Read Kalanga Ezekiele 48 Bible Online

Ezekiele 48 - Kalanga bible

Ezekiele 48

¹“Mazina e njudzi awawa akalongolosiwa: Kudwa pa n'gathu we bunandzwa Dani unowobe ne gobe ling'ompela kudwa nge zila ye Hetiloni kunoti ku Lebo Hamati, kunoswika ku Hazarenani mu ndzibo we Damasiko kubapa ne Hamati. Ndiwo unowobe n'gathu uwe kudwa ku bhezhuba kunoti ku golombedzo.

²Asheri unowobe ne gobe ling'ompela, n'gathu uwe unowotangisa pa ntuthu wa Dani ku bhezhuba kuyenda ku golombedzo.

³Nafutali unowobe ne gobe ling'ompela, kutangisa pa ntuthu wa Asheri ku bhezhuba kuyenda ku golombedzo.

⁴Manase unowobe ne gobe ling'ompela, kutangisa pa ntuthu wa Nafutali ku bhezhuba kuyenda ku golombedzo.

⁵Efureimi unowobe ne gobe ling'ompela, kutangisa pa ntuthu wa Manase ku bhezhuba kuyenda ku golombedzo.

⁶Rubheni unowobe ne gobe ling'ompela, kutangisa pa ntuthu wa Ifureimi ku bhezhuba kuyenda ku golombedzo.

⁷Juda unowobe ne gobe ling'ompela, kutangisa pa ntuthu wa Rubheni ku bhezhuba kuyenda ku golombedzo.

⁸“Kutangisa pa ntuthu wa Juda ku bhezhuba kuyenda ku golombedzo ngaube ntuthu waunowobigila ntome. Ntuthu iwoyu ulizane thambo dzili zwiwulu zwili gumi lina kubili ne mazana ali mashanu (12 500) bupabi, bulefu kudwa ku bhezhuba kuyenda ku golombedzo ulizane ne mmwe ne mmwe we mituthu yakakobegwa njudzi. Pakati kwe ntuthu iwoyu kowobakiwa bugalo gwakayengemala.

⁹Ntuthu iwoyu wawabigila ntome uwupe Yahwe, ulizane thambo dzili zwiwulu zwili gumi lina kubili ne mazana ali mashanu (12 500) bupabi gube thambo dzili zwiwulu zwili zwishanu (5 000).

¹⁰Magalo akayengemala e bapirisiti anowobe sahwoku: Bulefu mu lubizho gwe bunandzwa gowolizana thambo dzili zwiwulu zwili gumi lina kubili ne mazana ali mashanu (12 500), gukabe thambo dzili zwiwulu zwili zwishanu (5 000) ku lubizho gwe bhezhuba ne thambo dzili zwiwulu zwili zwishanu (5 000) ku lubizho gwe golombedzo ne thambo dzili zwiwulu zwili gumi lina kubili ne mazana ali mashanu (12 500) bupabi, bulefu ku burwa. Bugalo gwakayengemala gowobakiwa pakati kwe magalo iyawa.

¹¹Magalo iyawa anowobe e bapirisiti bakayengemadziwa, Bazadoki bakagalikabgwe mu kundishingila bakasitongo pambuka se Balevi tjibaka tjakapambuka Baiziraela.

¹²Anowobe magalo akashalugwa abanopiwa kudwa mu ntuthu wakayengemala we shango, ntuthu wakayengemala kupindisa, ntuthu unogathulana ne ntuthu we Balevi.

¹³“Ntuthu we Balevi unowobapisa ntuthu we bapirisiti, ulizane thambo dzili zwiwulu zwili gumi lina kubili ne mazana ali mashanu (12 500) ne zwiwulu zwili zwishanu (5 000) bupabi. Bulefu gwawo gose gowobe zwiwulu zwili gumi lina kubili ne mazana ali mashanu (12 500) ne bupabi gwawo gose guli zwiwulu zwili zwishanu (5 000).

¹⁴Magalo iyawa basitongo atengesa kene kuli kuatenganya pamwe pawo nge tjimwe. Magalo akashalugwa asitongo pitshigwa ku mmwe ngoti akayengemala kuna Yahwe.

¹⁵“Pasala pe ntuthu ihwoyu panolizana zwiwulu zwili thambo dzili zwiwulu zwili zwibili zwina mazana mashanu (2 500) bupabi ne zwiwulu zwili gumi lina kubili ne mazana ali mashanu (12 500) bulefu i shango koga ingashingisiwa nge bathu bebaka muili ne kufudzila muili. Nzi nkulu ubakiwe pakati kwapo,

¹⁶ngono ndizanyo dzapo dzowobe sahwoku, lubizho guku bunandzwa gowolizana thambo dzili zwiwulu zwili zwibili zwina mazana mashanu (2 500) ku burwa ne thambo dzili zwiwulu zwili zwibili zwina mazana mashanu (2 500) ku bhezhuba ne thambo dzili zwiwulu zwili zwibili zwina mazana mashanu (2 500) ku golombedzo.

