Read Kalanga Ezekiele 47 Bible Online

Ezekiele 47 - Kalanga bible

Ezekiele 47

¹Ipapo nlume iwoyo kandibuzila shule ku nkoba we Ng'umba ye Ndzimu ngono abona vula iwunga idwa kusi kwe itubhu tje ng'umba iwungila ku bhezhuba. Ng'umba ye Ndzimu yakabe yakalinga kunomila zhuba. Vula yakabe idwa kusi kwe lubizho gwe burwa gwe ng'umba ku burwa gwe tjibeso tjinopisigwa zwibhayilo.

²Ipapo kandidusa nge nkoba wakalinga ku bunandzwa kapoteleka nami kuzhe tikanoswika ku nkoba utjakuzhe wakalinga ku bhezhuba, ngono vula yakabe iwunga idwa mu lubizho gwe burwa.

³Nlume ihwoyo wakabe akabhata nsungo unolizanya, ngono kalizanya maboko ali tjiwulu (1 000) ngono tikapalama vula yakabe ima mu zwingoringori.

⁴Kalizanya maboko ali tjiwulu (1 000) kakale kandipalamisa vula yakabe yoma pa zwidwi. Ngono kalizanya kakale maboko ali tjiwulu (1 000) kandipalamisa vula iyeyo kakale, ngono vula yakabe yoma pa thunji.

⁵Kalizanya kakale maboko ali tjiwulu (1 000) ngono ngwenu kwakabe kwabe gwizi gwandisingake aambuka ngoti vula yakabe yawanda, yakangina kwakungabhukutjiwa muili, guli gwizi gusingake gukatjulukika.

⁶Ngono kandidwa kati, “Nkololo we nthu, wakubona ikoku kene?” Ipapo nlume ihwoyo kabgwilila nami ku phili ye gwizi.

⁷Ndakati ndiswika ku phili dze gwizi ndakabona miti minjinji mu phili dzose dze gwizi.

⁸Ngono kabe eti kundili, “Vula iyeyi inowungila ku ntuthu we ku bhezhuba ibe iyenda idelukila ku Araba ibe iwungila mu gungwa. Ha iwungila mu gungwa vula imu gungwa inobe mbuyanana.

⁹Kumwe ne kumwe gwizi igogu kwagunowungila kowobe ne zwibumbiwa zwinotjila zwinjinji. Kowobe ne hwobe njinji se vula iyeyi iwothama kuti vula ina mwenyu ibe mbuyanana. Gwizi igogu kumwe ne kumwe kwagunowungila tjimwe ne tjimwe tjowotjila.

¹⁰Babhati be hwobe banowodzibhata bali mu phili dze gungwa kudwa ku Enigedi kunoti ku Enegilayimi, banowotambunudza njanga ikoko. Hwobe dzowobe dzili dzakasiyasiyana nge njudzi se hwobe dze Gungwa Bukulu.

¹¹Koga thobolo ne matope kupoteleka akutowobe kubuyanana kowoletjiwa kuli mwenyu.

¹²Mu phili dzose dze gwizi kowomela njudzi dzose dze miti ye mitjelo. Mitjelo yayo ayitowopela ne mazhani ayo aatowowoma. Inowozwala mitjelo mwedzi ne mwedzi se vula inodwa mu bugalo gwakayengemala iwungila kuyili. Mitjelo yayo inowobe zojiwa, mazhani iwo kabe anopodza.”

¹³She Yahwe bakati, “Migathu inowothubukanya shango ikobegwa njudzi dzili gumi lina mbili (12) dze Iziraela kube thaka eyi. Josefa abe ne mbabi mbili.

¹⁴Ubakobele ubalizalizanya. Ndakatuna kupa shango iyeyi bobatategulu benyu ndizo shango iyeyi inowobe thaka yenyu.

¹⁵“N'gathu we shango unowobe hwoyu: Ku bunandzwa unowotangisa pa Gungwa Bukulu kuyenda nge zila ye Hetiloni upinda nepa Lebo Hamati unoti ku Zedadi ulinga ku

¹⁶Bherotha ne Siburaimu imu n'gathu pakati kwe Damasiko ne Hamati ku kwebela kule ku Hazeri Hatikhoni imu n'gathu we Haurani.

¹⁷N'gathu unowokweba kudwa pa gungwa kunoti ku Hazari Enoni, kuyenda nge n'gathu we Damasiko ku bunandzwa, n'gathu we Hamati unobe uli ku bunandzwa. Ndiwo n'gathu we ku bunandzwa.

¹⁸“Ku bhezhuba n'gathu unowoyenda uli pakati kwe Haurani ne Damasiko kuyenda nge Jorodani pakati kwe Giliyadi ne shango ye Iziraela, kunoti ku gungwa gwe bhezhuba kunoti ku Tama. Iwoyu n'gathu we ku bhezhuba.

¹⁹“Ku ndzibo we burwa n'gathu unowotangisa pa Tama ube ukweba bulefu kunoti ku vula dze Meriba Kadeshi kudwapo utebela Nkuku we Egipiti kunoti ku Gungwa Bukulu. Iwoyu unowobe n'gathu we ku burwa.

²⁰“Ku golombedzo n'gathu i Gungwa Bukulu kukweba kunoti pakalingisana ne Lebo Hamati. Iwoyu unowobe n'gathu we ku golombedzo.

²¹“Ndiko sekwa makafanila kobana shango iyeyi kuyenda nge njudzi dze Iziraela.

²²Muikobane ibe thaka yenyu neye bataya bakabaka namwi bana bana. Mubatole se bana bakazwagwa bali Baiziraela, bawane thaka namwi njudzi dze Iziraela.

²³Mu ludzi kene guli gupi ntaya kwaabakako mu nkobele thaka iye, kojalo She Yahwe.