Read Kalanga Ezekiele 40 Bible Online

Ezekiele 40 - Kalanga bible

Ezekiele 40

¹Mu gole le bumakumi mabili ana makole ali mashanu tili mu butapiwa, mu kutangisa kwe gole, mu zhuba le bugumi le mwedzi, mu gole le bugumi lina makole manna nzi nkulu wakapkhwanyiwa, mu zhuba ilelo koga luboko gwa Yahwe gwakabe gunami ngono bakandiyisa ikweno.

²Mu mbono Ndzimu wakanditola ukandiyisa ku shango ye Iziraela ukandimisa pezhugwi kwe dombo lefulefu kwazo. Ku ndzibo walo we burwa kwakabe kuna mbako dzakabe dzilingika se nzi nkulu.

³Bakandiyisako ngono abona nlume wakabe elingika se phangula ali mile pa nkoba akabhata nsungwana we jila ne lukombo gunolizanya.

⁴Nlume ihwoyo kandidwa kati, “Nkololo we nthu, linga nge mesho awo uhwe nge zebe dzidzo ngono uyele njele tjimwe ne tjimwe tjandinowokulakidza ngoti nditjo tjawazhisigwa ipapa. Ubudze bathu be Iziraela tjimwe ne tjimwe tjaunobona.”

⁵Kwakabe kuna guma kupoteleka ng'umba ye Ndzimu. Bulefu gwe lukombo gunolizanya gwakabe gwakabhakhwa nge nlume ihwoyo gwakabe guli thambo dzili gumi, ngono thambo imwe ne imwe ipaphidziwa nge tjiazha, ndizo kalizanya bukodu gwe guma gukabe thambo ing'ompela ne kuyenda pezhugwi kukabe thambo ing'ompela.

⁶Kudwa ipapo kayenda ku nkoba wakalinga ku bhezhuba. Katathila pezhugwi ngono kalizanya gwasayile le nkoba litjapasi ngono likabe thambo ing'ompela.

⁷Ng'umbana dze balindi dzakabe dzili thambo dzili thatu dzina gaswa bupabi ne bulefu imwe ne imwe yadzo, guma linodzithubukanya lili thambo dzili zhanakadzi bukodu gwalo. Makwasayile e nkoba wakabapa ne nkoto wakalingisana ne ng'umba ye Ndzimu wakabe uli lukombo gung'ompela bulefu gwawo.

⁸Kabe elizanya nkoto utjemukati kwe nkoba wakabe thambo dzili nna kungina,

⁹makuma awo ali thambo ina gaswa bukodu. Nkoto iwoyu we nkoba wakabe wakalingisana ne ng'umba ye Ndzimu.

¹⁰Tjemukati kwe nkoba we ku bhezhuba kwakabe kuna ng'umbana dze balindi, thatu ku ndzibo we luji ne thatu ku ndzibo we lumeshwe, dzakabe dzilizana ne makuma anodzithubukanya elizana nadzo.

¹¹Kudwapo kalizanya bupabi gwe nkoba panonginiwa ndipo, kukabe thambo dzili kutendeka.

¹²Mbeli kwe ng'umbana imwe ne imwe ye balindi kwakabe kuna guma fupifupi le bulefu kuyenda pezhugwi gunolizana gaswa le thambo ing'ompela, bukodu gwalo guli gaswa ye thambo. Ng'umbana imwe ne imwe yakabe ilizana mbizho dzose ili thambo thatu.

¹³Kudwa ipapo kalizanya nkoba tjapezhugwi kwe ng'umbana kudwa mu guma li shule le ng'umbana kunoti ku ng'umbana imwe ngono kukabe thambo dzili gumi lina dzili nna.

¹⁴Kalizanya makuma anothubukanya dzing'umbana wose atjemukati kwe nkoba kawana thambo dzili gumi lina ing'ompela ina gaswa.

¹⁵Kudwa pa nkoba kunoti ku ng'umbana ye bupelo kwakabe kulizana thambo dzili makumi mabili ana dzili zhanakadzi.

¹⁶Ng'umbana dze balindi dzakabe dzili tjemukati kwe nkoba ne makuma anodzithubukanya akabe ana mafesitere matukununu kuapoteleka efanana ne akabe ali mu mikoto, mikoba yose yakabe yakalinga tjamukati. Makuma akabe ethubukanya dzing'umbana akabe akanakisiwa nge zwifano zwe miti ye milala.

¹⁷Ipapo kandiyisa ku nsha utjakuzhe. Ikoko ndakabona ng'umba dzili makumi matatu ne budzilo gwakadzipoteleka.

