Read Kalanga Ezekiele 7 Bible Online

Ezekiele 7 - Kalanga bible

Ezekiele 7

¹Dama la Yahwe lakazha kundili liti,

²“Ngono iwe, Nkololo we nthu, tjinoleba She Yahwe ku shango ye Iziraela etji, Kwapela! Bupelo gwazha mu midzibo minna ye shango.

³Bupelo gwazha mu muli sangwenu, ngono ndowobhayana namwi nge bushongola. Ndowomusumikilisa kuyendidzana nge mipanga yenyu, ndibe ndimulobela mija yenyu inoshimika.

⁴Andingamulinge nge ngoni kene kuli kumutjidza, koga ndowomulobela mija yenyu inoshimika ipakati kwenyu. Ipapo mowoziba kuti ndimi Yahwe.

⁵“She Yahwe tjabanoleba etji, mbatsha dzowomuzhila dzakatobedzana. Bonani, dzozha.

⁶Bupelo gwaswika! Gwaswika bupelo! Gwamuswikila bupelo. Bonani gwaswika!

⁷Bhelelo laswika ku muli, imwi bagali be shango. Tjibaka tjabepo, zhuba lipejo le kuhwumana lisi le kushatha pezhugwi kwe matombo.

⁸Ngwenu wali ndabe pejo ngekutebulila bushongola gwangu mu muli, ndowobhayana namwi nge kugwadzamoyo kwangu. Ndowomusumikilisa kuyendidzana nge mija yenyu, ndibe ndimulobela mija yenyu inoshimika.

⁹Anditowomulinga nge ngoni kene kuli ku mutjidza. Ndowomuloba kuyendidzana nge mija yenyu, zwinoshimika zwitjipakati kwenyu. Ipapo mowoziba kuti ndimi Yahwe ndinomuloba.

¹⁰Bonani zhuba labe ipapa! Bonani laswika. Bhelelo lakotoka. Ludozo gwathinila, kuzwikudza kwabe ne maluba.

¹¹Kumukilana kwakula kwabe lukombo gwe mbipo, akuna wabo unowosala, kene ili fumwa yabo kene mamo abo kene gudzo labo.

¹²Tjibaka tjabe pejo, zhuba lipejo. Ntengi asishathe ne ntengesi asishobe ngoti bushongola gowila bunji gose ngofanana.

¹³Ngoti batengesi abangabgwilile kuna tjabakatengesa nenguba bangabe batjatjila. Ngoti mbono[1] inolonga mbunga wose. Akuna ungabhatilila mu butjilo gugwe nge matjinyo abo.

¹⁴“Bakalidza lunyanga bakalulwamisa tjimwe ne tjimwe, koga akuna wakayenda ku ngwa ngoti bushongola gwangu guli mu mbunga wabo wose

¹⁵Kuzhe kuna thumo, mukati kuna bugwele ne bhamba bakuzhe banowobulawa nge thumo bamu nzi banowobulawa nge bugwele nenge bhamba.

¹⁶Bose banowobe basiya batjila banowowanika mu matombo se njiba dze mikuku belidziwa nge matjinyo abo.

¹⁷Maboko abo anowolungunuka, zwidwi zwabo zowolosonoka.

¹⁸Banowombala zwiambalo zwe jila le saka bakawigwa nge kutja kukulu. Banowobhakhwa nge shoni, misholo yabo banowoitesela.

¹⁹Banowolashila siliva yabo mu dzizila, golide yabo inowotogwa yakatemapala. “Mu zhuba le bushongola gwa Yahwe siliva ne golide yabo aingabatjidze. Abangazwiduse zhala ndiyo kene kuli kuija bezhadza mitumbu yabo ngoti ndiyo yakabe tjikuthi tjinobaligila mu matjinyo abo.

²⁰Maseka abo akanaka abakabe be zwikudza ndiwo bakapelela bethama midzimu yabo inoshimisa ndiwo, zwifaniso zwakabipa. Ndizo wali ndowothama kuti ikoku kube tjakatemapala ku bali.

²¹Ndowoyilonga mu maboko e bataya se thundu yatapiwa, ndowoipa babi be shango se yatapiwa ngono banoyitemapadza.

²²Ndowolinga ntome kuita kuti batemapadze bugalo gwangu gunodika, batoleli banongina muguli, banowogutemapadza.

²³Thamani ketani! Ngoti shango izhele milandu ye kutebula malopa, nzi nkulu uzhele kumukilana.

²⁴Ndowozhisa itjaba tjibiibi kupindisa kuti tjitole ng'umba dzabo. Ndowopedza kuzwikudza kwe bakasima, ng'umba dzabo dzowotemapadziwa.

²⁵Kudziyila kukulu kowoti kwaswika, banowoshaka mbakiso, koga abatowoyiwana.

²⁶Mbatsha dzozha dzakalongoloka, makwayi ezha akatobelelana. Banowoshaka kuwana mbono kudwa ku nlebesambeli, kudiya kowopela kudwa ku mpirisiti, ne ikumbuludzo kudwa mu bakulu.

²⁷Mambo unowolila, mbusi unowokuligwa nge kunyalamoyo ne maboko e bathu be shango iyeyi anowobe ne thete. Ndowonginikana nabo kuyendidzana nge mija yabo, ndowobasumikilisa kuyendidzana nge kusumikilisa kwabo. Ngono banowoziba kuti ndimi Yahwe.”