Read Kalanga Ezekiele 38 Bible Online

Ezekiele 38 - Kalanga bible

Ezekiele 38

¹Dama la Yahwe lakazha kundili liti,

²“Nkololo we nthu, lingisana na Gogo we shango ye Magogi, gulukota gulu le Mesheki ne Tubali. Lebelambeli nge kukwe

³uti, ‘She Yahwe bakati, Ndobhayana nawe iwe Gogo, gulukota gulu le Mesheki ne Tubali.

⁴Ndowo kutendebudza ngono alonga zwihweko mu shaya dzidzo ndikudusa ne ngwa iyo yose ne mbizi dzidzo ne bataswi be mbizi bakaambala zwibhayano zwe ngwa zose, makoko makulu, bose bose bakashakatila zwivikisi zwikulu ne zwitukunu ne mathumo.

⁵Pheshiya ne Khushi ne Puti dzowobe dzinabo, bose bana zwiviko ne hwutshe dze dale,

⁶Gomeri naiyobo ne ngwa yayo ne Bheti Togama kudwa kule ku bunandzwa ne ngwa yayo yose, njudzi njinji dzinawe.

⁷“ ‘Uzwilulwamise, ululwame iwe ne banjinji bakubungana pakuli ngono ube ntjengeti wabo.

⁸Shule kwe mazhuba manjinji unowobe udanigwa kugwa. Mu makole ambeli unowonginilila shango yakagwilila mu tjimo tjayo kudwa mu ngwa, ye bathu bayo bakakubunganyiwa bedwa mu njudzi njinji beyenda ku matombo e Iziraela, yakatola tjibaka yakathukudzika. Bakazhisiwa bedwa mu njudzi ngono ngwenu bose banogala bakadzikama.

⁹Unowoyendila mbeli uyenda se dutu, unowofanana ne gole lakadzinga shango.

¹⁰“ ‘She Yahwe bakati, Mu zhuba ilelo njalakang'wa dzowozha mu nkumbulo uwo ngono unowoluka nkumbulo mbiimbi.

¹¹Iwe unowoti, “Ndowoyenda anogwisana ne shango ye mizi isakabakiligwa nge makuma, ndowonginilila bathu bakatebama banogala bakasununguka, bose banogala basina makuma ana zwiberabero kene zwizhalilo.

¹²Ndowotapa atola thundu, ndinginilila matongo iyawa akamusiwa abe gegwe ne bathu ibaba bakakubunganyiwa kudwa mu njudzi bakafuma zwithuwo ne thundu, banogala pakati kwe shango.”

¹³Sheba ne Dedani ne baseenyi be Tashishi ne mizi yayo yose banowoti ku kuli, “Wakubunganya banjinji kutapa kene? Wakubunganya bunjinji kutolela, ne kututa siliva ne golide, kutola zwithuwo ne thundu ne kuwolela thundu njinji kene?” ’

¹⁴“Ndizo wali nkololo we nthu, lebelambeli uti kuna Gogo, ‘She Yahwe bakati, Mu zhuba ilelo, panowobe bathu bangu Baiziraela begala bakasununguka, apa autokubona kene?

¹⁵Unowozha udwa ku magalo awo kule ku bunandzwa, iwe ne njudzi njinji dzinawe, bose banowobe bakataswa mbizi ne bunjinji ne ngwa yakasima.

¹⁶Unowonginilila bathu bangu Baiziraela se gole lidzinga shango. Mu mazhuba ambeli iwe Gogo ndowothama kuti ugwisane ne shango yangu kuita kuti njudzi dzindizibe andizwilakidza ndiwe kuti ndakayengemala mbeli kwabo.

¹⁷“ ‘She Yahwe bakati, apa ate iwe wandakaleba nge kukwe nge balanda balebelambeli be Iziraela mu misi yakapinda? Mu misi iyeyo bakalebelambeli kwe makole kuti ndowothama kuti ubanginilile.

¹⁸Tjinowoshingikala mu zhuba ilelo etjetji. Gogo unowoti enginilila shango ye Iziraela, kugwadzamoyo kwangu kowomuka, kojalo She Yahwe.

¹⁹Ngoti mu fupa langu ne kugwadzamoyo kwangu kunopisa ndoleba woku, Mu zhuba ilelo kowobe ne kutengenyeka kwe shango mu shango ye Iziraela.

²⁰Hwobe dze gungwa ne nyuni dzinowuluka ne phuka dze shango, tjibumbiwa tjimwe ne tjimwe tjinoyenda pasi ne bathu bose mu shango banowotetema mbeli kwangu. Matombo anowopitugwa, phili dzowokwamukana ne guma likawila pasi.

²¹Ndowodana thumo kubhayana na Gogo pezhugwi kwe matombo angu wose, kojalo She Yahwe. Thumo le nthu lowobhayana ne ikamu tjitje.

²²Ndowozhisa bugwele munli ne kutebuka kwe malopa, ndowonisa vula ye nkubila ne tjivulamabgwe ne moto ne sibabuli tjinopisa munli ne mungwa iye ne mu njudzi njinji dzose dzinaye.

²³Ndizo ndowolakidza bukulu gwangu ne kuyengemala kwangu, ndowothama kuti ndizibgwe mu mesho e njudzi njinji. Ipapo banowoziba kuti ndimi Yahwe.’