Read Kalanga Ezekiele 8 Bible Online

Ezekiele 8 - Kalanga bible

Ezekiele 8

¹Mu gole le butathatu, mu mwedzi we butathatu, mu zhuba le bushanu le mwedzi ndakabe ndiligele mu ng'umba yangu ndina sholotjena dze Juda dziligele mbeli kwangu ngono luboko gwa She Yahwe gukandibhata.

²Ndakati ndilinga, bonani, abona mbumbiko inonga ye nthu. Ngono kudwa pa thunji kuyenda pasi elingika se moto, kuyenda pezhugwi wakabe epenya se butale gwakakuyungiwa.

³Ngono katambunudza luboko kandibhata nge mavudzi e nsholo wangu kandimilidza. Meya ikandimilidzila pezhugwi pakati kwe shango ne kudzimu. Ikandiyisa ku Jerusalema ndili mu mbono dzinodwa ku Ndzimu ku manginilo e nkoba we nsha utjemukati wakalinga ku bunandzwa kuna tjigalo tje ndzimu we tjifano unomusa fupa, unodzonga kuti kube ne fupa.

⁴Ngono abona tjedza tje Ndzimu we Iziraela ipapo tjinga tjandakabona mu mbono mu nkuku.

⁵Ipapo Ndzimu ukabe uti kundili, “Nkololo we nthu milidza mesho ulinge ku bunandzwa.” Ndizo amilidza mesho alinga ku bunandzwa, bonani, pa manginilo, ku bunandzwa gwe nkoba we tjibeso tjinopisigwa zwibhayilo kwakabe kuna ndzimu we ifano unomusa fupa.

⁶Ndzimu bakabe beti kundili, “Nkololo we nthu, apa unobona tjabanoshinga kene, zwithu zwikulu zwinoshimisa zwinothamiwa nge bathu be Iziraela ipapa, kunditatila kutjena ne bugalo gwangu gwakayengemala kene? Koga utjowobona zwinoshimisa kupinda izwezwi.”

⁷Ngono ukandiyisa ku manginilo e nkoba we nsha, ngono ati ndilinga, bonani, abona kuna buli mu guma.

⁸Ngono ipapo ukandidwa ukati, “Nkololo we nthu, itsha upubule guma.” Ngono ndakatsha apubula awana kuna nkoba.

⁹Ndzimu ukabe uti kundili, “Ngina mukati ubone zwinoshimisa zwabanothama ipapa.”

¹⁰Ndizo angina ngono abona kwakanyembiwa mu guma zose zwibumbiwa zwinokambayila ne phuka dzinoshimika ne midzimu ye zwifano ye bathu be Iziraela.

¹¹Mbeli kwazo kwakabe kuli mile makumi ali kutendeka (70) e sholotjena dze Iziraela, dzakabe dzina Jaazaniya nkololo wa Shafani ali mile pakati kwadzo. Mmwe ne mmwe wadzo akabhata lukambana gunopisigwa motsha ngono busi gunonuhwa zwinozipa gwakabe guthungayila guyenda pezhugwi.

¹²Ipapo Ndzimu ukandidwa ukati, “Nkololo we nthu, apa wabona tjinoshingwa nge sholotjena dze Iziraela mu zhalima kene? Imwe ne imwe imu ng'umba yayo ne midzimu yayo ye zwifano. Ngoti dzakati, ‘Yahwe abatotibona, Yahwe bakafupatila shango iyeyi.’ ”

¹³Ukalebeleka kakale ukati kundili, “Utjawobona zwikulu zwinoshimisa zwadzinothama zwinopinda izwezwi.”

¹⁴Ipapo ukandiyisa ku bunginilo gwe nkoba we bunandzwa we ng'umba ya Yahwe, ngono ikoko abona bakadzi baligele be lilila Tammuzi.

¹⁵Ngono ipapo ukandidwa ukati, “Ikoku wakubona kene nkololo we nthu? Utjawobona zwikulu zwinoshimisa kupinda izwezwi.”

¹⁶Ngono ukandiyisa mu nsha utjemukati we ng'umba ya Yahwe. Ngono ikoko pa bunginilo gwe ng'umba ya Yahwe, pakati kwe nkoto ne tjibeso tjinopisigwa zwibhayilo kwakabe kuna balume bangabe makumi mabili ana bali bashanu (25) bakafupatila ng'umba ya Yahwe bakalinga ku bhezhuba bethigamila zhuba bakalinga ku bhezhuba.

¹⁷Ipapo ukandidwa ukati, “Wakubona ikoku kene nkololo we nthu? Apa bathu be Juda banotola zwithu zwinoshimisa izwezwi zwabanothama ipapa zwili madatha kene? Apa bakafanila kuzhadza shango nge kumukilana kene, bedwilila nge kutanga kundigwadzisa moyo kene? Bona, banoyisa lutabi ku tjimilo tjabo!

¹⁸Ndizo ndowonginikana nabo nge bushongola, anditowobatjidza kene kubahwila ngoni, kene bakalila nge hwi lipezhugwi ndibahwa anditowobateedza.”