Read Kalanga Ezekiele 45 Bible Online

Ezekiele 45 - Kalanga bible

Ezekiele 45

¹“ ‘Uti utjeka shango uyikoba kube thaka, upe Yahwe gobe le shango libe ntuthu wakayengemala, unolizana thambo dzili makumi mabili ana dzili shanu e zwiwulu (25 000) bulefu, bupabi gube thambo dzili makumi mabili e zwiwulu (20 000).

²Mu ntuthu iwoyu utjeke lubabi gunolizalizana bulefu ne bupabi gube panogala bugalo gwakayengemala, thambo dzili mazana mashanu (500) pakapotelekwa nge tjibata tje thambo dzili makumi mashanu (50).

³Mu ntuthu ihwoyu wakayengemala, tjeka lubabi gunolizana thambo dzili mazana ali makumi mabili ana shanu (25) bulefu, bupabi gube thambo dzili zwiwulu zwili gumi (10 000). Muuli panowobe bugalo gwakayengemala, Bugalo gwakayengemala kupindisa.

⁴Panowobe lubabi gwakayengemala gwe shango guli gwe bapirisiti banoshinga mu bugalo gwangu gwakayengemala, ibo banosedzela pejo kunoshinga mbeli kwa Yahwe. Panowobe bugalo gwe ng'umba dzabo ne bugalo gwangu gwakayengemala.

⁵Lubabi gumwe gwe magalo iyawo nge gwe Balevi banoshinga mu Ng'umba ye Ndzimu, igo gulizane thambo dzili makumi mabili ana bushanu gwe zwiwulu bulefu (25 000) ne zwiwulu zwili gumi (10 000) bupabi.

⁶“ ‘Kubapa ne bugalo gwakayengemala kube lubabi gunowobaka Baiziraela bose gulizane thambo dzili zwiwulu zwishanu (5 000) bupabi ne thambo dzili zwiwulu zwili makumi mabili ana zwili zwishanu (25 000) bulefu,

⁷“ ‘Ntungamili wakafanila kutjekegwa iye shango ngono ibe ishanganya ntuthu wakayengemala ne ntuthu we mizi. Ikwebele ku lubizho gwe ku golombedzo negwe ku bhezhuba itangisa ku golombedzo inoti ku bhezhuba yakabapisa magalo e njudzi.

⁸Shango iyeyi inowobe thundu iye mu Iziraela. Ndizo batungamili bangu abatjowotshambilidza bathu bangu koga banowoletja bathu be Iziraela kube ne shango kuyenda nge njudzi dzabo.

⁹“ ‘She Yahwe bakati, Manyanya imwi babusi be Iziraela. Letjedzani kudziyidza kwenyu ne kutshambilidza ngono mu thame tjakatambunuka ne tjakalulwama. Letjani kutolela bathu bangu zwabo, koleba She Yahwe.

¹⁰“ ‘Mushingise zwiyelo zwakalingisana, ibe tjilizanyo tje efa tjakalulwama ne bhati yakalulwama.

¹¹Efa iyeyi ne bhati zwibe zwilizana, bhati ibe ilizana tjebugumi tje homeri, efa naiyobo ibe ilizana tjebugumi tje homeri, homeri nditjo tjilizanyo tjazo zose.

¹²Shekele ingine gera dzili makumi mabili. Makumi mabili e shekele eshangana ne makumi mabili e shekele ana dzili shanu eshangana ne shekele dzili gumi lina dzili shanu dzothama mina ing'ompela.

¹³“ ‘Tjipo tjamunowopa ndiyetji, tjebutathatu tje efa kudwa mu homeri imwe ne imwe ye koroni ne tjebutathatu tje efa kudwa mu homeri imwe ne imwe ye bhali.

¹⁴Tjilizanyo tje mafuta tjilizanyiwe nge bhati, kube tjebugumi tje bhati kudwa mu khori imwe ne imwe, khori ina bhati dzili gumi, inolizana ne homeri.

¹⁵Ne pkhwizi ing'ompela itogwe mu ngubi imwe ne imwe ina pkhwizi dzili mazana mabili (200) kudwa mu mafudzilo e Iziraela. Izwezwi zwithu zowoshingisiwa mu tjipo tje mathunde ne muna tjinopisiwa ne tjipo tje hwanano kuthamila bathu kugadzana, kojalo She Yahwe.

¹⁶Bathu bose be shango banowobhatana ne ntungamili we Iziraela mu kuyisa tjipo itjetji.

¹⁷Koga kowobe kuli ndingisano kuti ntungamili aduse zwipo zwinopisiwa ne zwipo zwe mathunde ne zwipo zwe tjing'o pa Mizano ye mwedzi ugala na bo Sabata. Athame eijalo mu mizano yose yakabigwa ye bathu be Iziraela, wakafanila dusa zwibhayilo zwe zwibi ne zwipo tje mathunde ne zwibhayilo zwinopisiwa ne zwibhayilo zwe mbakisano kuthama gadzano ye ng'umba ye Iziraela.

¹⁸“ ‘She Yahwe bakati, Mu mwedzi we kutanga, mu zhuba le kutanga le mwedzi mutole nkong'wana usina bulema mutjenapadze bugalo gwangu gwakayengemala.

¹⁹Mpirisiti atole mamwe e malopa e tjibhayilo tje tjibi aazhodze makwasayile e Ng'umba ye Ndzimu, azhodze ne mu midzibo minna ye tjikombeledzi tji tjapezhugwi tje tjibeso tjinopisigwa zwibhayilo ne mu mapango e nkoba we nsha utjemukati.

²⁰Mu zhuba le butendeka le mwedzi uthamile mmwe ne mmwe unobe atjinya koga abe asazwimisila kutjinya kene atjinya nge kusaziba saikoku, unthamile kugadzana ngekwe Ng'umba ye Ndzimu.

²¹“ ‘Mu mwedzi we kutanga mu zhuba lawo le bugumi lina mazhuba ali manna mube ne Nzano we Kupinda pezhugwi ngono mutole mazhuba ali kutendeka muja tjiwunga tjisina mbidzo.

²²Mu zhuba ilelo ntungamili unowodusa nkong'wana uli tjibhayilo tje jinyo lile ne le bathu bose mu shango.

²³Zhuba limwe ne limwe mu mazhuba iyawa e nzano ntungamili unowodusa mikong'wana ili kutendeka ne nyundo dzili kutendeka dzisina bulema ili tjibhayilo tjinopisigwa Yahwe ne phoko ili tjibhayilo tje tjibi.

²⁴Adusile nkong'wana mmwe ne mmwe ne nyundo imwe ne imwe efa yalonga mafuta e tjilizanyo tje hini ili tjipo tje mathunde.

²⁵Mu mazhuba iyawa ali kutendeka e nzano iwoyu unotangisa mwedzi uli gumi lina mazhuba ali mashanu, ntungamili azhise kunofanana kwe tjibhayilo tje tjibi nekwe tjibhayilo tjinopisiwa nekwe tjipo tje mathunde ne mafuta.