Read Kalanga Ezekiele 44 Bible Online

Ezekiele 44 - Kalanga bible

Ezekiele 44

¹Ipapo kabgwilila nami ku nkoba we bugalo gwakayengemala utjakuzhe wakalinga ku bhezhuba, ngono nkoba iwoyo wakabe wakazhaligwa.

²Yahwe bakandidwa bakati, “Nkoba iwoyu ugale wakazhaligwa. Usitongo zhugwa, kusiyite ungangina ndiwo. Ugale wakazhaligwa ngoti Yahwe, Ndzimu we Iziraela bakangina ndiwo.

³Ntungamili iye ndiye yega ungagala tjemukati kwe nkoba kuja zojiwa pana Yahwe. Unowongina ne nkoto we nkoba kabuya kabhuda ndiwo.”

⁴Kudwa ipapo kandibuza nge nkoba we bunandzwa kandiyisa mbeli kwe Ng'umba ye Ndzimu. Ngono ati ndilinga abona tjedza tja Yahwe tjilizhele Ng'umba ya Yahwe, ngono awila pasi nge buso.

⁵Yahwe bakandidwa bakati, “Nkololo we nthu, linga nge njele, uhwilile zubuyanana uyele njele tjimwe ne tjimwe tjandinokubudza ngekwe milayo ye Ng'umba ya Yahwe. Yela njele nkoba unongina we Ng'umba ye Ndzimu ne mikoba yose inobhudiwa ndiyo ye bugalo gwakayengemala.

⁶Budza ng'umba ye bupanduki ye Iziraela uti, ‘She Yahwe bakati, Mija yenyu yose inoshimika ngaipele imwi bathu be Iziraela.

⁷Makalonga bataya bana mimoyo isakathumbigwa isingandihwe, basakathumbigwa nenge mu nyama mu bugalo gwangu gwakayengemala, mugutemapadza ntome mundipa zojiwa ne mafuta ne malopa ngono muvuna tjidumano tjangu pezhugwi kwe zwinoshimisa zwamunothama.

⁸Mu bumo gwe kuti mutjengete zwithu zwangu zwakayengemala mopa bataya simba le kutjengeta bugalo gwangu gwakayengemala.

⁹“ ‘She Yahwe bakati, Akuna ntaya usakathumbigwa mu moyo ne mu nyama ungangina mu bugalo gwangu gwakayengemala, kose naibabo bataya banogala pakati kwe Baiziraela.

¹⁰Koga Balevi bakati bakayenda kule nami betjutjula betobela midzimu yabo ye zwifano mu tjibaka Iziraela tjayakabe yalashika bakafanila senga mibhayilo ye tjibi tjabo.

¹¹Bangashinga zwabo mu bugalo gwangu gwakayengemala, betjengeta mikoba naiyo Ng'umba ye Ndzimu beshinga zwabo muili, bangabhayila bathu zwibhayilo bakabuya bakama mbeli kwe bathu bakabashingila.

¹²Koga ngekuti bakabashingila mu buyapo gwe midzimu yabo ye zwifano ngono bakathama kuti bathu be Iziraela batjinye, ndizowali ndamilidza luboko gwangu ndituna kuti basengane ne mibhayilo ye tjibi tjabo, koleba She Yahwe.

¹³Basitongo zha pejo nami kundishingila se bapirisiti, basitongo sedzela pejo ne tjimwe tjangu tjezwakayengemala kene zwipo zwangu zwakayengemala, bakafanila sengana ne mibhayilo ye mija yabo inoshimika.

¹⁴Koga ne kwakajalo ndowobathama kuti batjengete Ng'umba ye Ndzimu, bashinge mishingo yose yakafanila shingwa.

¹⁵“ ‘Koga bapirisiti, Balevi be ludzi gwa Zadoki ibo bakati mu tjibaka Iziraela tjayakabe yandifupatila bakalondolodza kutjengeta bugalo gwangu gwakayengemala ne nshingo mmwe ne mmwe wakabe wakafanila shingwa muili banowosedzela pejo kushinga pandili kundishingila. Banowoma mbeli kwangu beyisa zwibhayilo zwe mafuta ne malopa, kojalo She Yahwe.

¹⁶Ibo ndibo boga bakalizanila kungina mu bugalo gwangu gwakayengemala ndibo boga bakalizanila kusedzela pa tafuli yangu bendishingila beyendisa nshingo wangu.

¹⁷Ha bengina mikoba ye misha itjemukati baambale zwiambalo zwe jila, basitongo mbala zwiambalo zwe wulu ha beshinga pa mikoba ye nsha utjemukati kene mukati kwe Ng'umba ye Ndzimu.

¹⁸Baambale zwiala zwe jila mu misholo ne zwiambalo zwakusi zwe jila. Basiambale tjimwe tjinotukutidza.

¹⁹Ha bebhudila kuzhe ku nsha utjakuzhe kuna bathu, baambule zwiambalo zwababe bakaambala beshinga mukati ngono bazwisiye mu ng'umba dzakayengemala, baambale zwimwe zwiambalo kuita kuti basitongo dwa beyengemadza bathu ngekwe zwiambalo zwabo.

²⁰“ ‘Basitongo tesela misholo yabo kene bakaletja mavudzi abo kabe malefu, koga balizanyidze mavudzi e misholo yabo.

²¹Kusitongo yita mpirisiti unong'wa nkumbi we zhambi ha engina mu nsha utjemukati.

²²Basitongo lobola tjilikadzi kene bakadzi bakathubukana ne balume babo, bangalobola baanadi be Iziraela koga kene tjilikadzi dze bapirisiti.

²³Banowodiya bathu bangu kusiyana kwe tjakayengemala ne tjisakayengemala, bebalakidza zila yabangaziba ndiyo tjakatjenapala ne tjakatemapala.

²⁴Ha kungabe ne kusahwanana, bapirisiti ndibo basumikilisi ngono ndebo bayipedze kuyendidzana ne milayo yangu. Balondolodze milayo yangu yose ye mizano yangu yose yakabigwa ngono bayengemadze bo Sabata bangu.

²⁵“ ‘Mpirisiti asitongo zwitemapadza nge kusedzela pejo ne nthu wakafa, koga ha ili kuti nfi ndi tate babe kene mmeyabe kene nkololo uwe kene nkololokadzi uwe kene mwana wa mmeyabe we tjilume kene we tjikadzi usakalobogwa, ipapo ungazwitemapadza.

²⁶Ha asinotjenapala agale mazhuba ali kutendeka

²⁷Mu zhuba laanongina mu nsha utjemukati kwe bugalo gwangu gwakayengemala kunoshinga mu bugalo gwangu gwakayengemala azwiyisile tjibhayilo tje tjibi. Koleba She Yahwe.

²⁸“ ‘Imi ndimi thaka ye bapirisiti. Usitongo bakobela tjimwe mu Iziraela, ndimi thundu yabo.

²⁹Banowoja tjipo tje mathunde ne tjibhayilo tje tjibi ne tjibhayilo tje nlandu. Tjimwe ne tjimwe tjapiwa Ndzimu mu Iziraela tjowobe tjabo.

³⁰Mu zwitshwa zwe kutanga, zwitshwa zwakanaka kupinda zwitshwa zose zwe kutanga ne zwipo zwakashalugwa ngezwe bapirisiti. Mubape tjiwunga tjekutanga kubidwa ha mubhika tjiwunga, kube ne dothodzo mu misha yenyu.

³¹Bapirisiti basitongoja tjimwe tjawang'wa tjakafa kene tjakamwawugwa nge zwibandana zwe shango, kungabe nyuni kene phuka.