Read Kalanga Ezekiele 5 Bible Online

Ezekiele 5 - Kalanga bible

Ezekiele 5

¹Yahwe bakandidwa bakati, “Nkololo we nthu, tola bukanu guno pitsha, ugushingise se lupando utesele mavudzi awo ne ndedu dzidzo. Tola zwiyelo uthubukanye mavudzi awo.

²Kuti mazhuba e kukomba nzi nkulu nge ngwa epela utole bung'ompela mu butatu gwe mavudzi awo ugupisile mukati kwe nzi nkulu, gumwe butatu ugutole ugushashamule nge bukanu kupoteleka nzi nkulu, gwasala uguwuluse gupalale nge phepo ngono ndowobatatamila nge thumo.

³Utole mavudzi ali mashomanana uapetele mu lupeto gwe tjiambalo tjitjo.

⁴Utole mamwe awo kakale mashomanana ualashile mu moto uapise. Moto unowongunguma udwa ipapo uyenda nge itjaba tje Iziraela.”

⁵She Yahwe tjabanoleba etji, “Iwoyu nzi we Jerusalema, ndakaubiga pakati kwe zwitjaba, wakapotelekwa nge dzishango mbizho dzose.

⁶Koga Jerusalema mu bubi gwayo yakashandukila milayo yangu ne zwandakati zwishingwe, ikalakidza kuti imbiimbi kupinda zwitjaba ne shango dzose dzakaipoteleka. Yakalamba milayo yangu ikasitobele tjandakaleba.”

⁷Ndizo wali tjinoleba She Yahwe ndi etji, “Se muna mitshibha kupinda zwitjaba zose kumupoteleka, makalamba kulondolodza milayo yangu ne kutobela tjandakaleba naiko kutobela milayo ye njudzi dzakakupoteleka dumbu,

⁸nge kwaikoku She Yahwe bakati, imi ngwenu ndobhayana nawe, ndowokuloba shamu zwitjaba zose zwakalinga.

⁹Ngono ngekwe zwithu zose zwamathama zwinoshimisa ndowomuthamila tjandisathu atongo thama ngono tjisingange tjimwe tjandinowofandathama kakale.

¹⁰Ndizo botate mu Jerusalema banowoja bakololo babo ne bakololo banowoja botate babo. Ndowomuloba shamu ngono banowobe basala ndowobapaladza nge mbizho dzose.

¹¹“Ndizo ndolebesa se nditjila imi She Yahwe, nge kuti makatemapadza bugalo gwangu gwakayengemala nge zwinoshimisa nenge midzimu yenyu, anditjowomuthamila tjimwe tjibuya, anditjowomuhwila ngoni kene kumutjidza.

¹²Bung'ompela mu butatu gwe mbalo yenyu gowofa nge bugwele kene nge bhamba pakati kwenyu, gumwe butatu gowofa nge thumo kumu poteleka, gumwe butatu ndowogupaladza nge mbizho ngono ndowogutatamila nge thumo.

¹³“Ipapo kugwadzamoyo kwangu kowopela ne bushongola gwangu gowotapudzika ngoti kubgwilizila kwangu kowobe kwagutshika. Banowoziba kuti imi ndimi Yahwe ndakalebeleka nge fupa handidelusila bushongola gwangu mu bali.

¹⁴Ndowokuthama ukabe dukuthuku ukadadigwa nge zwitjaba zwakakupoteleka mu mesho abose banopinda.

¹⁵“Mowobe madado na bonkuwelegwa, mowobe itjenjedzi ne tjinodzidzimusa ku zwitjaba zwakamupoteleka ha ndimuloba ndakagwadza moyo ndilizhele bushongola ndimutjemela kwakasima. Imi Yahwe ndaleba.

¹⁶Ndowoti ndimuposa nge misebe yangu yakabangalala ye bhamba, misebe ya golomodzo yandinowoposela kubulaya, ndowomuzhisila bhamba litobegwa nge bhamba kutapudza zojiwa zwenyu.

¹⁷Ndowomuzhisila bhamba ne zwibandana zwe shango ngono zowomusiya musina bana, bugwele ne kutebugwa kwe malopa kowomuwila, ne thumo ndowolizhisa pakati kwenyu. Imi ndimi Yahwe ndalebeleka.”