Read Kalanga Ezekiele 6 Bible Online

Ezekiele 6 - Kalanga bible

Ezekiele 6

¹Dama la Yahwe lakazha kundili liti,

²“Nkololo we nthu, linga ku matombo e Iziraela ulebelembeli nge kwawo

³ngono uti, ‘Imwi matombo e Iziraela, ihwani dama la She Yahwe. She Yahwe banolebeleka bakati ku matombo ne ku matuthu, ku makorokoro ne ku mikuku, bonani, imi nge kwangu ndowozhisa thumo ngono ndowokolomodza magalo enyu akatuthumala.

⁴Zwibeso zwenyu zwe zwibhayilo zowokolomogwa ne zwibeso zwenyu zwe motsha zowophkwanyiwa, bathu benyu ndowobabulayila mbeli kwe midzimu yenyu.

⁵Ndowobiga zwitumbu zwe bathu be Iziraela mbeli kwe midzimu yabo ngono apaladza mafupa enyu kupoteleka zwibeso zwenyu zwe zwibhayilo.

⁶Kumwe ne kumwe kwamunogala mizi yenyu inowothukudziwa ne magalo enyu apezhugwi anowokolomogwa, kowothama kuti zwibeso zwenyu zwe zwibhayilo zwikolomogwe zwipaladziwe zwibe mapango, midzimu yenyu iphkwanyiwe itjinyiwe ne zwibeso zwenyu zwe motsha zwipkhwanyiwe ne tjimwe ne tjimwe tjamakathama tjikolomogwe.

⁷Bathu benyu banowobulawa pakati kwenyu, ndizo mowoziba kuti imi ndimi Yahwe.

⁸Koga bamwe benyu ndowobatjidza. Bamwe benyu banowoleyiwa nge thumo pamunowobe mupalala nge shango nenge njudzi dzakasiyana.

⁹Banowoti bali ikoko pakati kwe njudzi kwabanowobe batapigwa, ibabo banowobe baleyiwa banowondikumbula kuti ndakahwisiwa zogwadza kungapani nge mimoyo yabo izhele bupombgwe yakandishandukila ne mesho abo akabe eyemula midzimu yabo. Banowozwishima ngekwe bubi gwabakathama nenge kwe mija yabo inoshimisa.

¹⁰Ngono banowoziba kuti ndimi Yahwe, ndakabe ndisingalebe ndizana anditi ndowozhisa tjiga pakati kwabo.

¹¹She Yahwe tjabanoleba etji, Loba phande uzanazane nge kutjenama ulile uti, “Yee mme wee!” Ngekwe mbipo nenge mija inoshimika ye itjaba tje Iziraela, banowobulawa nge bukanu ne bhamba nenge bugwele.

¹²Bakulekule banowobulawa nge bugwele, bapejopejo banowobulawa nge bukanu, iye waleyiwa katjila unowobulawa nge bhamba. Bushongola gwangu ndowogushingisa saikoku.

¹³Ngono mowoziba kuti imi ndimi Yahwe ha bafi babo bakaandama pakati kwe midzimu yabo kupoteleka zwibeso zwabo zwe zwibhayilo pezhugwi kwe duthu limwe ne limwe lefulefu na pezhugwi kwe matombo wose. Kusi kwe nti mmwe ne mmwe una mazhani matshwa na kusi kwe n'oko mmwe ne mmwe una mazhani manji, pamwe ne pamwe pabanopisila midzimu yabo zwinonuhwa zwinozipa.

¹⁴Ndowoshingisa luboko gwangu kubhayana nabo, ndowoshakadza shango pamwe ne pamwe pabagele, kudwa ku tjilambanyika kunoti ku Ribila, kumwe ne kumwe kwabanotjila. Ipapo banowoziba kuti ndimi Yahwe.’ ”