Read Kalanga Ezekiele 32 Bible Online

Ezekiele 32 - Kalanga bible

Ezekiele 32

¹Mu gole le bugumi lina makole mabili, mu mwedzi we bugumi lina mimwedzi mibili, mu zhuba le kutanga le mwedzi dama la Yahwe lakazha ku ndili liti,

²“Nkololo we nthu, lilila Faro mambo we Egipiti uti kunli, “ ‘Unozwitola se shumba pakati kwe njudzi koga iwe unonga bhukanana mu makungwa, unodzonga hwobana dzidzo, unodzonga vula nge makumbo awo, hwobana dzidzo unodzithama madzongwe.

³“ ‘Ndizo Yahwe bakati, “ ‘Nge mbunga we bathu banjinji ndowokutandila nge gwanga gwangu ngono banowokukweba nge gwanga gwangu.

⁴Ndowokuposela mu shango akuposela pa lenje. Ngono ndowoletja nyuni dzose dze phepo dzigala pezhugwi kuko ne phuka dzose dze shango yose dzikuje dzigute.

⁵Ndowopaladzila nyama ye mbili uwo pezhugwi kwe matombo ngono azhadza mikuku nge itumbu tjitjo.

⁶Ndowonyolodza shango nge malopa awo anowunga kunoti ku matombo ne munowunga vula kowozhala iwe.

⁷Ndowoti ndikudzima, ndowozwimba mazhuzhugwi atundubadza nyenyedzi, ndowozwimba zhuba nge gole, mwedzi naiwo unowoti zwititi.

⁸Zwedza zose zwe zhuzhugwi ndowokuzwitundubadzila azwimba shango iyo nge zhalima, kojalo Yahwe.

⁹“ ‘Ndowodziyidza moyo ye bathu banjinji pandinowozhisa kulobesiwa kuko pakati kwe njudzi mu shango dzausakatongo ziba.

¹⁰Ndowothama kuti bathu banjinji bakukaabalile bomambo babo banowotetema betja nge kuko andizunguza thumo langu mbeli kwabo. Mu zhuba le kuwa kuko mmwe ne mmwe wabo unowotetema tjibaka tjose etja ngekwe butjilo gugwe.

¹¹“ ‘Ngoti She Yahwe bakati, “ ‘Thumo la mambo we Bhabhiloni lowobhayana nawe.

¹²Ndowothama makoko awo kuti aligwe nge mathumo e bakasima bose babo bali njudzi dzakabangalala mu njudzi. Banowopedza kuzwida kwe Egipiti ngono makoko ayo wose anowoloba.

¹³Ndowobulaya zwithuwo zwayo zose kudwa pamwe ne pamwe pana vula njinji ngono akutowobe kutjina gumbo le nthu linowobe litja idzonga kene thozo ye ng'ombe ingaidzonga.

¹⁴Ipapo ndowoyengemadza vula yabo ngono athama hwobana dzabo dzikawunga se mafuta, kojalo She Yahwe.

¹⁵Ndowoti ndithukudza shango ye Egipiti ne panowobe shango yatolegwa kose kumu ili ha nditemela pasi bose banogala muili, ipapo banowoziba kuti ndimi Yahwe.’

¹⁶“Igogu lumbo gwe tjililo, gowombiwa. Bakadzi be njudzi banowogumba. Gowombigwa Egipiti ne makoko ayo wose, kojalo She Yahwe.”

¹⁷Mu gole le bugumi lina makole mabili, mu mwedzi we kutanga, mu zhuba le bugumi lina mazhuba mashanu le mwedzi, dama la Yahwe lakazha kundili liti,

¹⁸“Nkololo we nthu lilila makoko e Egipiti ngono ubayise pasi ne Egipiti ne bakololokadzi be njudzi hwulu nge mamo, ku shango pasi pasi naibabo banongina pasi mu gomba.

¹⁹“ ‘Ndiwupi waunopinda nge bubuya kene? Ngina pasi ulale ne basakathumbigwa.’

²⁰“Banowowila pakati kwaibabo babulawa nge thumo, thumo lalulwamisiwa, ngaakwebegwe kutjena ne makoko awe.

²¹“Kudwa mu ikumbu batungamili bakasima banowolebeleka nge kwe Egipiti beti, ‘Babuya pasi ngono balele ne basakathumbigwa, balele naibabo bakabulawa nge thumo.’

²²“ ‘Asiriya iipapobo ne ngwa yayo yose, zwikumbu zwayo zwakaipoteleka, bose bakabulawa, bose bakaligwa nge thumo.

²³Zwikumbu zwabo zwimukatikati kwe gomba. Bose bakabe betjisa mu shango ye banotjila bakabulawa, bakaligwa nge thumo.

²⁴“ ‘Elamu iipapobo ne ngwa yayo yose kupoteleka ikumbu tjayo. Bose bakabulawa, bakaligwa nge thumo. Bose bakabe betjisa mu shango ye banotjila bakangina pasi basakathumbigwa mu shango i pasi pasi. Bakasengana ne shoni dzabo naibabo banongina pasi mu gomba.

²⁵Bakathamila Elamu bulalo pakati kwe bakabulawa ne makoko awe wose akapoteleka ikumbu tjitje. Bose nge basakathumbigwa, bakabulawa nge thumo. Nge kuti kutjisa kwabo kwakabe kwakula mu shango ye banotjila, banosengana ne shoni dzabo naibabo banongina pasi mu gomba, bakabigwa pakati kwe bakabulawa.

²⁶“ ‘Mesheki na Tubali baipapobo ne makoko abo wose kupoteleka zwikumbu zwabo. Bose nge basakathumba, bakabulawa nge thumo nge kuti bakazhisa kutja mu shango ye banotjila.

²⁷Apa abatelilele ne bamwe babhayani basakathumbigwa kene, bakangina mu zwikumbu zwabo ne zwibhayano zwe ngwa, ibo bakati mathumo abo bakaasazamidziwa? Shamu inobalobela zwibi zwabo imu mafupa abo, nenguba kutjisa kwe babhayani ibaba kwakati kukaandama nge shango ye banotjila.

²⁸Ndizo nawebo unowolala wakavunikana pakati kwe basakathumbigwa naibabo bakabulawa nge thumo.

²⁹“ ‘Edomu iipapobo na bomambo bayo ne makombgwa ayo wose, kusingati tjimwe kuti bakabe bakasima kungapani, bakabigwa naibabo bakabulawa nge thumo. Balele ne basakathumbigwa naibabo banongina pasi mu gomba.

³⁰“ ‘Makombgwa wose e bunandzwa ne Basidoni baipapobo, bakangina pasi kunobhatisa shoni kuna bakabulawa, balele basakathumbigwa naibabo bakabulawa nge thumo, banosengana ne shoni dzabo naibabo banongina pasi mu gomba.

³¹“ ‘Kowoti Faro ne ngwa iye yose be babona unowonyaladzika ngekwe makoko awe wose, Faro ne ngwa iye yose, bakabulawa nge thumo, kojalo She Yahwe.

³²Kana wakazhisa kutja mu shango ye banotjila, ndizo Faro ne makoko awe unowobiganyiwa pakati kwe basakathumbigwa naibabo bakabulawa nge thumo, kojalo She Yahwe.’ ”