Read Kalanga Ezekiele 35 Bible Online

Ezekiele 35 - Kalanga bible

Ezekiele 35

¹Dama la Yahwe lakazha kundili liti,

²Nkololo we nthu, milidza buso gugo ulinge ku Dombo le Seiri ulebelembeli nge kwalo,

³ulidwe uti She Yahwe bakati, bona, ndobhayana nawe Dombo le Seiri, luboko gwangu ndogulingisanya nawe kukuthama dukuthuku ne shakadzwa.

⁴Ndowothama mizi iyo matongo, unowobe dukuthuku, ngono unowoziba kuti ndimi Yahwe.

⁵Iwe utjakabhata lubengano gwa ntolo, ube ubulayisa Baiziraela thumo mu nsi we kumanikana kwabo, mu tjibaka tje bhelelo le kulobgwa shamu kwabo,

⁶ndizo wali se nditjila kojalo She Yahwe, ndonomululwamisila kutebuka kwe malopa ngono lopa lowotatana namwi.

⁷Ndowothama Dombo le Seiri dukuthuku ne shakadzwa ndibe ndithubula mulili bose banozha ne banoyenda.

⁸Ndowozhadza matombo ayo nge babulawa. Matuthu enyu ne mikuku yenyu ne hwobana dze vula dzowozhala babulawa nge thumo.

⁹Ndowokuthama dukuthuku nge kusingapele ne mizi mikulu ayitowogagwa. Ipapo mowoziba kuti ndimi Yahwe.

¹⁰Ngekuti wakati, Njudzi idzedzi mbili ne shango idzedzi mbili dzowobe dzangu, towodzitola, nenguba Yahwe bakabe balipo zwabo.

¹¹Ndizo wali se nditjatjila, kojalo She Yahwe, ndowokubhata nge kunoyendidzana ne bushongola ne fupa lawakalakidza ngekwe lubengo gugo mu bali, ngono ndowothama kuti ndizibike pakati kwenyu pandinowomusumikilisa.

¹²Ipapo mowoziba kuti imi Yahwe ndakahwa ndebeleko dzenyu dzose dzamakalengudza matombo e Iziraela ndidzo muti, “Akathukudziwa, ngono takaapiwa kualobesa.”

¹³Makazwikudza pandili nge milomo yenyu mukawatsha matama enyu nge kwangu ngono ahwa.

¹⁴She Yahwe bakati, “Shango yose inowoti yakashatha, imi ndowomuthukudza.

¹⁵Se makati mukashathila thaka ye bathu be Iziraela itjinyika, namibo ndowomubhata saikoko. Iwe Dombo le Seiri, unowothukudzika, iwe ne Edomu yose. Ipapo banowoziba kuti ndimi Yahwe.”