Read Kalanga Ezekiele 43 Bible Online

Ezekiele 43 - Kalanga bible

Ezekiele 43

¹Ipapo nlume ihwoyo kandiyisa ku nkoba wakalinga ku bhezhuba,

²ngono ikoko abona tjedza tje Ndzimu we Iziraela tjidwa ku bhezhuba. Hwi lawo linga le mabilila makulu, shango ipenya nge tjedza tjawo.

³Mbono yandakabona yakabe ifanana ne mbono yandakabona pawakazha kukolomodza nzi nkulu, kunga mbono yandakabona pa gwizi gwe Kheba, pandakathigama akotamisila buso pasi.

⁴Tjedza tja Yahwe tjikangina mu ng'umba ye Ndzimu nge nkoba wakalinga ku bhezhuba.

⁵Ipapo meya ikandimilidzila pezhugwi ikandilonga mu nsha utjemukati ngono tjedza tja Yahwe tjikazhala ng'umba ye Ndzimu.

⁶Kwakati nlume ihwoyo ali mile nami ipapo, ahwa mmwe elebeleka nami ali mu ng'umba ye Ndzimu.

⁷Kabe eti, “Nkololo we nthu, igogu, bugalo gwe tjigalo tjangu tje bumambo, bugalo gunotshambiwa nge makumbo angu. Ndowogala ipapa pakati kwe Baiziraela nge kusingapele. Ngono bathu be Iziraela abatowofa batemapadza zina langu lakayengemal kakale, ibo kene bomambo babo nge bufukula gwabo nenge midzimu yabo isina butjilo.

⁸Ha bebumba itubhu tjabo betjibapisa ne itubhu tjangu, bebakila makwasayile e mikoba yabo kubapa ne makwasayile e mikoba yangu, tithubukanyiwa nge guma koga lipakati kwedu, bakatemapadza zina langu lakayengemala nge zwiyito zwabo zwinoshimika. Ndizo ndakababulaya ndakagwadza moyo.

⁹Ngwenu ngabaduse bufukula gwabo pandili ne midzimu ya bomambo babo isingatjile, ndizo ndowogala pakati kwabo nge kusingapele.

¹⁰“Iwe nkololo we nthu, londesedzela Bathu be Iziraela ng'umba ye Ndzimu kuti babhakhwe nge shoni ngekwe zwibi zwabo.

¹¹Ngono ha ili kuti banobhatigwa nge shoni zose zwabakathama, ubazibise mbumbiko ye ng'umba ye Ndzimu, ndongoloso yayo, ubalakidze mikoba inongina ne mikoba inobhuda ne njendiso yayo yose ne milayo yayo yose. Ukwale kose ikoku bakalinga kuti batobele njendiso yayo yose ne milayo yose yayo.

¹²“Iwoyu ndiwo nlayo we ng'umba ye Ndzimu, ntuthu wose pezhugwi kwe dombo ne tjekelo dzalo kowobe kwakayengemala kupinda. Ndiwo nlayo we ng'umba ye Ndzimu.”

¹³“Edzi indizanyo dze tjibeso tjinopisigwa zwibhayilo kushingisiwa luboko, bulefu guli luboko, bupabi guli bupabi gwe tjiazha. Ku bhato latjo kwakabe kuna panowungisa vula pakangina kunolizana tjiazha ne bupabi gunolizana tjiazha, ndzibo uli bupabi gungapa bupabi gwe tjiazha. Ngono bulefu gwe tjibeso tjinopisigwa zwibhayilo wogu,

¹⁴Kudwa pasi kuyenda pezhugwi kunoti pa ikombeledzo tjitjapasi kwakabe kulizana thambo ing'ompela ina luboko gung'ompela bupabi, kudwa pa ikombeledzo tjitukunu kunoti ku ikombeledzo tjikulu kulizana thambo ing'ompela ina luboko bulefu kuyenda pezhugwi, bupabi gulizana luboko gung'ompela.

¹⁵Pezhugwi kwatjo panobesegwa moto kwakabe kuli bupabi gunolizana thambo dzili thatu dzina luboko, kube kube ne nyanga dzili nna dzakalinga pezhugwi kudwa mu tjibeso tjinopisigwa zwibhayilo.

¹⁶Bupabi ne bulefu gwe panobesegwa moto pe tjibeso tjinopisigwa zwibhayilo kolizalizana, kolizana thambo dzili tathatu dzina maboko mabili.

¹⁷Ikombeledzo tjipezhugwi naitjobo tjakabe tjilizalizana tjili thambo dzili zhanakadzi bulefu ne bupabi, tjina ndzibo unolizana bupabi gwe tjiazha ne panowungisa vula pelizana tjiazha tjathubugwa na pakati kutjipoteleka. Matathiso e tjibeso tjinopisigwa zwibhayilo akabe akalinga ku bhezhuba.”

¹⁸Ipapo kabe eti kundili, “Nkololo we nthu, tjinoleba She Yahwe etji, Milayo ye tjibeso tjinopisigwa zwibhayilo eyi, Mu zhuba linowobe tjibeso tjinopisigwa zwibhayilo tjabakwa kupisila zwibhayilo mu tjili ne kutjinyasa nge malopa e zwibhayilo izwezo,

¹⁹Upe bapirisiti nkong'wana we tjibhayilo tje tjibi, Balevi be nsha wa Zadoki, ibo banozha pejo kushinga pandili, koleba She Yahwe.

²⁰Iwe utole mamwe e malopa awo uazhodze mu nyanga nna dze tjibeso tjinopisigwa zwibhayilo ne mu midzibo minna ye tjikombeledzi tjipezhugwi ne kupoteleka ndzibo. Ndiikoku unowobe watjitjenapadza watjithama kuti tjiamutjilike kuna Yahwe.

²¹Iwe utole nkong'wana we tjibhayilo tje tjibi unowupisila pakabigwa mu bugalo gwe ng'umba kuzhe kwe ng'umba ye Ndzimu.

²²“Mu zhuba le bubili ubhaye phoko isina bulema ili tjibhayilo tje tjibi, ngono tjibeso tjinopisigwa zwibhayilo tjitjenapadziwe sekwa tjakatjenapadziwa nge nkono.

²³Ha wapedza kutjitjenapadza ubhaye tjibhayilo tje nkono ne nyundo yadwa mu ngubi, zose zwisina bulema.

²⁴Uzwiyise pana Yahwe, bapirisiti babe bezwinyunyudzila mwenyu babe bezwibhaya zwili tjibhayilo tjinopisigwa Yahwe.

²⁵“Mutole mazhuba ali kutendeka, mulimwe ne limwe lawo ubhaye phoko ili tjibhayilo tje tjibi, ubhaye ne nkono kudwa mu danga le ng'ombe ne nyundo kudwa mu ngubi, dzose dzibe dzisina bulema.

²⁶Batole mazhuba ali kutendeka betjenapadza tjibeso tjinopisigwa zwibhayilo kuti tjiamutjilike kuna Yahwe, saikoko babe betjipa Yahwe.

²⁷Kubupelo gwe mazhuba iyawa, kudwa mu zhuba le buzhanakadzi kuyenda mbeli, bapirisiti babe bepisila zwibhayilo zwenyu zwinopisiwa nezwe kugadzikana mu tjibeso tjinopisigwa zwibhayilo itjetjo. Ipapo ndowomuamutjila, koleba She Yahwe.”