Read Kalanga Ezekiele 34 Bible Online

Ezekiele 34 - Kalanga bible

Ezekiele 34

¹Dama la Yahwe lakazha kundili liti,

²“Nkololo we nthu, lebelambeli ngekwe balisi be Iziraela, lebelambeli uti ku bali, ‘She Yahwe bakati, Yee mme wee! Mapalala imwi balisi be Iziraela ibo banozwitjengeta tjekwabo koga. Apa balisi abazofanila kutjengeta ngubi kene?

³Moja mafuta, muambala zwakathamiwa nge wulu, mube mubhaya zwithuwo zwakakola koga musinga tjengete ngubi.

⁴Amuzosimisa dzisakasima, amuzopodza dzinogwala, amuzotalila mukasunga dzakubala, amuzodziba dzinoyendila ntome ne dzakamila amuzonodzishaka. Modzilaula nge bushongola nenge kuhwisa zogwadza.

⁵Ndizo wali dzakapalala ngoti kusina nlisi, ngono dzikati dzapalala dzikabe zojiwa zwe zwibandana zwe shango.

⁶Pkhwizi dzangu dzakapalala, dzakapalalila mu matombo wose ne mu duthu limwe ne limwe lakakula. Dzakapalala nge shango yose, koga kukasibe ne wakanodzishaka kene kudzikubunganya.

⁷“ ‘Ndizo wali imwi balisi, ihwani dama la Yahwe eli,

⁸Se nditjila, kojalo She Yahwe, se ngubi yangu isheta nlisi, se yabe thundu inotapiwa ntome ili zojiwa zwe zwibandana zwe shango nenge kuti balisi bangu abazonoshaka ngubi yangu, koga banozwitjengeta abatotjengeta ngubi yangu,

⁹ndizo imwi balisi ihwani dama la Yahwe.

¹⁰“ ‘She Yahwe bakati, Bonani ndogwa ne balisi ngono ndoshaka ngubi yangu mu bali. Ndowobadusa mu bulisi bakasitjabe balisi kuti basitjabe bangazwitjengeta tjekwabo. Ndowodusa ngubi yangu mu milomo yabo dzikasitjabe zojiwa zwabo.

¹¹“ ‘Ngoti She Yahwe bakati, imi nge kwangu ndowoshaka pkhwizi dzangu ngono adzilisa.

¹²Ndowonga nlisi ekubunganya pkhwizi dzidze dzapalala, ngono saikoko ndowoshaka pkhwizi dzangu. Ndowodzigwila mu magalo wose kwadzakapalalila mu zhuba le makole ne zhalima.

¹³Ndowodzizhisa kudwa mu njudzi adzikubunganya kudwa mu shango dzakasiyana, ngono ndowodzizhisa mu shango yabo. Ndowodzifudza mu matombo e Iziraela pa misenya ye vula ne mu magalo wose e shango agegwe.

¹⁴Ndowodzifudza mu mafulo akanaka, ngono pezhugwi kwe matombo e Iziraela kobe mafulo adzo. Ikoko dzowolala pasi mu mafulo akanaka, ikoko ndiko kwadzinowofula mu mafulo ana fulo pezhugwi kwe matombo e Iziraela.

¹⁵Imi nge kwangu ndowobe nlisi we pkhwizi dzangu, ngono ndowothama kuti dzilale pasi, kojalo She Yahwe.

¹⁶Ndowoshaka dzakamila adziba dzinoyendila ntome ngono ndowosunga dzakubala, ngono ndowosimisa dzisakasima koga dzakakola ne dzakasima ndowodzilobesa. Ndowolisa ngubi nge ndulamo.

¹⁷“ ‘Koga nge kwenyu imwi ngubi yangu, kojalo She Yahwe, Ndowosumikilisa pakati kwe pkhwizi ne pkhwizi, na pakati kwe nyundo ne phoko.

¹⁸Apa akuzomulizana kuti mufule mu mafulo akanaka kene? Apa ngono makafanila tshamba nge makumbo enyu mafulo asala kene? Mungati mung'wa vula mbuyanana mukadzonga yasala nge makombo enyu kene?

¹⁹Ngubi yangu apa yakafanila fula zwamakanyanga nge makumbo enyu, kene ibuya ing'wa vula yamakapa nge makumbo enyu kene?

²⁰“ ‘Ndizo wali She Yahwe bakati ku bali, bonani imi nge kwangu ndowosumikilisa pakati kwe pkhwizi yakakola ne yakawonda.

²¹Ngoti mosunda nge lubadu nenge thudzi, mungoriya nge nyanga dzenyu zwithuwo zwakawonda kudzina mazwipaladzila kule na kule,

²²ngono ndowotjidza ngubi yangu, ngono adzitjawotapiwa kakale, ndowosumikilisa pakati kwe pkhwizi ne imwe pkhwizi.

²³Ndowodzipa nlisi nng'ompela, nlanda wangu Dafite, unowodzifudza, unowodzifudza ngono kabe nlisi wadzo.

²⁴Ngono imi Ndzimu ndowobe Ndzimu wadzo, nlanda wangu Dafite unowobe gombgwa pakati kwadzo, kojalo imi Yahwe.

²⁵“ ‘Ndowothama tjidumano tje mbakiso nadzo, ndibe ndidusa zwibandana mu shango kuita kuti dzitjile mu tjilambanyika, dziizele mu zwishaka kusina tjinotjisa.

²⁶Ndowodzikombolela kose ne magalo akapoteleka duthu langu. Ndowonisa vula nge tjibaka tjayo, ndowonisa vula ye makombolelo.

²⁷Miti ye shango inowozwala mitjelo na pasi panowodusa zwizwalo zwapo, bathu banowoshaladuka mu shango yabo. Banowoziba kuti ndimi Yahwe pandinowovuna zwikeyi zwe jokwi labo ndibasunungula mu maboko aibabo bakabathama balanda.

²⁸Abatjowobe batjatapiwa kakale nge njudzi kene kuli kujiwa nge zwibandana zwe shango. Banowotjila bakadzikama kusina unobatjisa.

²⁹Ndowobapa shango inozibika nge zwidzwalo zwayo, ngono abatowobe batjabulawa nge bhamba mu shango kene bedadigwa nge njudzi.

³⁰Ipapo banowoziba kuti imi Yahwe Ndzimu wabo ndinabo nenge kuti ibaba bathu be Iziraela bathu bangu, kojalo She Yahwe.

³¹Imwi mu pkhwizi dzangu, pkhwizi dze mafulilo angu, mu bathu bangu, imi ndi Ndzimu wenyu, kojalo She Yahwe.’ ”