Read Kalanga Daniyele 11 Bible Online

Daniyele 11 - Kalanga bible

Daniyele 11

¹Ngono ndakati mu gole le kutanga la Dariyasi we Mede, ama naye ambhatsha kakale ambakilila.

²Nlume iwoyo kadwilila kalebeleka eti, “Ndokubudza panoti lebeswa, kutjowozha bomambo bamwe bali batatu mu Pheshiya ngono kudwapo kowozha we bunna, iye unowobe akafuma kupinda ibaba bamwe. Ngono unowoti asimisiwa nge fumwa iye kadzonga bose kugwisana ne bushe gwe Gerisi.

³Ngono kudwapo kowozha mambo wakasima ne kupinda unowobusa nge simba gulu ethama sekwa anoshaka.

⁴Kowoti atjakula, mbuso uwe unowopaladziwa ukakobanyiwa nge phepo nna dze zhuzhugwe. Mbuso uwe autoyenda ku zwizekugwana zwizwe, kene ukabe ne simba linonga lile ngobe mbuso uwe unowobe wapaladziwa.

⁵Mambo we burwa unowobe ne simba koga mmwe we makulukota awe unowobe ne simba kumpinda ngono kabusa ntuthu uwe nge simba gulu.

⁶Ngono kowoti shule kwe makole mambo we burwa unowothama tjidumano na mambo we bunandzwa kuti mambo we bunandzwa alobole nkololokadzi wa mambo we burwa koga tjidumano itjetji atjitowotola tjibaka ngoti mu mazhuba iyawo nkololokadzi iwoyu ne balisi babe be bushe ne nlume uwe ne mwana uwe banowobulawa.

⁷Shule kwa ipapo mmwe we gamu lile unowotola bumambo. Ngono unowonginilila mambo we bunandzwa kose ne matizhilo awe ngono unowobakunda.

⁸Unowotapa midzimu yabo ye zwifano yabakazwithamigwa ne zwija zwe ntengo upezhugwi zwakathamwa nge siliva nge golide kazwiyisa ku Egipiti. Ngono unowotongo fadza mambo we bunandzwa kwe makole.

⁹Ngono mambo we bunandzwa unowonginilila mbuso we mambo we burwa, koga unowobgwilila ku shango iye.

¹⁰“Bakololo ba mambo we bunandzwa banowozhala bushongola bakakubunganya babhayani bakazwilulwamisila ngwa inowokuba se nkubila, bakagwa na mambo we burwa kunoti ku matizhilo awe.

¹¹Ngono mambo we burwa unowozhalabo bushongola kabhuda kanogwa na mambo we bunandzwa ngono unowotapa babhayani babe basi bashoma.

¹²Ngono unowoti asinokunda mu ngwa iyeyi unowozhala mazwikudzo ngono kabulaya zwiwulu zwinjinji zwe bathu ngono koga aangabhudililile tjatjose,

¹³Mambo we bunandzwa unowodana babhayani bamwe kakale banji kupinda bekutanga ngono kowoti shule kwe makole unowobuya ne babhayani banjinji bana mathumo wose e ngwa manjinji.

¹⁴“Mu mazhuba iyawo bunji gowomukila mambo we burwa ne bathu banotjinya be batoleli banowobe pakati kwe bathu bakanyi kwenyu banowopanduka ngono ikoku kuli kuti mbono yawakabona izhadzisike koga banowokundiwa.

¹⁵Mambo we bunandzwa unowozha kabaka duluthulo lisi shoma kupoteleka nzi we matizhilo ngono katapa matizhilo iyawa. Babhayani babe bakashagwa bakasima abangatubule kuma mbeli kukwe.

¹⁶Ngono iye unozha kuwonginilila mambo we bunandzwa unowothama kuda ne kubona nge kukwe akuna unowomilana naye, ngono unowogala mu shango yakanaka kabe ne simba lose muili.

¹⁷“Mambo we bunandzwa unowopedzisa nkumbulo we kuti azhe ne simba le mbuso uwe wose ngono unowothama tjidumano tje mbakiso na mambo we burwa. Ngono unowon'lobodza nkololokadzi we bakadzi kuti ndizo akolomole mbuso we burwa koga mikumbulo iye aingatubuke kene kuli kumbhatsha.

¹⁸Kowoti kwajalo unoshandukila kuna be shango dzimu tjekelo dze gungwa katapa banjinji babo koga nlauli we ngwa we ntaya unowozha kamisa bhisepise le bushongola gugwe ngono bhisepise le bushongola gugwe mambo we bunandzwa unowolishandusila pezhugwi kukwe.

¹⁹Shule kwa ikoku unowoshanduka kalinga ku matizhilo e shango iye koga unowokong'wa kawa kukabe ilo bhelelo lile.

²⁰“Koga unowotola mamo awe unowozhisa nkhethisi unowotshambilidza bathu banowokong'wa ngo dusa lukhetho bedusila zwe bushe gugwe. Koga kowoti mu makole asi mangana unowobe abulawa kusi nge bushongola kene mu ngwa.

²¹“Mambo we bunandzwa kowobe ne nthu wakabipa meya usakafanigwa nge kube mambo koga kowoti bathu batjakafala kazha kadzamula bushe nge bupitipiti.

²²Babhayani abangagwisa kuma mbeli kukwe banowobulawa kose ne mpirisiti nkulu unowobulawabo.

