Read Kalanga Daniyele 10 Bible Online

Daniyele 10 - Kalanga bible

Daniyele 10

¹Kwakati mu gole le butatu le mbuso wa Sirasi mambo we Pheshiya, Daniyele wakabe edang'wa Bheliteshazari kazumbunuligwa dama, dama ilelo lakabe lili malebeswa lileba ngekwe ngwa hwulu. Hwisiso yalo yakazha kunli nge mbono.

²Nge tjibaka itjetjo imi Daniyele ndakabe ndili mu tjililo kwe tshipi dzili thatu.

³Ndakabe ndisingaje zojiwa zwinozipa nanga iyo nyama kene kung'wa nkumbi we zhambi, ndakabe ndigala ndakapanguka ndisingazhole mafuta kudzina tshipi thatu dzawila.

⁴Kwakati nge zhuba le bumakumi mabili ana mazhuba manna (24) mu mwedzi we kutanga ndilimile pa phili dze gwizi bukulu gwe Tigirisi.

⁵Ndakati ndimilidza mesho abona nlume mbeli kwangu akaambala jila le ntengo upezhugwi akazwisunga thunji nge mwandabula we golide ye Ufazi.

⁶Mbili uwe wakabe upenya se dayimani, buso gugwe gupenya se lupenyo gwe vula, mesho awe akabe epenya se nthuto we luvone, makumbo ne maboko awe zwakabe zwipenyelela se phangula yakakuyungiwa, hwi lile lakabe linga nsindo we mbunga nkulu.

⁷Ndimi ndonga ndakabona mbono iyeyi, bandakabe ndinabo akuna wakaibona koga kutja kukulu kukabawila ngono bakatizha bakanobgwata.

⁸Ndizo ndakasala ipapo ndili ndoga ndakalinga mbono iyeyi inotjenamisa. Ndakasala ndakatemeka mafupa, buso gwangu gwakafubala ndakapelegwa kusina simba lasala mundili.

⁹Ngono ndakati ndihwa hwi lile elebeleka awila pasi nge tjiso ndikabhakhwa nge hwope hwulu.

¹⁰Koga ipapo luboko gukandibhata gundibhatsha kuti ndimilike ndizwibhatilila nge maboko ndakazwisimisa nge zwidwi nditetema.

¹¹Ngono nlume iwoyu kandidwa kati, “Daniyele, milika, iwe unodika kwazo, ndatumwa ku kuli, bhulutana matama andinowokubudza.” Ngono wakati eijalo amilika nditetema kwazo.

¹²Ngono wakandidwa kati, “Daniyele usitje! Mitembezelo iyo yakahwika mu zhuba koga lawakatangisa kulingisana ne kushaka hwisiso ne kuzwiyisa pasi mbeli kwe Ndzimu uwo. Matama awo akahwika ngono ndazha kuwodabila ntembezelo uwo.

¹³Koga ntungamili we mbuso we Pheshiya wakandidzibilidza kwe mazhuba ali makumi mabili ana ling'ompela (21). Ngono Mikaele mmwe we balauli bakulu be batumwa be Ndzimu kazha kuwondibhatsha ngoti ndakabe ndasala ndoga mu Pheshiya.

¹⁴Ndizo ndazha kuwokutjenesela kuti kowoshingikalani ku bathu babo mu tjibaka tjinozha ngoti mbono iyeyi inotendeka ku tjibaka tjinozha.”

¹⁵Ngono kati eleba matama iyawa, aliga tjiso asheta ne dama.

¹⁶Kudwapo abona tjimwe tjinonga nthu tjibhata nlomo wangu ngono azhula nlomo atangisa alebeleka. Ndakadwa wakabe alimile mbeli kwangu nditi, “Tetshi wangu mbono iyeyi inondikulila, anditjina matatabuko.

¹⁷Ndiani imi wandingalebeleka namwi tetshi wangu kene? Andina ilo simba landinalo ndodwa.”

¹⁸Nlume iwoyo kandibhata kakale ngono kandisimisa.

¹⁹Ngono wakandidwa kati, “Usitje, unodika kwazo, kunyalala ngakube nawe! Sima, Sima!” Ngono wakati eijalo asima ngono ati, “Tjilebelekani tetshi wangu sematjindisimisa.”

²⁰Ndizo kalebeleka kati, “Apa unoziba kuti ini ndazha ku kuli kene? Tjinyolotjo ndowobe ndibgwilila ndinogwa ne ntungamili we Pheshiya ngono andipedza naye kowobe kuzha ntungamili we Gerisi.

²¹Koga tjekutanga ima ndikubudze tjakakwagwa mu Lukwalo gwe Malebeswa. Akuna unondibhatsha kuzhe kwa Mikaele ntungamili wenyu.”