¹⁷Mafudzilo e nzi nkulu anowobe ali thambo dzili zana ling'ompela lina makumi mabili ana mashanu (125) ku bunandzwa ne thambo dzili zana ling'ompela lina makumi mabili ana mashanu (125) ku burwa ne thambo dzili zana ling'ompela lina makumi mabili ana mashanu (125) ku bhezhuba ne thambo dzili zana ling'ompela lina makumi mabili ana mashanu (125) ku golombedzo.

¹⁸Ntuthu wasala wakabapisa ntuthu wakayengemala ku bhezhuba ube bulefu gwe thambo dzili zwiwulu zwili zwi shanu (5 000) ne dzili zwiwulu zwili zwi shanu (5 000) ku golombedzo unowobe minda inolimigwa bashingi be nzi nkulu.

¹⁹Bashingi be nzi nkulu banodwa mu njudzi dzose dze Iziraela banowolima muuli.

²⁰Mbabi dzose dze ntuthu dzowobe dzilizana bulefu ne bupabi, dzili thambo dzili zwiwulu zwili gumi lina kubili ne mazana ali mashanu (12 500), nzi nkulu uli mukatibo.

²¹Ntuthu wasala yeno na yeno kwe pakatjekegwa ntuthu wakayengemala una nzi nkulu, unowobe we ntungamili. Unowokweba kudwa pa thambo dzili zwiwulu zwili gumi lina kubili ne mazana ali mashanu (12 500) e ntuthu wakayengemala ukwebela ku n'gathu we ku bhezhuba, ku golombedzo unowokweba kudwa pa thambo dzili zwiwulu zwili gumi lina kubili ne mazana ali mashanu (12 500) zwe ntuthu wakayengemala ukwebela ku n'gathu we ku golombedzo. Mituthu iyeyi mibili inokweba bulefu gunolizana ne gwe mituthu ye njudzi inowobe ye ntungamili, ntuthu wakayengemala una bugalo gwakayengemala unowobe uli pakati kwayo.

²²Ntuthu we Balevi ne ntuthu we nzi nkulu inowobe ili pakati kwe mituthu ye ntungamili. Ntuthu we ntungamili unowobe pakati kwe ntuthu wa Juda newa Bhenjamini.

²³“Be njudzi dzasala banowotobedzana sahwoku: Bhenjamini unowobe ne gobe ling'ompela, kudwa pa ndzibo uku bhezhuba kuyenda ku golombedzo,

²⁴Simiyoni unowobe ne gobe ling'ompela, unowogathulana na Bhenjamini kudwa ku bhezhuba kuyenda ku golombedzo.

²⁵Isakari unowobe ne gobe ling'ompela, unowogathulana na Simiyoni kudwa ku bhezhuba kuyenda ku golombedzo.

²⁶Zebuluni unowobe ne gobe ling'ompela, unowogathulana na Isakari kudwa ku bhezhuba kuyenda ku golombedzo.

²⁷Gadi unowobe ne gobe ling'ompela, unowogathulana na Zebuluni kudwa ku bhezhuba kuyenda ku golombedzo.

²⁸N'gathu wa Gadi uku burwa unowotangisa kudwa pa Tama kunoti ku vula dze Meriba Kadeshi, kudwa ipapo unowobapisa nkuku we Egipiti kunoti ku Gungwa Bukulu.

²⁹“Shango iyeyi ndiyo yaunowokobanya njudzi dze Iziraela ili thaka mubali. Ndiyo mikobe yabo iyeyi, kojalo She Yahwe.

³⁰“Mikoba ye nzi nkulu inowobe sahwoku: Kudwa ku ndzibo uku bunandzwa, unolizana thambo dzili zwiwulu zwili zwibili zwina mazana mashanu (2 500) bulefu,

³¹mikoba ye nzi inowopiwa mazina e njudzi dze Iziraela. Ku ndzibo uku bunandzwa kowobe kuna mikoba mitatu, nkoba wa Rubheni ne nkoba wa Juda ne nkoba wa Levi.

³²Ku ndzibo uku bhezhuba unolizana thambo dzili zwiwulu zwili zwibili zwina mazana mashanu (2 500), kowobe ne mikoba mitatu, nkoba wa Josefa ne nkoba wa Bhenjamini ne nkoba wa Dani.

³³Ku ndzibo uku burwa unolizana thambo dzili zwiwulu zwili zwibili zwina mazana mashanu (2 500) kowobe ne mikoba ili mitatu, nkoba wa Simiyoni ne nkoba wa Isakari ne nkoba Zebuluni.

³⁴Ku ndzibo uku golombedzo unolizana thambo dzili zwiwulu zwili zwibili zwina mazana mashanu (2 500), kowobe ne mikoba ili mitatu, nkoba wa Gadi ne nkoba wa Asheri ne nkoba wa Nafutali.

³⁵Kupoteleka nzi nkulu kowobe thambo dzili zwiwulu zwili zhanalume (9 000). Zina le nzi nkulu kudwa mu tjibaka itjetjo kuyenda mbeli lowobe, ‘Yahwe bayapo.’ ”