanana, uyishanganye ne zwinoizipisa mafupa apisiwe.

¹¹Uyigadze pa masimbe isina tjimukati, kuita kuti ipise, khopa yayo ipenye, shambgwa yayo inyawuke, bulala gutshwe gupele.

¹²Ndakazwinyadzila suli, bulala gwayo bukodu agutopedziwa nge moto.

¹³Shambgwa iyo bupombgwe gugo, ndakati ndokutjenapadza ndikudusa mu bupombgwe gugo koga auzotjenapala mu shambgwa iyo, aungatongo tjenapala kakale kuswikila bushongola gwangu gwagutshika mukuli.

¹⁴“ ‘Imi Yahwe ndalebeleka. Tjibaka tjabe itjo tjekuti nditole thambo. Anditowononoka, anditowohwila zogwadza kene kuli kuzwidziba. Unowosumikilisiwa kuyendidzana ne mazwiibhato awo nenge mishingo iyo. Koleba She Yahwe.’ ”

¹⁵Dama la Yahwe likazha kundili liti,

¹⁶“Nkololo we nthu, bona nge hwada ing'ompela ndowodusa mukuli tje moyo uwo. Koga usitongo lila kene kuli kutebula mishodzi.

¹⁷Ususuthike nge kunyalala, usitongo lilila nfi. Mbala tjiala tjitjo mu nsholo ne shangu dzidzo mu makumbo, usitongo zwimba buso gugo ne zojiwa zwe balili usitongo zwija.”

¹⁸Ndizo ndakalebeleka ne bathu mangwanana ngono madekwana nkadzi wangu kafa. Tjimuka mangwanana ashinga sekwa ndakadwiwa.

¹⁹Ipapo bathu bakandibhuzwa bakati, “Apa aungatibudze kuti zwithu izwezwi zodwani ku tili kene?”

²⁰Ndizo abadwa ati, “Dama la Yahwe lazha kundili likati,

²¹Idwa bathu be Iziraela uti, ‘Tjinolebgwa ndi She Yahwe etji, Bona ndipejo nge kulengudza bugalo gwangu gwakayengemala, mbako yakasima yamunozwikudza ndiyo, shathiso ye moyo yenyu, tje ludo gwenyu. Bakololo ne bakololokadzi bamakasiya banowonofa nge thumo.

²²Ngono mowothama sekwa ndathama. Amutowozwimba njiso dzenyu kene kuli kuja zojiwa zwe balili.

²³Mowombala zwiala zwenyu mu misholo yenyu ne shangu dzenyu mu makumbo enyu. Amutowolila koga mowokorotela ngekwe zwibi zwenyu, mowosusuthika pakati kwenyu.

²⁴Ndizo Ezekiele unowobe tjilakidzo kumuli, imwi mowothama sekwa athama. Ikoku kowoti kushingikala mowoziba kuti ndimi She Yahwe.’

²⁵“Ngono iwe nkololo we nthu, mu zhuba ilelo landinowobatolela ng'umba yabo yakasima, nditola kushatha kwabo ne gudzo labo, shathiso yabo ne tje moyo yabo ne bakololo babo ne bakololokadzi babo naibobo,

²⁶mu zhuba ilelo, wasiya unozha kuwomubikila tjashingikala.

²⁷Mu zhuba ilelo nlomo wenyu unowozhuka ngono mukalebeleka naye ngono mukasinyalale. Ndizo unowobe tjilakidzo ku bali, ngono banowoziba kuti ndimi Yahwe.”