Read Kalanga Ezekiele 31 Bible Online

Ezekiele 31 - Kalanga bible

Ezekiele 31

¹Mu gole le bugumi lina ling'ompela, mu mwedzi we butatu, mu zhuba le kutanga le mwedzi dama la Yahwe lakazha kundili liti,

²“Nkololo we nthu, idwa Faro mambo we Egipiti ne makoko awe uti, “ ‘Ndiani kene ungafanidzanyiwa nawe nge bukulu?

³Bona, kumbula Asiriya nsida we Lebanoni una thabi dzakanaka uli ntutshi we ishaka nlefu kuyenda pezhugwi, theswi dzawo dziswika ku makole.

⁴Vula dzakathama kuti ukombole, misenya ipasi ikathama kuti ukule ithama kuti hwobana dziunge kupoteleka pawakadzwagwa dziungisila vula ku miti yose ye ishaka.

⁵Ndizo ukakulila pezhugwi kupinda mimwe miti mu ishaka thabi dzawo dzikakula dzikabe hwodu, thabi dzawo dzikabe ndefu dziikhwa nge vula njinji.

⁶Nyuni dzose dze phepo, dzakabaka mashaka adzo mu thabi dzawo, phuka dzose dze shango dzikazwalila kusi kwe thabi dzawo njudzi njinji dzikagala mu ntutshi wawo.

⁷Wakabe wakanaka mu bukulu gwawo ne mu bulefu gwe thabi dzawo ngoti midzi yawo yakabe yakanginila pasi ku vula njinji.

⁸Misida mu nnda we Ndzimu yakabe isingaupinde kene misipuri yakabe isingake ikalizana ne thabi dzawo mipopula yakabe isingange tjimwe aifanidzanyiwa ne thabi dzawo Akuna nti mu nnda we Ndzimu wakabe unga iwo nge bubuya.

⁹Ndakauthama mbuya nge thabi dzawo njinji, yemula dze miti yose imu Edeni yakabe ili mu nnda we Ndzimu.

¹⁰“ ‘Ndizo Yahwe bakati, Se uli nlefu uswika ku makole, kakale nge kuti unozwida nge bulefu gwawo,

¹¹ndakaulonga mu maboko e nlauli we njudzi, ngono wakaubhata nge zila yakalingisana ne bubi gwawo. Ndakaulashila kutjena.

¹²Bataya banodwa mu njudzi dzakabangalala bakautema bakauliga bakausiya. Thabi dzawo dzakawila pezhugwi kwe matombo ne mu mikuku yose, thabi dzawo dzikavunikila mu hwobana dzose dze shango. Njudzi dzose dze shango dzakabhuda mu ntutshi wawo dzikayenda dzikausiya.

¹³Nyuni dzose dze phepo dzikagala muuli wakawa phuka dzose dze shango, dzikagala pakati kwe thabi dzawo dzakawa.

¹⁴Ngwenu akutjina miti kene ina vula itjawokula ikazwida nge bulefu gwayo, ayingatjakule kupinda mimwe. Akuna mimwe miti kene yakamela mu vula njinji ingatjakula ikaswika bulefu gungapa. Yose yakalingisana nge lufu pasi mu shango kang'ompela ne bathu banofa, naibabo banongina pasi mu gomba.

¹⁵“ ‘She Yahwe bakati, Mu zhuba lawakalongwa mu ikumbu, ndakavukidza misenya yakangina ndi ulilila, ndakadziba hwobana dzawo ngono vula dzawo njinji dzikamisiwa. Ngono nge kwawo ndakafukidza Lebanoni tjililo, ngono miti yose ye ishaka ikatimbama.

¹⁶Ndakathama kuti njudzi dzitetemiswe nge nsindo we kuwa kwawo pandakauisa mu ikumbu naibabo banongina pasi mu gomba. Ipapo miti yose ye Edeni, miti mibuya yakashalugwa ye Lebanoni, miti yose yakabe ina vula yakailizana ikanyaladzika mu shango pasi.

¹⁷Ibabo bakabe begala mu ntutshi wawo, bashanganyili nawo pakati kwe njudzi bakanginabo nawo mu ikumbu, beshangana ne bakabulawa nge thumo.

¹⁸“ ‘Ndiupi we miti ye Edeni ungafanidzanyiwa nawe kene mu bubuya ne bukulu gwe mamo? Ngono koga nawebo unowoyisiwa pasi ne miti ye Edeni ku shango pasi pasi. Unowolala pakati kwe basakathumba naibabo bakabulawa nge thumo. Uwoyu ndi Faro ne makoko awe wose, kojalo She Yahwe.’ ”