Read Kalanga Ezekiele 27 Bible Online

Ezekiele 27 - Kalanga bible

Ezekiele 27

¹Dama la Yahwe likazha kundili liti,

²“Nkololo we nthu, lilila Tire

³ngono uti ku Tire, nzi nkulu wakabakwa mu hwunde ye gungwa, nzi una matengeselo anoshingisiwa nge shango dzimu tjekelo dze gungwa. She Yahwe bakati, “ ‘Iwe Tire ukati, “Ndakanaka kwaka pelela.”

⁴Migathu iyo ipakati kwe makungwa, babaki babo bakakunakisa kwakapelela.

⁵Mapulanka awo wose bakaathama nge miti ye misipuri inodwa ku Seniri bakatola sida kudwa ku Lebanoni bethama bhangwana le matyila e ikepe.

⁶Nge mioko inodwa ku Bhashani bakathama migoti inoyendisa ikepe mukati kwe ikepe pasi bakawala mapulanka e sipuri inodwa ku Sipurasi pakawaligwa nge nyanga dze zhowu.

⁷Jila lakanaka lakanakisiwa linodwa ku Egipiti ndilo lawakashingisa kuyendisa ikepe kakale lili tjilakidzo tjitjo, masaile awo anodwa mu tjekelo dze Elisha akanyembiwa nge mbala we gova ushangana ne nshaba.

⁸Balume be Sidoni nebe Arivadi bakabe bali bayendisi be zwikepe zwizo, nyambi dze balume mukuli Tire ndidzo dzakabe dzili batungamili mu gungwa.

⁹Bazibi be mishingo ye maboko be Gebali bakabe banawe be namatidzanya mapulanka. Zwikepe zose mu gungwa ne bayendisi bazo bakabe bezha bewotenga thundu iyo.

¹⁰Balume be Pheshiya nebe Ludi nebe Puti bakabe bali babhayani mu ngwa iyo. Banopayika zwivikisi ne hwutshe dzabo mukuli be kunakisa.

¹¹Balume be Arivadi nebe Helekhi bakalinda makuma awo kuapoteleka Bagammadi bakabe bali mu thungamakole iyo. Bakapayika zwivikisi zwabo kupoteleka makuma awo bakakunakisa nge buzhalo.

¹²“ ‘Tashishi yakaseenyelana nawe nge kuti una fumwa hwulu, bakatenganya thundu iyo nge siliva ne dale ne thini ne ntodo.

¹³Javani ne Tubali ne Mesheki bakatengeselana nawe, bakatenganya thundu iyo nge balanda ne zwithu zwakathamiwa nge phangula.

¹⁴Bathu be Togama yakatenganya mbizi ne mbizi dze ngwa ne mowulo nge thundu iyo.

¹⁵Bathu be Dedani[2] banotengeselana nawe, shango njinji dze tjekelo ye gungwa dzakabe dzili matengeselo awo, dzakabe dzikulipa nge nyanga dze zhowu ne mapulanka akasima.

¹⁶Aramu yakabe itengeselana nawe ngobe thundu yawakabe uthama yakabe ili njinji, bakatenganya thundu iyo nge tjibilo ne matyila e mbala we gova ushangana ne bushaba ne jila lakanakisiwa ne mabgwe e khorali ne e agati.

¹⁷Juda ne shango ye Iziraela bakatengeselana nawe, thundu iyo bakaitenganya nge koroni idwa ku Miniti ne lukwezha ne butji gwe nyutji ne mafuta ne nyonje.

¹⁸Damasiko yakatengeselana nawe ngoti wakabe una thundu njinji dzaunothama nenge bunji gwe fumwa iyo ngo siyana kwayo, bakatengeselana nawe nkumbi we zhambi unodwa ku Helibhoni ne wulu tjena.

¹⁹Vedani ne Javani kudwa ku Uzali bakatengeselana nawe, bakatenganya thundu iyo nge matale ne miti inoyi kasiya ne unoyi kalamusi ne pkhwe.

²⁰Dedani wakatengeselana nawe ngubgwana dze sale.

²¹Arabiya ne makombgwa e Kedari banotengeselana nawe pkhwizana ne nyundo ne mbudzi. Bakatengeselana namwi nge zwithu izwezwi.

²²Batengesi be Rama ne Sheba bakatengeselana nawe, bakatenganya thundu iyo nge zwipayisi ne mabgwe mabuya ne golide.

²³Harani ne Kanne ne Edeni ne batengesi be Sheba ne Ashuri ne Khilimadi bakatengeselana nawe.

²⁴Ibaba bakatengeselana nawe zwiambalo zwibuya ne matyila mabuya e mbala we gova ne akanakisiwa ne ngubo dze mibalabala dzina misungwana yakakoshiwa ne yakalukwa.

²⁵Zwikepe zwe Tashishi ndizo zwakabe zwikusengela thundu iyo. “ ‘Ndizo wali wakabe wakatuta kunolema pakati kwe makungwa.

²⁶Bayendisi be zwikepe babo bakakuzhisa mu makungwa makulu. Koga phepo ye ku bhezhuba yakapkhwanya zwikepe zwizo pakati kwe makungwa.

²⁷Fumwa iyo ne thundu ne zwaunotengesa bayendisi ne batjengeti be zwikepe balulwamisi ne baseenyi be thundu, ne babhayani babo bose banawe ne goko lose linawe lowila mukatikati kwe makungwa mu zhuba le kukolomogwa kuko.

²⁸Tjililo tje bayendisi be zwikepe tjozunguza shango dzimu tjekelo dze gungwa.

²⁹Bose banobhata migoti inoyendisa zwikepe banowosiya zwikepe, bashingi bose ne bayendisi mu gungwa banowoma mu phili.

³⁰Banowomilidza mahwi bakakulilila kunogwadza, Banowodila mavu mu misholo yabo, bakabumbuluka mu zwizhalanlota.

³¹Banowotesela misholo yabo nge kuko ngono bakaambala jila le saka. Banowokulilila tjililo tjinogwadza nge shungu hwulu nge guwo lakabangalala.

³²Banowoti bekulilila bekuwa bakamba lumbo gwe tjililo nge kuko beti, “Ndiani wakatongo lobesiwa se Tire pakati kwe makungwa kene?”

³³Kwakabe kuti thundu iyo ibhuda mu makungwa ukagutsha njudzi, thundu iyo ne fumwa iyo wakafumisa bomambo be shango ndiyo.

³⁴Ngwenu wabharegwa mu makungwa, mukatikati kwe vula, thundu iyo ne bayendisi be zwikepe bawila bose nawe.

³⁵Babaki bose be tjekelo dze gungwa bakukaabalila. Bomambo badzo banotetema ngotja njiso dzabo dzakatundubala nge kutja.

³⁶Batengesi bapakati kwe njudzi banodzipikana nge kuko, bhelelo lilo lakabipa, autowobe ukatjabepo kakale.’ ”