Read Kalanga Ezekiele 30 Bible Online

Ezekiele 30 - Kalanga bible

Ezekiele 30

¹Dama la Yahwe likazha kundili liti,

²“Nkololo we nthu, lebesambeli uti, ‘She Yahwe bakati, “ ‘Kuwa uti, “Yee mme wee! Ngekwe zhuba ilelo!”

³Ngoti zhuba labe pejo, zhuba la Yahwe labe pejo, i zhuba linowobe ne makole, tjowobe tjili tjibaka tje njudzi.

⁴Thumo lowongina mu Egipiti, ne buyendasi gukabe po mu Itopiya ha bebulawa bewa mu Egipiti, thundu yayo itapiwa, ne thiwa dzayo dzitshindunugwa.

⁵“ ‘Itopiya ne Puti ne Ludi ne Arabiya yose ne Libhiya ne bathu be shango ina tjidumano nayo banowobulawa nge thumo kang'ompela ne Egipiti.

⁶“ ‘Yahwe bakati, Bana nshanganyila ne Egipiti banowowa, simba lainozwida ndilo lowokong'wa. Kudwa ku Migidolo kunoti ku Siyene banowowa nge thumo mukati kwayo. Koleba She Yahwe.

⁷Dzowothukudziwa pakati kwe shango dzimwe dzakathukudziwa, mizi yabo inowobe pakati kwe mizi yabe matongo.

⁸Ipapo banowoziba kuti ndimi Yahwe pandinowobe ndapisa Egipiti naibo bose banoibhatsha bakolomoka.

⁹“ ‘Mu zhuba ilelo thumwa dzowodwa kundili dzili mu zwikepe kulobesa hana Itopiya batjakazwikangang'wa. Buyendasi gowoiwila mu zhuba le mbatsha dze Egipiti nge kuti bonani yeno lozha.

¹⁰“ ‘She Yahwe bakati, Ndowopedzisa goko le Egipiti nge luboko gwa Mambo Nebukadineza we Bhabhiloni.

¹¹Iye ana ngwa iye, ludzi gwakabangalala mu njudzi unowozhisigwa ku kolomola shango. Banowobhayana ne Egipiti ngono banowozhadza shango nge babulawa.

¹²Ndowowomesa njizi ndibe nditengesa shango ku bashingi be mbipo. Ndowothukudza shango ne tjimwe ne tjimwe tjimu ili ndishingisa bataya. Imi Yahwe ndaleba.

¹³“ ‘She Yahwe bakati, Ndowokolomodza midzimu ye zwifano apedza nge zwifano mu Memifisi. Akutjawobe ne gombgwa mu shango ye Egipiti, ndizo ndowozhisa kutja mu Egipiti.

¹⁴Ndowothukudza Patirosi apisa Zoani ndibe ndiloba Thebesi.

¹⁵Ndowolakidza kugwadzamoyo kwangu mu Pelusiumu mbako dze matizhilo dzakasima dze Egipiti ndibe ndilobesa makoko e Thebesi.

¹⁶Ndowolonga moto mu Egipiti Sini ikabe mu zogwadza zwikulu. Thebesi inoligwa makuma ngono Memifisi inowogwisana ne zwita masikati.

¹⁷Bazhuzha be Oni nebe Pibeseti banoligwa nge thumo, mizi mikulu nge kwayo inowotapiwa.

¹⁸Kowobe zhalima ku Tahefanesi ha ndipedza simba le Egipiti, simba lainozwikudza ndilo lowobe lapela. Nzi nkulu unowotshibikigwa nge gole bakololokadzi bayo banotapiwa.

¹⁹Ndiyo zila yandinoloba Egipiti ndiyo. Ndizo banowoziba kuti ndimi Yahwe.’ ”

²⁰Mu gole le bugumi lina ling'ompela, mu mwedzi we kutanga, mu zhuba le butendeka le mwedzi dama la Yahwe lakazha kundili liti,

²¹“Nkololo we nthu, ndavuna luboko gwa Faro mambo we Egipiti, ngono bona, aguzosungwa kene kutaligwa kuti gupole kwagungabe ne simba kubhata thumo.

²²Ndizo Yahwe bakati, Bonani, ndobhayana na Faro mambo we Egipiti ngono ndowovuna maboko awe, igogu gwakasima kose naigoguje gwakavunika athama kuti thumo liwe mu luboko gugwe.

²³Ndowopaladza Baegipiti nge njudzi ngono abaandamisa nge shango.

²⁴Ndowosimisa maboko a mambo we Bhabhiloni ngono ndibe ndilonga thumo langu mu luboko gugwe koga ndowovuna maboko a Faro ngono unowogomela panli nge kugomela kwe wakubadziwa kwaangafa.

²⁵Ndowosimisa maboko a mambo we Bhabhiloni koga maboko a Faro anowolembeleka. Banowoziba kuti ndimi Yahwe ha ndilonga thumo langu mu luboko gwa mambo we Bhabhiloni. Ngono unowogutambunudza kubhayana ne shango ye Egipiti.

²⁶Ndowopaladza Baegipiti nge njudzi abaandamisa nge shango dzakasiyana. Banowoziba kuti ndimi Yahwe.”