Read Kalanga Ezekiele 37 Bible Online

Ezekiele 37 - Kalanga bible

Ezekiele 37

¹Tjiazha tja Yahwe tjakandibhata ngono tjikandidusila pazhe nge meya ya Yahwe ngono tjikandimisa pakati kwe nkuku wakabe uli zhele mafupa.

²Bakanditungamila kuyenda yenda pakati kwawo, bonani ndakabona mafupa manjinji mu nkuku ngono akawoma kwazo.

³Ngono bakandibhuzwa bakati, “Nkololo we nthu, apa mafupa iyawa angatjila kene?” Adabila nditi, “Imwi She Yahwe, ndimwi munoziba.”

⁴Ipapo bakabe beti kundili, “Lebelambeli ku mafupa iyawa uti, ‘Imwi mafupa akawoma ihwani dama la Yahwe.

⁵She Yahwe bakati ku mafupa iyawa, “Ndowofemela mu muli ngono mowotjila.

⁶Ndowolonga makanyu mu muli ngono athama kuti nyama ibe mu muli amuambadza ganda, ndowofemela mu muli ngono mowotjila, ngono mowoziba kuti ndimi Yahwe.” ’ ”

⁷Ndizo alebelambeli sekwa ndakadwiwa. Ngono ndakati nditjalebelambeli bonani kukabe ne zhoba tjinyolotjo, nsindo we kulobana kwe mafupa ebhatana, fupa libhatana ne fupa.

⁸Ndakalinga ngono abona makanyu ebepo ne nyama muali ne ganda liapetela, koga kwakabe kusina meya muali.

⁹Ngono bakabe bendidwa beti, “Lebelambeli meya ye kufema, lebelambeli nkololo we nthu, idwa meya uti, ‘She Yahwe bakati, “Buya kudwa mu mbizho nna, meya, ufemele muna ibaba bakabulawa kuti batjile.” ’ ”

¹⁰Ndizo alebelambeli sekwa bakandidwa ngono meya ye kufema ikangina mu bali ngono bakatjila bakamilika bakama ne makumbo abo bali mbunga usinshoma.

¹¹Ipapo Yahwe bakati kundili, “Nkololo we nthu, mafupa iyawa bathu bose be Iziraela. Bona banoti, ‘Mafupa edu awoma ne kugalabgwe kwedu akutjipo, tafa tapela.’

¹²Ndizo wali lebelambeli uti ku bali, ‘She Yahwe bakati, “Ndowozhula zwikumbu zwenyu, ngono amudusa mu zwikumbu zwenyu, imwi bathu bangu ngono ndowomubuza ku shango ye Iziraela.

¹³Ngono mowoziba kuti ndimi Yahwe pandinowozhula zwikumbu zwenyu ngono ndimudusa mu zwikumbu zwenyu, imwi bathu bangu.

¹⁴Ndowolonga meya yangu mu muli ngono mowotjila, ngono ndowomugadza mu shango yenyu. Ipapo mowoziba kuti imi Yahwe ndimi ndaleba ngono ndakushinga, kojalo Yahwe.” ’ ”

¹⁵Dama la Yahwe likazha kundili liti,

¹⁶“Nkololo we nthu, Tola lukuni ukwale muguli uti, ‘Gumilile Juda ngono Baiziraela bazwizwadzanye naye.’ Ube utola gumwe lukuni ukwale muguli uti, ‘Lukuni gwa Ifureimi, igogu ngegwa Josefa ngono bathu bose be Iziraela bazwizwadzanye naye.’

¹⁷Hwuni idzedzi udzibhatshanye dzibe lukuni gung'ompela mu luboko gugo.

¹⁸Ha bathu babo bekubhuzwa beti, ‘Apa aungatibudze kuti unodwani naikoku kene?’

¹⁹Ubadwe uti, ‘Tjinoleba She Yahwe etji, Ndabe pejo ngotola lukuni gwa Josefa, igogu gu mu luboko gwa Ifureimi ne njudzi dze Iziraela dzakazwizwadzanya naye, ngono ndibe nditola lukuni gwa Juda ndidzibhatshanya ndithama lukuni gung'ompela ngono dzibe lukuni gung'ompela mu luboko gwangu.’

²⁰Ubhate hwuni dzawakwala mbeli kwabo

²¹ube uti ku bali, ‘She Yahwe bakati, Ndowotola Baiziraela mu njudzi dzabakayenda kudzili. Ndowobakubunganya kudwa kose kupoteleka ababuza mu shango yabo.

²²Ndowobathama ludzi gung'ompela mu shango, pezhugwi kwe matombo e Iziraela ngono nng'ompela koga unowobe mambo wabo. Abatowofa babe njudzi mbili kakale kene kuli kuthubukanya bumambo gwabo kabili.

²³Abatowopapha kakale bakazwitemapadza nge midzimu yabo ye zwifano ne zwithu zwabo zwinoshimisa kene nge milandu yabo ngoti ndowobatjidza ndibadusa mu kuwa kwabo, ndowobatjenapadza. Ipapo banowobe bathu bangu, imi abe Ndzimu wabo.

²⁴“ ‘Nlanda wangu Dafite unowobe mambo wabo, bose banowobe ne nlisi nng'ompela. Banowolondolodza milayo yangu bakaitobela nge njele.

²⁵Banowogala mu shango yandakapa nlanda wangu Jakubo, shango yakagagwa ndi bobatategulu benyu. Ibo ne bana babo ne bana be bana babo banowogala muili nge kusingapele, Dafite nlanda wangu unowobe ntungamili wabo nge kusingapele.

²⁶Ndowothama tjidumano tje mbakiso nabo. Tjowobe tjili tjidumano tjisingapele. Ndowobagadzikanya abawatsha, ngono agadza bugalo gwangu gwakayengemala pakati kwabo nge kusingapele.

²⁷Bugalo gwangu gowobe nabo, ndowobe Ndzimu wabo ibo bakabe bathu bangu.

²⁸Ipapo njudzi dzowoziba kuti imi Yahwe ndothama kuti Iziraela iyengemale bugalo gwangu ha guli pakati kwabo nge kusingapele.’ ”