²³Kowoti asinothama tjidumano na bomambo bamwe ndiko kwaanotangisa kuthama bupitipiti ngono unowosima nge bathu basimuni koga.

²⁴Unowoti paasakakumbugwa kanginilila mituthu yakafuma ngono kathama tjisakatongo thang'wa ne mmwe wa bobatategulu babe. Unowokoba kapaladza thundu yose yaatapa. Unowoluka gwanga kunginilila mizi ye matizhilo koga kowobe kwe tjibaka tjisimuni koga.

²⁵“Unowozhala bushongola kasima moyo ngono kagwisa mambo we burwa nge babhayani banjinji kwazo, mambo we burwa unowommukila nge ngwa yakasima koga aatotubula kumilana naye ngobe banowobe banlukila gwanga.

²⁶Naibabo bapejo naye ndibo banowontjinyidzila butjilo, babhayani babe banowotshwayiligwa kutjena bakabulawa, babhayani banjinji banowobulawa.

²⁷Bomambo ibabo babili banowobe balizhele bubi benyepelana koga beja mu ndilo i nng'ompela ngono ikoku akutobabuzila tjimwe ngoti tjibaka tjakabigwa tjowobe tjisathu tjikazha.

²⁸Mambo we bunandzwa unowobgwilila ku shango iye nge fumwa isi shoma koga meya dzidze idzo dzowobe dzakazwimisila kulobesa budumili gwe bathu be Ndzimu. Unowothama sekwa anoshaka kudwapo ekobgwilila ku shango iye.

²⁹“Nge tjibaka tjakabigwa mambo we bunandzwa unowoshanduka kabgwilila ku burwa koga tjibaka tja ngwenu aatobe akasima se mu tjibaka tje kutanga.

³⁰Baroma banowozha nge zwikepe kuwon'gwisa ngono unowobe nge kutja kapelegwa, ngono kashandukila bagalimoyo be Ndzimu kagwisa kubalobesa. Unowotola gumbuludzo la ibabo bakafupatila budumili.

³¹Bamwe babhayani babe banowozha ngono bakatemapadza Ng'umba ye Ndzimu ne matizhilo bakamisa zwibhayilo zwinopisiwa zwe mazhuba wose kakale bakabiga n'yila unotjenamisa.[1]

³²Unowotjebela ibabo basingalondolodze tjidumano tjabo koga ibabo banoziba Ndzimu wabo banomililana naye.

³³Kwe tjibaka batjenjedu banowotjenesela banji nenguba banowobulawa nge thumo kene bejiwa nge moto kene betapiwa bethan'gwa basungwa.

³⁴Ngono badumili ibo abe dengadenga mu ngwa banowowana bhatsho. Banji banowozwishanganya nabo koga bamwe bana zwibili.

³⁵Koga bamwe banowodengadenga kuti ndizo bangudziwe batjenapadziwe basale bali babuyanana kudza bhelelo le shango lizha, ngobe ilo izhuba lakabigwa ne Ndzimu.

³⁶Mambo unoshinga kuda kukwe. Unowozwikudza kazwibiga iye nkulu mu midzimu yose ngono unowolebela Ndzimu we midzimu zwithu zwisakatongo hwiwa mu shango. Unowobhudilila kudzina bushongola gwe Ndzimu gwa n'delukila koga sekwa kwakayi kowoshingikala.

³⁷Aatobe ne hanya ne midzimu ya bobatategulu babe kene kuli kube ne hanya ne ndzimu unodiwa ne bakadzi, hwuti aatobe ne hanya ne midzimu mimwe koga unowozwituthumadza muili yose.

³⁸Koga mu bumo gwayo unowobe ne hanya ne ndzimu unobakilila mizi ye matizhilo, ndzimu usakatongo zibgwa ndi bobatategulu babe kaukudza nge siliva ne golide nenge mabgwe e ntengo upezhugwi.

³⁹Unowogwila matizhilo awe ngo shingisa bhatsho ye bathu banothigamila ndzimu we bataya. Unowokudza ibabo banonteta, kababiga mu mamo apezhugwi e butungamili ngono kabafupa nge kubakobela shango.

⁴⁰“Ngono nge tjibaka itjetjo bhelelo lowobe latjiswika, mambo we burwa unowonginilila mambo we bunandzwa koga mambo we bunandzwa unowonginilila se tjampupudze ezha nge koloyi dze ngwa ne mbizi ne zwikepe zwinjinji. Unowonginilila shango dzili njinji kadzitutudzila kutjena se vula ye nkubila.

⁴¹Unowonginililabo shango yakanaka,[2] kabulaya bathu bali banjinji koga shango dze Edomu ne Moabu ne malimbelimbe e Baamoni banowopudzumuka.

⁴²Ngono unowonginilila shango njinji naiyo Egipiti dumbu aingapudzumuke.

⁴³Unowokubulula golide ne siliva yose na zose zwe ntengo upezhugwi zwe Egipiti kakunda bose ne Libhiya ne Baitopiya.

⁴⁴Koga thawu dzinodwa ku bhezhuba ne ku bunandzwa dzowon'totomosa kwazo ngono kazhala bushongola ne kupinda kabulaya bathu banjinji.

⁴⁵Unowobambula nshasha we tante dze ntengo upezhugwi pakati kwe gungwa ne dombo lakanaka lakayengemala koga ndilo linowobe labe bhelelo lile akuna unowombhatsha.”