¹⁸Budzilo gwakabe gwakabapisa mikoba, bulefu gwago ne bupabi gwago gulizana. Igogu budzilo gutjapasi.

¹⁹Ipapo kalizanya bulefu gunodwa tjemukati kwe nkoba utjapasi kunoti tjakuzhe kwe nsha utjemukati, kukabe thambo dzili makumi mashanu ana dzili tathatu kuyendila ku bhezhuba ne kuyendila ku bunandzwa.

²⁰Ipapo kalizanya bulefu ne bupabi gwe nkoba wakalinga ku bunandzwa unobhudila ku nsha utjakuzhe.

²¹Ng'umbana dzawo dze balindi, thatu ku ndzibo we luji ne ku ndzibo we lumeshwe ne makuma anodzithubukanya ne nkoto wadzo dzakabe dzilizana ne dze nkoba we kutanga. Kwakabe kulizana thambo dzili makumi mabili ana dzili zhanakadzi bulefu, bupabi guli thambo dzili gumi lina dzili nna.

²²Mafesitere awo ne nkoto wawo ne zwifano zwe nlala zwakanakisa makuma zwakabe zwilizana ne zwe nkoba wakabe wakalinga ku bhezhuba. Kwakabe kuna matathiso ali kutendeka anotathila kuuli, nkoto wawo wakalingisana nawo.

²³Kwakabe kuna nkoba unonginila mu nsha utjemukati wakalinga ku nkoba we bunandzwa kufanana koga nge kwakabe kuli iko nge nkoba we ku bhezhuba. Kalizanya kudwa mu nkoba mmwe kuyenda ku mmwe wakalingisana nawo ngono kukalizana thambo dzili makumi mashanu ana dzili tathatu.

²⁴Kudwa ipapo kanditungamilila ku burwa ngono abona nkoba ku burwa, ngono kalizanya makuma anoithubukanya nenge mikoto yayo ngono dzikabe dzilizalizana ne dzimwe.

²⁵Ng'umbana dze nkoba iwoyu ne makuma e nkoto dzakabe dzina mafesitere matukununu kufanana ne amu mikoba mimwe. Bulefu gwe nkoba gwakabe guli thambo dzili makumi mabili ana dzili zhanakadzi bupabi guli thambo dzili gumi lina dzili tathatu.

²⁶Kwakabe kuna matathiso ali kutendeka akabe etathila kuuli, nkoto wawo wakabe wakalingisana nawo. Wakabe wakanakisiwa nge zwifano zwe nlala mu makuma awo anothubukanya ng'umbana dze balindi mu midzibo yawo yose.

²⁷Nsha utjemukati wakabe una nkoba bo wakabe wakalinga ku burwa, ngono kalizanya kudwa pa nkoba iwoyu kunoti ku nkoba utjakuzhe ku ndzibo uku burwa ngono kukalizana thambo dzili makumi mashanu ana dzili tathatu.

²⁸Nlume ihwoyo kanditungamilila ku nsha utjemukati nge nkoba we burwa, ngono kalizanya nkoba we burwa ngono ukalizana ne mimwe mikoba.

²⁹Ng'umbana dzawo dze balindi ne makuma anodzithubukanya ne nkoto wawo kwakabe kulizana koga ne mimwe mikoba. Nkoba ne nkoto zwakabe zwina mafesitere kose kupoteleka. Wakabe ulizana thambo dzili makumi mabili ana dzili zhanakadzi bulefu, bupabi gulizana thambo dzili gumi lina dzili nna.

³⁰Mikoto kupoteleka nkoba we nsha utjemukati yakabe ilizana thambo dzili makumi mabili ana dzili zhanakadzi bulefu, bupabi gulizana thambo dzili gumi lina dzili nna.

³¹Ng'umbana dzawo dze balindi dzakabe dzakalinga ku nsha utjakuzhe, makuma anodzithubukanya akabe akanakisiwa nge zwifano zwe nlala ngono kuna matathiso anotathila kuuli ali zhanakadzi.

³²Ipapo kandiyisa ku nsha utjemukati ku bhezhuba ngono kalizanya nkoba, wakabe ulizana ne mimwe mikoba.

³³Ng'umbana dzawo dze balindi ne makuma anodzithubukanya ne mikoto yawo yakabe ili zana ne mimwe mikoba. Nkoba ne ng'umbana dzawo dze balindi wakabe una mafesitere kupoteleka. Kose kulizana thambo dzili makumi mabili ana dzili zhanakadzi bulefu, bupabi gulizana thambo dzili gumi dzina dzili nna.

