Read Kalanga Ezekiele 3 Bible Online

Ezekiele 3 - Kalanga bible

Ezekiele 3

¹Ngono bakandidwa bakati, “Nkololo we nthu, ija tjaunobona, ija lukwalo igogu ube uyenda unolebeleka ne itjaba tje Iziraela.”

²Ndizo aashama ngono bakandipa lukwalo kuguja.

³Ipapo bakati kundili, “Nkololo we nthu, ija lukwalo igogu gwandinokupa uzhadze ntumbu uwo ndigo.” Ndizo aguja ngono mu nlomo wangu guzipa se butji gwe nyutji.

⁴Ipapo bakabe beti kundili, “Nkololo we nthu, tjiyenda ngwenu ku itjaba tje Iziraela uswike ulebe matama angu ku bali.

⁵Ngobe anditokutuma ku bathu be ndebeleko isingazibgwe ne lulimi gwakasima, koga ndokutuma ku itjaba tje Iziraela.

⁶Anditokutuma ku bathu banjinji be ndebeleko isingazibgwe ne lulimi gwakasima, bana matama ausingake ukahwa. Nge malebeswa ha ndabe ndakutuma kuna bakajalo, ibo babe bangakuhwilila.

⁷Koga itjaba tje Iziraela atjingakuhwilile, ngoti atjitoda kundihwilila se tjili itjaba tje misholo inopanda ne tjina bukomba.

⁸Bona, ndowosunganya buso gugo sekwa bakasunganya njiso dzabo, ndowothama kuti usime moyo bo sekwa bakasima moyo.

⁹Phazha iyo ndathama kuti isime se bgwe lakasima kupinda hwulungwana, usibatje kene ukapaluka moyo nge kwabo nenguba bali itjaba tje bapanduki.”

¹⁰Kakale bakandidwa bakati, “Nkololo we nthu, matama wose andinokudwa ualonge mu moyo uhwe nge zebe dzidzo.

¹¹Ndizo yenda ku bathu bakanyi kwenyu ba mu kutapiwa ulebeleke nabo. Ubadwe uti, ‘Koleba She Yahwe,’ kusingati tjimwe kene banohwilila kene abatohwilila.”

¹²Ipapo meya ikandimilidzila pezhugwi, ngono ahwa hwi gulu shule kwangu liti, “Gudzo la Yahwe ngalikudziwe mu bugalo gwabo.”

¹³Ngono ahwa nsindo we mapapilo e zwibumbiwa zwinotjila ekuthana ahwa ne nsindo we makumbgwana amu hwunde yazo, nsindo unodidima nge simba.

¹⁴Meya ikandimilidza ikandisenga ngono ayenda ndilizhele shungu ndakagwadza moyo, luboko gwa Yahwe gwakandibhata nge simba.

¹⁵Ndakanoswika ku batapiwa ku Tele Avivi ne gwizi gwe Kheba. Ngono agala pakati kwabo ndakakaabala mazhuba ali kutendeka ikoko kwabakabe begala.

¹⁶Shule kwe mazhuba ali kutendeka dama la Yahwe likazha kundili liti,

¹⁷“Nkololo we nthu, ndakuthama ntjengeti we itjaba tje Iziraela, ndizo wali ihwa dama landinoleba nge nlomo ubatjenjedze nge tjinodwa ku ndili.

¹⁸Ha ndingadwa nthu mbiimbi ati, ‘Nge malebeswa unowofa.’ Iwe ube usingantjenjedze, kene usingalebe wakasima kubhatsha mbiimbi kuthubukana ne bubi gugwe kuti atjile, mbiimbi iwoyu unowofila zwibi zwizwe, koga malopa awe ndowoashaka mu kuli.

¹⁹Koga ha ungatjenjedza nthu mbiimbi koga ebe asingathubukane ne bubi gugwe kene zila dzidze dzakabipa, unowofila jinyo lile, koga iwe unowobe wazwitjidza.

²⁰“Kakale ha nthu wakalulwama eshanduka mu kululwama kukwe ebe etjinya ndibe ndibiga ikuthi mbeli kukwe, unowofa. Se usakankumbuludza, unowofa efila mu zwibi zwizwe. Zwakalulwama zwaakashinga azwitowokumbugwa, koga lopa lile ndowolishaka mukuli.

²¹Koga ha ungatjenjedza nthu wakalulwama kuti asitjinye ebe asingatjinye unowotjila ngoti waamutjila butjenjedu, ngono iwe wazwitjidza.”

²²Luboko gwa Yahwe gwakabe gwakandibhata ikoko, ngono bakandidwa bakati, “Milika uyende ku lubala ngono ndowolebeleka nawe ikweno.”

²³Ndizo amilika ayenda ku lubala. Bonani, tjedza tja Yahwe tjakabe tjilimile ipapo tjinga tjedza tjandakabona pa gwizi gwe Kheba, ngono awila pasi nge buso.

²⁴Ipapo Meya ikangina mu ndili ikandimilidza ama nge makumbo. Ngono Yahwe bakalebeleka nami bakati, “Yenda unozwizhalilila mu ng'umba iyo.

²⁵Ngono iwe nkololo we nthu, bona, banowokusunga nge mitjili, unowosungwa ukasiboneke uyendayenda pakati kwe bathu.

²⁶Ndowothama kuti lulimi gugo gunamatile mu bgwasha ndizo unyalale usitubule ku batjemela nenguba bali itjaba tje bapanduki.

²⁷Koga ndowoti ndilebeleka nawe ndowozhula nlomo uwo ngono unowobadwa ukati, ‘She Yahwe bakati.’ ” “Iye unowohwa ngaahwe, naiye unowolamba kuhwilila ngaalambe, ngoti ba itjaba tje bupanduki.”