Read Kalanga Daniyele 4 Bible Online

Daniyele 4 - Kalanga bible

Daniyele 4

¹Mambo Nebukadineza kayisa ndayidzo ku bathu bose be zwitjaba ne njudzi ne bendimi dzakathubukana dzimu shango eti, “Mbakiso ngaibe namwi!

²Ndinge kushatha kukulu kuti ndimuzibise ngekwe matjenamiso makulu andakathamigwa ne Ndzimu Upezhugwi zhugwi.

³“Zwilakidzo zwawo kundili zwikulu seni! Matjenamiso awo makulu seni! Bushe gwawo nde gusingapele, mbuso wawo ugelile tjatjose kudwa mu tjizekugwana kunoti ku tjizekugwana.”

⁴“Imi Nebukadineza ndakabe ndili mu nzi wangu we bushe ndili gele ndina tjimwe ne tjimwe kakale ndakabhudilila.

⁵Koga ndakati limwe zhuba abe ne mawoloto akanditotomosa. Ndakati nditjakaizela mu bulawo gwangu, abona mbono dzinotjisa kwazo.

⁶Ndizo ndakadana balume bose bakatjenjela be Bhabhiloni kuti bazhe kundili bawonditjenesela mawoloto iyawa.

⁷Ngono kwakati be malipa ne ng'anga ne mashabi ne batjenjedu be nyenyedzi basinozha, ndakababudza ngekwe mawoloto angu koga bakasitubule kunditjenesela iwo.

⁸Ngono kwakati kubupelo kukazha Daniyele iye wakabe idang'wa Bheliteshazari, zina laakalongwa le ndzimu wangu, ngono ambudza mawoloto angu nditi,

⁹‘Bheliteshazari, she we bana malipa, ndoziba kuti meya dze midzimu yakayengemala imu kuli kakale unohwisisa masazibgwe wose. Ndiwo mawoloto angu iyawa undibudze kuti anodwani.’

¹⁰“Ndakati ndakaizela abona kulimile nti nkulukulu mbeli kwangu, nti iwoyu wakabe uli pakati kwe shango, nti iwoyu wakabe uli nlefulefu kunotjenamisa.

¹¹Nti iwoyu wakabe wakabhata ukula ukadza ukakutha ku makole ubong'wa ne mmwe ne mmwe mu shango.

¹²Nti iwoyu wakabe una mazhani akanaka ne mitjelo minjinji ili zojiwa zwe bathu bose mu shango. Phuka dze shango dzakabe dzibutha kusi kwawo, nyuni idzo dzakabaka mashaka adzo muuli zwitjili zose zwakabe zwija mitjelo yawo.

¹³“Ndakati nditji mu bulawo nditjakumbula ngekwe mbono idzedzi: “Ndakabona kuzha nlisi n'yengemali edelukuka edwa kudzimu.

¹⁴Wakadanilila nge hwi lipezhugwi eti, ‘Temani nti iwoyu, thubulani thabi dzawo upulule mazhani awo, paladzani mitjelo yawo! Tatilani kutjena phuka dzakabutha kusi kwawo ne nyuni dzakabaka mu thabi dzawo.

¹⁵Koga musiye bhato lawo lina midzi yalo. “ ‘Ngono mulisunge nge butale ne phangula, lisale pasi mu bushwa. Ngaahwigwe nge khawa ye zhuzhugwi, ngaagale mu shango ne phuka.

¹⁶Atshene moyo uwe we bunthu ukashanduka, atshene kapiwa moyo we phuka kwe makole ali kutendeka.

¹⁷Zibiso iyeyi yakabe idwa ku batjengeti, ili tjasungwa ndibo bakayengemala. “ ‘Kuti ndizo kubupelo bapenyu bazibe kuti Upezhugwi zhugwi ndiwo unobusa bathu bose ne bushe gose nde gugwe kakale unogupa waunoshaka kugupa ne bathu ibabo banolingigwa pasi dumbu.’

¹⁸“Ndidzo hwope dzandakabenadzo idzedzi imi Nebukadineza. Ndizoke iwe Bheliteshazari, tjinditjenesela kuti mawoloto iyawa anodwani ngoti akuna we batjenjedu be bushe gwangu watubula kunditjenesela hwope idzedzi koga iwe unotubula ngobe una meya ye midzimu yakayengemala mukuli.”

¹⁹Kudwapo Daniyele iye unodang'wa Bheliteshazari kasheta matama tjibaka tjifupi, nkumbulu uwe ukantjisa. Mambo kabe eti, “Bheliteshazari, hwope idzedzi ne tjeneso yadzo dzisitongo kutotomosa.” Bheliteshazari kashandula eti, “Tetshi wangu, tshene hwope idzedzi dzikabe dza ibabo bakamubenga ne tjeneso yadzo ibe ye zwita zwenyu kusi imwi!