³⁴Mikoto yawo yakabe yakalinga ku guma litjakuzhe, makuma anothubukanya mikoto akabe akanakisiwa nge zwifano zwe nlala, ngono kuna matathiso ali zhanakadzi anotathila kuuli.

³⁵Ipapo kandiyisa ku nkoba we bunandzwa kabe eulizanya. Iwo wakabe ulizana ne mimwe mikoba.

³⁶Ng'umbana dzawo dze balindi ne makuma anodzithubukanya ne nkoto wawo kwakabe kulizana ne zwimwe ngono zose zwina mafesitere matukununu kupoteleka. Wakabe uli thambo dzili makumi mabili ana dzili zhanakadzi bulefu, bupabi guli thambo dzili gumi dzina dzili nna.

³⁷Mikoto yawo yakabe yakalinga ku guma litjakuzhe, makuma anothubukanya mikoto aku ndzibo we luji ne we lumeshwe akabe akanakisiwa nge zwifano zwe nlala. Kwakabe kuna matathiso anotathila kuuli ali zhanakadzi.

³⁸Kwakabe kuna ng'umba kubapa ne mikoto pa nkoba mmwe ne mmwe utjemukati, ndiko kwakabe kusukigwa tjibhayilo tjinopisiwa.

³⁹Mu mikoto ye nkoba ku ndzibo we luji kwakabe kuna tafuli mbili newe lumeshwe kwakabe kuna tafuli mbili kwakabe kubulayigwa pezhugwi kwadzo tjibhayilo tjinopisiwa ne tjibhayilo tje tjibi ne tjibhayilo tje nlandu.

⁴⁰Kuzhe kwe guma le nkoto we nkoba pejo ne matathiso pa nkoba we bunandzwa kwakabe kuna tafuli dzili mbili, ku ndzibo mmwe we matathiso kuna dzimwe tafuli dzili mbili.

⁴¹Ndizo wali kwakabe kuna tafuli dzili nna ku ndzibo we nkoba, kuna dzimwe dzili nna ku ndzibo mmwe we nkoba, dzose dzili zhanakadzi dzakabe dzibulayigwa zwibhayilo.

⁴²Kwakabe kuna dzimwe tafuli nna dzakathamiwa nge mabgwe akabezhiwa dzithamigwa zwibhayilo zwinopisiwa, imwe ne imwe yadzo yakabe ilizana mbizho dzose dzili gaswa le thambo bulefu ne bupabi. Kwakabe kubigwa pezhugwi kwadzo zwakabe zwishingisiwa kubulaya zwibhayilo zwinopisiwa ne zwimwe zwibhayilo.

⁴³Kwakabe kuna zwihweko zwilefu kungapa bupabi gwe tjiazha zwakanamatidziwa mu midzibo ye tafuli kupoteleka. Tafuli dzakabe dzibigwa nyama ye zwibhayilo.

⁴⁴Kuzhe kwe nkoba utjemukati mu nsha utjemukati kwakabe kuna ng'umba mbili, imwe ili ku bunandzwa yakalinga ku bunandzwa, imwe ili burwa yakalinga ku burwa.

⁴⁵Nlume iwoyo kabe eti kundili, “Ng'umba yakalinga ku burwa ngeye bapirisiti banotjengeta Ng'umba ye Ndzimu,

⁴⁶ng'umba yakalinga ku bunandzwa ngeye bapirisiti banotjengeta tjibeso tjinopisigwa zwibhayilo. Bapirisiti ibaba bakololo ba Zadoki iye yega pakati kwe bakololo ba Levi ungazha pejo na Yahwe kubashingila.”

⁴⁷Ipapo kalizanya nsha ukalizana thambo dzili makumi mashanu ana dzili zhanakadzi bulefu ne bupabi. Tjibeso tje zwibhayilo tjakabe tjili mbeli kwe Ng'umba ye Ndzimu.

⁴⁸Kandiyisa ku nkoto we Ng'umba ye Ndzimu ngono kalizanya makuma anothubukanya mikoto kalizana thambo dzili zhanakadzi bulefu ne bupabi, makuma anothubukanya mikoto akalizana thambo dzili thatu.

⁴⁹Nkoto wakabe ulizana thambo dzili gumi lina thambo ina gaswa bulefu, bupabi guli thambo dzili zhanakadzi. Kwakabe kuna matathiso anotathila kuuli, kuna phanda ku ndzibo mmwe ne mmwe we makuma akabe ethubukanya mikoto.