Read Kalanga Ezekiele 29 Bible Online

Ezekiele 29 - Kalanga bible

Ezekiele 29

¹Mu gole le bugumi, mu mwedzi we bugumi, mu zhuba le bugumi lina kubili, dama la Yahwe lakazha kundili liti,

²“Nkololo we nthu, lingisana na Faro mambo we Egipiti ulebesembeli nge kukwe nenge kwe Egipiti yose.

³Lebeleka naye uti, ‘She Yahwe bakati, “ ‘Bona ndobhayana nawe, iwe Faro mambo we Egipiti. Iwe bhophona gulu lakabutha pakati kwe hwobana dzidzo, Iwe unoti, “Gwizi gwe Naili nge gwangu, ndakaguzwithamila.”

⁴Ndowolonga zwihweko mu shaya dzidzo, ndibe ndithama kuti hwobe dze hwobana dzidzo dzinamatile makwapa awo. Ndowokukwebela kuzhe kwe hwobana dzidzo, ne hwobe dzose dze hwobana dzidzo dzakanamatila makwapa awo.

⁵Ndowokulashila mu tjilambanyika, iwe ne hwobe dzose dze hwobana dzidzo. Unowowila mu lenje ngono awutowotogwa ukabiganyiwa. Ndakupa zwibandana zwe shango ne nyuni dze shango kube zojiwa zwadzo.

⁶Ipapo bose bagali be Egipiti banowoziba kuti ndimi Yahwe ngoti iwe wabe uli ludozo gwe lushanga ku bathu be Iziraela.

⁷Ha bekubhata nge luboko, unovunika, ube upalula mathudzi abo, ne bekunayila unovunika ngono ube ututhula thunji dzabo.

⁸“ ‘Ndizo wali She Yahwe bakati, Bona ndowozhisa thumo kubhayana nawe ngono lowobulaya bathu babo ne phuka dzidzo.

⁹Shango ye Egipiti inowobe dukuthuku ikabe shakadzwa. Ndipo pabanowoziba kuti ndimi Yahwe. Se wakati, “Gwizi gwe Naili nge gwangu, ndimi ndakaguthama,”

¹⁰ndizo wali ndobhayana nawe ne hwobana dzidzo ngono ndowothama Egipiti shakadzwa ne dukuthuku kudwa ku Migidolo ne Siyene kuyenda bukule gunonoti ku Itopiya.

¹¹Akuna nthu unowopinda ne muili kene ili phuka, akuna unowogala ikoko kwe makole ali makumi manna.

¹²Ndowothama Egipiti ikabe dukuthuku pakati kwe shango dzakathukudzika ne mizi yawo mikulu inowothukudzika kwe makole ali makumi manna pakati kwe mizi yakathukudzika. Ngono ndowopaladzila Baegipiti mu njudzi abatatabadza nge shango.

¹³“ ‘Nenguba kwakajalo She Yahwe bakati, Kubupelo gwe makole ali makumi ali manna ndowokubunganya Baegipiti kudwa mu njudzi dzabakabe bapalalila mu dzili.

¹⁴Ndowobabuza kudwa mu butapiwa ababgwiliza ku shango ye Patirosi, shango yabakapaluka muili ngono ikoko banowobe bumambo gu pasi.

¹⁵Gowobe bumambo gu pasi tjose kwe bumambo, agutowo tjabe gungakula gukazwikudza gukabe pezhugwi kwe njudzi. Ndoguthama kuti gusitjasime, gusitjabe gungabusa zwitjaba kakale.

¹⁶Egipiti ayitowofa yagagwabgwe nge bathu be Iziraela, koga inowobe ikumbuludzo tje tjibi tjabo ha bekumbula kuwana bhatsho mubali. Ndiko banowoziba kuti ndimi She Yahwe.’ ”

¹⁷Mu gole le bumakumi ali mabili ana ali kutendeka, mu mwedzi we kutanga mu zhuba le kutanga, dama la Yahwe lakazha kundili liti,

¹⁸“Nkololo we nthu, Nebukadineza mambo we Bhabhiloni wakasimisa ngwa iye kagwa ne Tire kwakabangalala, nsholo mmwe ne mmwe ukasubuka ukasala una bhalo ne thudzi limwe ne limwe likasusubuka, koga iye mambo ne ngwa iye bakasiwane mbhayilo mu kugwa ikoku kwabo ne Tire.

¹⁹Ndizo wali She Yahwe bakati, Ndowolonga Egipiti mu maboko a Nebukadineza mambo we Bhabhiloni, ngono unowotola fumwa yayo kayenda nayo. Unowokubulula katapila shango uli iwo mbhayilo we ngwa iye.

²⁰Ndampa Egipiti se mbuyilo ye matatabuko awe ngoti iye ne ngwa iye bakakushingila imi, kojalo She Yahwe.

²¹“Mu zhuba ilelo ndowopa simba bathu be Iziraela, ngono imi ndowozhula nlomo uwo pakati kwabo. Ipapo banowoziba kuti ndimi Yahwe.”