Read Kalanga Ezekiele 4 Bible Online

Ezekiele 4 - Kalanga bible

Ezekiele 4

¹Yahwe bakadwa Ezekiele bakati, “Nkololo we nthu, tola itina utjibige mbeli kuko ube unyemba nzi nkulu Jerusalema mu tjili,

²uukombe nge ngwa, uthame nyundo dzinoupkhwanya kuupoteleka, uthame matatho aunotathiligwa ndiwo ube uthama makotokelo ebanougwisa.

³Ipapo ubeutola ndilo ye butale uyibige pakati kuko ne nzi nkulu se guma linokuthubukanya ne nzi. Ulingisane ne nzi uthame kuti ukombiwe nge ngwa. Iwe uukombe nge ngwa. Ikoku tjilakidzo ku itjaba tje Iziraela.

⁴“Ipapo ulale nge lubadu gwe lumeshwe ube uzwilonga jinyo le itjaba tje Iziraela. Unowosenga jinyo le itjaba tje Iziraela tjibaka tjinolizana mazhuba awakalala ipapo.

⁵Ndakubalila mazhuba anoyendidzana ne makole e jinyo labo. Unowosenga jinyo le itjaba tje Iziraela mazhuba ali mazana matatu ana mazhuba ali makumi ali zhanalume (390).

⁶“Shule kwe wawidza mazhuba iyawa, ulale pasi kakale, koga ngwenu ulale nge lubadu gwe luji ube usenga jinyo le itjaba tje Juda. Ndakubalila mazhuba ali makumi manna, zhuba limwe ne limwe limilile gole.

⁷Uzwilingisanye nge kukomba Jerusalema nge ngwa, umilidze luboko gugo gusakazwimbiwa nge tjimwe ulebelembeli nge kwawo.

⁸Bona, ndowokusunga nge mitjili kuti usitongoshanduka ukalala nge gumwe lubadu kuswikila uwidza mazhuba ekuukomba nge ngwa.”

⁹“Tola koroni ne bhali ne nyemba ne ipimbo ne zembgwe ne lukwezha uzwishanganye mu tjija tjing'ompela. Unowothama tjiwunga ndizo tjaunowobe uja mu mazhuba iyawa ali mazana matatu ana mazhuba ali makumi ali zhanalume (390) ulilele nge lubadu.

¹⁰Zojiwa zwaunobe uja uzwiyele, uje tjilizanyo seme dzili mazana mabili ana dzili makumi matatu (230) nge zhuba ngono uja nge zwibaka zwakabigwa.

¹¹Ne vula unowong'wa yakalizanyidziwa, unowong'wa kopi mbili nge zwibaka zwakabigwa.

¹²Tjiwunga tje bhali tjaunowoja utjibhike nge zwilobe zwe bathu ibo bakalinga.”

¹³Yahwe bakabe beti, “Bathu be Iziraela banowoja zwakatemapala saikoku pakati kwe zwitjaba zwandinowobatatila ku zwili.”

¹⁴Ipapo imi ashandula nditi, “Bonani, She Yahwe, ngakusijalo. Imi andithu azwitemapadza kudwila mu butjetjana gwangu kuswikila ngwenu, andithu aja tjakazwifila kene tjakazandabugwa nge zwibandana, akuna tjakashoba tjathu tjikangina mu nlomo wangu.”

¹⁵Ipapo Yahwe bakati kundili, “Kwakalulwama, ndowokuletja ukabhika tjiwunga tjitjo nge zwilobe zwe ng'ombe pana kuti ubhike nge zwe bathu.”

¹⁶Bakandidwa ipapo bakati, “Nkololo we nthu, ndowotapudza zojiwa mu Jerusalema, banowoja zojiwa belizanyidza ngono hana dzabo dzowobe dzisakadzikama, beng'wa vula belizanyidza bakatemeka mafupa,

¹⁷Ngoti zojiwa ne vula zowobe zwisingabalizane, banowokaabala ha belingana, banowokorotela ngekwe shamu inobaloba ngekwe zwibi zwabo.”