Read Kalanga Daniyele 1 Bible Online

Daniyele 1 - Kalanga bible

Daniyele 1

¹Kwakati mu gole le butatu le mbuso wa Jehoyakimu mambo we Juda, Nebukadineza mambo we Bhabhiloni kazha kakomba Jerusalema.

²She bakabe baletjedzela Mambo Jehoyakimu kuti akundiwe ndi Nebukadineza kakale atape ne zwija zwe Ng'umba ye Ndzimu. Nebukadineza wakasengela zwija izwezwi ku ng'umba ino namatiwa midzimu iye ku Shinari ngono kaswika ezwibiga mu matula e thundu ye midzimu iye ikoko.

³Kudwapo Mambo Nebukadineza kadwa Ashipenazi ntungamili we ngomwa dzidze kuti ashalule bazhuzha mu Baiziraela kudwa muna be bushe ne muna be misha inokudziwa,

⁴bakafanila kube bazhuzha basina bulema bakanaka bali banolakidza luzibo mu tjimwe ne tjimwe tjabanozwidiya bali bathu bana luzibo gwe zwithu ngosiyana kwazo, bali banohwisisa tjinyolotjo kakale bakalulwamila kushinga mu ng'umba ye bushe. Ashipenazi wakafanila kuti abadiye hwalo ne lulimi gwe bathu be Khaladiya.

⁵Mambo bakadusa ndaulo kuti bazhuzha ibabo bapiwe zojiwa zwakabe zwijiwa ndiye mambo ne nkumbi we zhambi wakabe ung'wiwa na iye mambo. Bakabe bakafanila kuti badiyiwe kwe makole matatu ngono kudwapo bangashingila mambo.

⁶Mu bazhuzha bakashalugwa kwakabe kuli Daniyele na Hananiya na Mishaele na Azariya bali be ludzi gwa Juda.

⁷Ngono ntungamili we ngomwa wakabatumila mazina matshwa, Daniyele katumigwa linoyi Bheliteshazari, Hananiya katumigwa linoyi Shadireke, Mishaele katumigwa linoyi Meshaki ha Azariya iye akadang'wa Abedineko.

⁸Koga Daniyele iye kapedza eti iye aatozwitemapadza nge kuja zojiwa zwe bushe ne kung'wa nkumbi wakhona ngono kakumbila ntungamili we ngomwa kuti asizwitemapadze ngoja zojiwa izwezo.

⁹Ndzimu wakabe wathama ntungamili kuti alakidze lubu ne ngoni kuna Daniyele,

¹⁰koga ntungamili we ngomwa kadwa Daniyele kati, “Ndotja tetshi wangu, mambo, ibo bakaleba kuti muje zojiwa zwe bushe ne kuti mung'we nkumbi wazo. Ha mungalingika makawonda musingange bazhuzha bamwe be thaka dzenyu mambo banowondibulaya.”

¹¹Ndizo Daniyele kayenda ku nlisi uwe waakabe abigwa pasi kukwe ndi Ashipenazi iye na Hananiya na Mishaele na Azariya ngono kaswika endwa eti,

¹²“Utilike ubone kwe mazhuba ali gumi, usitongo tipa tjimwe kuzhe kwe milibo ne vula koga.

¹³Kudwapo ube ufanidzanya ndingiko yedu ne ye bazhuzha bamwe banoja zojiwa zwe bushe ngono ushingise nkumbulu uwo muna sekwa unobonatilingika ndiko.”

¹⁴Ngono wakaduma kubalika kwe mazhuba ali gumi.

¹⁵Kwakati shule kwe mazhuba ali gumi bakabe belingika bali babuyanana bepinda bazhuzha banoja zojiwa zwe bushe.

¹⁶Ndizo ngekwa ikoku nlisi katolela kutjena zojiwa zwe bushe ne nkumbi wazo we zhambi zwabakabe badwiwa kuti bazwije ngono mu bumo gwazo kabapa milibo.

¹⁷Ndzimu ukapa bazhuzha ibaba banna luzibo ne hwisiso ye hwalo dzose ngo thubukana kwadzo ne mukuzwidiya kwabo, ngono Daniyele iye kabe ne luzibo gwe kutjenesa mbono ne mawoloto ngo thubukana kwawo.

¹⁸Kwakati shule kwe tjibaka tjakabe tjabigwa ndi mambo tjekuti bazhe mbeli kwa mambo, ntungamili we ngomwa kazhisa bazhuzha kuna Nebukadineza.

¹⁹Mambo kalebeleka nabo ngono kawana kuli kuti Daniyele na Hananiya na Mishaele na Azariya bakapinda bamwe bose ndizo bakatogwa bakashingila mambo.

²⁰Wakawana kuli kuti mu tjimwe ne tjimwe luzibo ne hwisiso zwakabe zwishakiwa ndi mambo bakabe banazo kupinda be malipa ne ng'anga, kupinda bose mu mbuso uwe wose.

²¹Daniyele kashinga ipapo kuswikila gole le kutanga le mbuso wa Mambo Sirasi.