²⁰Nti wamakabona nlefulefu ukutha ku makole, wakabe ubong'wa nge mmwe ne mmwe mu shango,

²¹mazhani awo akanaka una mitjelo minjinji wakabe una zojiwa zwe bathu bose mu shango ne phuka dze shango dzakabe dzibutha mu ntutshi wawo ne nyuni dzakabaka mashaka mu thabi dzawo unodwa sahwoku:

²²“Imwi bushe gwangu, mu nti iwoyu! Mabe nkulu kakale makasima, bukulu gwenyu bukulu gokutha ku zhuzhugwi ne bushe gwenyu gotendebukila mbizho dzose dze shango.

²³Imwi mambo makati mutjakalingilila kose ikoku, nlisi, n'yengemali kadeluka edwa kudzimu kati, ‘Temani nti muukolomodze koga musiye bhato lawo lakasungwa nge butale ne phangula pasi mu bushwa, ngaawigwe nge khawa ye zhuzhugwi, ngaatjile se phuka dze shango kudzina kwapinda makole ali kutendeka.’

²⁴“Tjeneso ya ikoku inodwa sa woku mambo wangu, i sumikiliso yalingisanyiwa imwi tetshi wangu mambo inodwa kuna Upezhugwi zhugwi:

²⁵Mowotatigwa kutjena ne bathu mukatjila ne phuka dze shango, mowoja bushwa se ng'ombe mukawigwa nge khawa ye zhuzhugwi. Ikoku kowotola makole ali kutendeka kudzina muamutjila kuti Upezhugwi zhugwi ndiwo nkulu kupinda mibuso yose ye bathu ne kuti kakale ndiwo unopa mbuso nthu wawada.

²⁶Ndaulo yekuti nti usiyiwe bhato lawo ne midzi kodwa kuti bushe gwenyu mowogubgwilizigwa apa matjiamutjila kuti bushe gwe kudzimu ndigo koga gunolaula.

²⁷Ndizo ngwenu mambo wangu, tshene mungaamutjila gumbuludzo langu kumuli lekuti letjani kutjinya muthame tjinoamutjilika, muletje bubi gwenyu mube ne lubu muna banotshambilidziwa. Ndiko koga kungathama kuti kubhudilila kwenyu kungadwilila.”

²⁸Kose ikoku kwakashingikalila Mambo Nebukadineza.

²⁹Kwakati shule kwe mimwedzi ili gumi lina mibili, mambo kabe eyenda yenda mu denga le ng'umba ye bushe mu Bhabhiloni,

³⁰ngono kabe eti, “Apa ate Bhabhiloni iwoyu nkulu zwingapa wandakabaka nge simba langu gulu kube bugalo gwa bomambo ne gudzo le bushe gwangu kene?”

³¹Wakati koga asathu aligila matama awe hwi likadwa kudzimu liti, “Mambo Nebukadineza ndakakubhatila matama awa: Wawotolegwa bushe gugo.

³²Unowotatigwa kutjena ne bathu ngono unowotjila ne phuka dze shango ukaja bushwa se ng'ombe. Ikoku kowoshingikala makole ali kutendeka kudzina waamutjila kuti Upezhugwi zhugwi ndiwo nkulu kupinda mibuso yose ye bathu ne kuti kakale ndiwo unopa mbuso nthu wawada.”

³³Matama iyawa kashingikala ipapo sekwa alebgwa ebudziwa Nebukadineza. Wakatatigwa kutjena ne bathu kaja bushwa se ng'ombe mbili uwe ukawigwa nge khawa kudzina mbethe uwe ukula usala unga misiba ye dzu, hwomba dzidze dzinga hwomba dze nyuni.

³⁴“Kwakati makole ali kutenda asinopinda, imi Nebukadineza alinga kudzimu, nkumbulo wangu ukabuya kundili ngono akudza Upezhugwi zhugwi, awukudza ndiwuteta iwo unotjilila tjatjose. “Ngobe simba lawo ndelinogalila tjatjose bushe gwawo ndegusingapele,

³⁵bagali bose be shango abate bali tjimwe, unoshinga kuda kwawo ne babhayani be ngwa be zhuzhugwi. Akuna ungauma mbeli kene kaudwa kati, ‘Mathamani?’

³⁶“Nge tjibaka itjetjo tjandakabuigwa nge nkumbulo wangu, tetiwa ne gudzo langu ne bushe gwangu zwikandibuyila. Makulukota ne bakumbuludzi bangu bakandiamutjila ngono apiwa bushe gwangu ngono ndikabe ne simba linopinda lekutanga.

³⁷“Ngono ngwenu imi Nebukadineza, ndokudza Mambo we kudzimu ngobe tjimwe ne tjimwe tjabanothama tjakalulwama ne zila dzabo dzose dzakatambunuka. Ngono unotubula yisapasi bose banozwikudza.”