Read Kalanga Ezekiele 25 Bible Online

Ezekiele 25 - Kalanga bible

Ezekiele 25

¹Dama la Yahwe likazha kundili liti,

²“Nkololo we nthu, lingisana ne Baamoni ulebesembeli ngekwabo.

³Ubadwe uti, ‘Ihwani dama la She Yahwe. Tjinolebgwa ndi She Yahwe etji, Nge kuti makati, “Ahaa!” ngekwe bugalo gwangu pagwakabe gwatemapala ne shango ye Iziraela payakabe yathukudziwa nenge ku bathu be Juda pabakabe batapiwa,

⁴ndizowali ndowomulonga mu maboko e bathu be ku bhezuba kuti bamukunde. Banowobaka pakati kwenyu bebaka mishasha yabo pakati kwenyu, banowoja mitjelo yenyu bakang'wa nkaka wenyu.

⁵Ndowothama Rabha mafulilo e kamela, Amoni ndowoithama danga le zwithuwo. Ipapo mowoziba kuti ndimi Yahwe.

⁶She Yahwe bakati, Nge kuti makaloba phande mukazanazana nge kushatha kubiibi mu moyo yenyu ngekwe shango ye Iziraela,

⁷ngekwako bonani ndowotambunudza luboko gwangu amukoba nge njudzi se thundu yatapiwa. Ndowomubulaya mu njudzi amulobesa mu shango. Ndowomulobesa. Ngono ipapo mowoziba kuti ndimi Yahwe.’ ”

⁸“She Yahwe bakati, ‘Se Moabu ne Seiri dzakati bonani, Juda inonga njudzi dzose koga,

⁹ndizo wali ndowozhula Moabu mu hwunde nditangisa nge mizi yawo yakamilidzika, Bhetijeshimoti ne Bhaalemeyoni ne Kiriyathayimu gudzo le shango.

¹⁰Ndowolonga Moabu kang'ompela ne Baamoni mu maboko e njudzi dze ku bhezhuba nge zila inowothama kuti Baamoni basitjakumbugwe kakale pakati kwe njudzi,

¹¹ngono ndowolidza shamu mu Moabu. Ipapo banowoziba kuti ndimi Yahwe.’ ”

¹²“She Yahwe bakati, ‘Se Edomu yakabgwilizila bathu be Juda, ngono bakabe nlandu nge kuthama saikoko,

¹³nge kwaikoko She Yahwe bakati, “Ndowotambunudza luboko gwangu kubhayana ne Edomu ndibulaya bathu bayo ne phuka dzabo. Ndowoithukudza, kudwa mu Temani kunoti ku Dedani banowobulawa nge thumo.

¹⁴Ndowobgwilizila Edomu nge luboko gwe bathu bangu Baiziraela, banoshingila Edomu kuyendidzana nge kugwadzamoyo kwangu ne bushongola gwangu, banowoziba kubgwilizila kwangu, koleba She Yahwe.” ’ ”

¹⁵“She Yahwe bakati, ‘Se Bafilisitiya bakabgwilizila nge meya yakabipa beshingisa lubengano gwa ntolo kukolomodza Juda,

¹⁶ndizo wali She Yahwe bakati, “Ndowotambunudza luboko gwangu kubhayana ne Bafilisitiya ngono ndowobulaya Bakereti alobesa basala mu tjekelo dze gungwa.

¹⁷Ndowobabgwilizila kunolema ndibaloba nge shamu izhele kugwadzamoyo. Ipapo banowoziba kuti ndimi Yahwe ha ndibabgwilizila.” ’ ”