Read Kalanga Ezekiele 46 Bible Online

Ezekiele 46 - Kalanga bible

Ezekiele 46

¹“ ‘She Yahwe bakati, Nkoba we nsha utjemukati wakalinga ku bhezhuba ugale wakazhaligwa mu mazhuba ali tathatu ekushinga, koga nge sabata uzhugwe nenge zhuba le Mwedzi ugala.

²Ntungamili angine ne nkoto we nkoba iwoyu edwa kuzhe ngono abe ema pa phanda dze nkoba. Bapirisiti babe bepisa tjibhayilo tjitje tjinopisiwa ne zwibhayilo zwizwe zwe mbakisano ngono anamate ipapo pa itumbu tje nkoba, kudwapo abe ebhudila kuzhe. Koga nkoba usitongo zhaligwa kuswikila madekwana.

³Bathu be shango banamate pa nkoba mbeli kwa Yahwe mu mazhuba e sabata ne e mwedzi ugala.

⁴Tjibhayilo tjinopisiwa tjinodusiwa ne ntungamili edusila Yahwe mu zhuba le sabata tjibe tje pkhwizana dzisina bulema dzili tathatu ne nyundo isina bulema.

⁵Tjipo tje mathunde tjadusiwa ne nyundo tjibe tjilizana efa, koga tjipo tje mathunde tjadusiwa ne pkhwizana tjibe sekwaada koga tjina hini ye mafuta mu efa imwe ne imwe.

⁶Mu zhuba le Mwedzi ugala ntungamili aduse nkong'wana usina bulema ne pkhwizana dzili tathatu dzisina bulema ne nyundo isina bulema.

⁷Tjipo tje mathunde aduse efa ing'ompela ne nkong'wana ne efa ing'ompela ne nyundo, pkhwizana idzo adzidusile sekwaada koga efa imwe ne imwe ilongwe hini ye mafuta.

⁸Ntungamili ha engina, angine ne nkoto we nkoba, ngono abuye abhude ndiwozwawo.

⁹“ ‘Kuti bathu be shango bezha mbeli kwa Yahwe ku mizano nge tjibaka tjakabigwa, unobe angina nge nkoba we ku bunandzwa ati ebhuda abhude nge nkoba we ku burwa, ne unobe angina nge nkoba uku burwa abhude nge nkoba we ku bunandzwa, basitongo bhuda nge nkoba wabangina nawo koga batambunukile mbeli.

¹⁰Ntungamili ati bathu bengina angine nabo, ha bebhuda, naiye abhude.

¹¹“ ‘Ngono mu mizano yakabigwa ne mu mishangano iyeyi, tjipo tje mathunde ne nkong'wana tjowobe tjilizanyo tje efa ne nyundo ibe ne tjilizanyo tje efa, pkhwizana idzo uduse sekwawada koga efa imwe ne imwe ibe ne hini ye mafuta.

¹²Ntungamili ha edusa tjipo tje kuda kukwe, tjili tjipo tjinopisiwa kene tje mbakisano, azhuligwe nkoba wakalinga ku bhezhuba, ngono unowoyisa tjibhayilo tjitje tjinopisiwa kene tjibhayilo tje mbakisano sekwa anothama nge sabata. Ha apedza unowobhuda nkoba ube uzhaligwa.

¹³“ ‘Zhuba ne zhuba mangwanana aduse pkhwizana ina gole ling'ompela isina bulema ili tjibhayilo tjinopisigwa Yahwe.

¹⁴Ngono aduse tjipo tje mathunde tjinolizana gobe ling'ompela mu makobe ali tathatu e efa ne gobe ling'ompela mu makobe ali matatu e hini ye mafuta kunyaya bgwisa gwe tjiwunga. Ikoku kube nlayo usingapele we kuyisa tjipo tje mathunde kuna Yahwe.

¹⁵Ndizo wali pkhwizana ne tjipo tje mathunde ne mafuta zwibepo mangwanana mamwe ne mamwe zwili tjibhayilo tje misi yose.

¹⁶“ ‘She Yahwe bakati, Ha ntungamili angatola tjimwe tje thundu iye kapa mmwe we bakololo babe se tjipo, tjowobe tje bakololo babe, inowobe thaka yabo.

¹⁷Koga ha ili kuti tjipo itjetji tjadwa mu thundu iye tjapiwa mmwe we balanda babe, tjowobe tje nlanda ihwoyo kuswikila gole le kusununguka ngono tjibe tjibgwilila ku ntungamili, bakololo babe koga ndibo bangatjitolela tjose.

¹⁸Ntungamili asitongo yita waanotolela thaka e ntata mu thaka iye. Ape bakololo babe thaka inodwa muna iye thaka kuyita kuti kusibe ne mmwe we bathu bangu unothubukana ne thaka iye.’ ”

¹⁹Ipapo nlume ihwoyo kandipitsha nge nkoto upahwunde ne nkoba unoyenda ku ng'umba dzakayengemala dzakalinga ku bunandzwa dze bapirisiti kandilakidza magalo mamwe ku ndzibo uku golombedzo.

²⁰Kabe eti kundili, “Ipapa ndipo bapirisiti pabanowobhikila tjibhayilo tje nlandu ne tjibhayilo tje tjibi bakabuya bakabhika tjipo tje mathunde kuyita kuti basitongo zwiyisa ku bhakasa le tjakuzhe bedwa beyengemadza bathu.”

²¹Ipapo kandiyisa ku nsha ukuzhe kapinda nami pa midzibo minna ye nsha, ngono mu ndzibo mmwe ne mmwe we nsha kwakabe kuna nsha.

²²Mu midzibo minna ye nsha ukuzhe kwakabe kuna misha yakabakiligwa ngono mmwe ne mmwe wayo ilizana thambo dzili makumi manna (40) bulefu, bupabi gulizana thambo dzili makumi ali matatu (30).

²³Kupoteleka tjemukati kwe misha iyeyi kwakabe kuna tjikombeledzi tje bgwe ngono kuna zwibeso kusi kwatjo kupoteleka kuyenda nge tjikombeledzi.

²⁴Kandidwa kati, “Iyawa ndiwo mabhikilo panowoti ibabo banoshinga mu Ng'umba ye Ndzimu bakabhikila bathu zwibhayilo zwabo.”