Read Kalanga Daniyele 5 Bible Online

Daniyele 5 - Kalanga bible

Daniyele 5

¹Kwakati limwe zhuba Mambo Bhelishazari wakati kathamila makulukota awe ali tjiwulu (1 000) nzano we mabhikwa ngono kang'wa nkumbi we zhambi mbeli kwabo.

²Ngono kwakati Bhelishazari wakati wozipigwa nge nkumbi uwe we zhambi, kalaula kuti kuzhisiwe zwija zwe golide ne siliva zwakabe zwatogwa mu Ng'umba ye Ndzimu mu Jerusalema ndi Nebukadineza tate babe, kuti ndizo iye ne makulukota awe ne bafumakadzi babe ne balongwana babo bazwishingise ku ng'wila nkumbi we zhambi mu zwili.

³Ndizo bakazhisa zwija zwe golide zwakabe zwatogwa mu Ng'umba ye Ndzimu ku Jerusalema ndizo mambo ne makulukota awe ne bafumakadzi babe ne balongwana babe bakang'wa nazo.

⁴Bakabe beti beng'wa nkumbi we zhambi bakabe bakabhata bekudza midzimu yakathamwa nge golide ne siliva ne yakathamwa nge phangula ne yakathamiwa nge butale ne yakabezhiwa mu lukuni neye mabgwe.

⁵Tjinyolotjo kukaboneka zwinyala zwe nthu zwikwala mu guma pejo ne tjigadziko tje luvone mu ng'umba ye bushe, ngono Mambo kabona sekwa tjiazha tjakabe tjikwala mu guma.

⁶Ngekwa ikoku tjiso tja mambo tjikafubala, akatotomoka kwazo kwakathama kuti zwidwi zwizwe zwilobane ngotetema.

⁷Mambo kadana ng'anga ne mashabi ne batjenjedu nge hwi gulu ngono kati ku bali, “Iye unowotubula bala nkwalo iwoyu ngono kanditjenesela kuti ukatini unowoambadziwa hazu ye bushe ye bushaba gwakabondelela kaambadziwa ne itimbi mu ntshibha tjakathang'wa nge golide ngono kapiwa mamo e butatu kudwa pezhugwi mu mbuso.”

⁸Ipapo batjenjedu bose ba mambo bakazha koga bakasitubule kutjenesa tjakakwagwa kene kuli kubudza mambo kuti nkwalo unodwani.

⁹Ipapo Mambo Bhelishazari katotomoka kwazo ne tjiso tjitje tjikafubala kupindisa ngono bakumbuludzi babe bakasizibe kuti bangathama tjini.

¹⁰Mme ba mambo bakati behwa ndebeleko ya mambo ne makulukota awe bakazha kwakabe kwakabhatigwa nzano we mabhikwa bakabe beti, “Atshene mambo bangatjilila tjatjose! Usitotomoke, tjiso tjitjo ngatjisi fubale!

¹¹Kuna mmwe nlume mu bushe gugo una meya dze midzimu yakayengemala munli. Kwakati mu tjibaka tja tate babo kukawanika ana luzibo ne butjenjedu gunonga gwe midzimu. Tate babo Mambo Nebukadineza bakanthama she we be malipa ne ng'anga ne mashabi ne batjenjedu be nyenyedzi.

¹²Nlume iwoyu Daniyele, wakadang'wa Bheliteshazari ndi tate babo mambo, wakawanika ana luzibo ne hwisiso kakale etubula kutjenesa mawoloto ne kutjenesa malipa ne kupedzisa zwithu zwakasima. Danani Daniyele ngono unowozha kamutjenesela kuti nkwalo iwoyu unodwani.”

¹³Ndizo kukanodanigwa Daniyele mbeli kwa mambo ngono mambo kandwa kati, “Apa ndiwe Daniyele we bamwe bakatapiwa ndi tate kudwa ku Juda kene?

¹⁴Ndahwa kuti meya ye midzimu i mukuli ne kuti kakale una butjenjedu ne luzibo ne hwisiso inotjenamisa.

¹⁵Bakumbuludzi ne ng'anga bakadang'wa kuti bawondibalila nkwalo iwoyu ne kunditjenesela kuti unodwani koga bakong'wa kunditjenesela.

¹⁶Ngohwa kuti iwe unotubula kutjenesa zwithu ne kupedzisa zwithu zwakasimila bathu, ha ungatubula kubala nkwalo iwoyu ne kunditjenesela kuti unodwani, unowoambadziwa hazu ye bushaba gwakabondelela ukaambadziwa kakale itimbi mu ntshibha, ukapiwa mamo ukabe nlauli we butatu nge mamo kudwa pezhugwi mu bushe.”

¹⁷Ipapo Daniyele kashandula mambo eti, “Zwipo zwenyu ngazwibe zwenyu ne mbhailo wenyu muupe nthu upoga. Ne kwakajalo ndowomubalila tjakakwagwa kakale amutjenesela kuti nkwalo iwoyu unodwani.

¹⁸Mambo wangu, Ndzimu Upezhugwi zhugwi wakapa tate babo Nebukadineza bukulu ne simba ne gudzo ne tjedza.

¹⁹Ngoti Ndzimu wakabe wampa magalo apezhugwi, bathu bose ne zwitjaba zose ne bathu bose be ndimi dzose bakabe bentjila kule. Ibabo mambo baakabe eshakabulaya wakabe ebabulaya, ibaba baakabe eshakakubatjidza kabatjidza, baakabe eshakabapa mamo wakabe ebapa mamo, baakabe eshakathama kuti bazwiyise pasi wakabe ebayisa pasi.

²⁰Koga wakati ebe ne nsholo unopanda, akatungamidza mazwikudzo wakadusiwa mu bushe gugwe katolegwa ne gudzo lile.

²¹Wakatatigwa kutjena ne bathu kalongwa meya dze buphuka, wakabe egala ne madonki e shango eja bushwa se ng'ombe ne mbili uwe ukawigwa nge khawa ye kudzimu kudza eamutjila kuti Ndzimu Upezhugwi zhugwi ndiwo nkulu mu mibuso yose kakale unopa bushe mmwe ne mmwe waunoshaka.

²²Koga iwe nkololo uwe, auzozwiyisa pasi nenguba wakabe uziba kose ikoku,

²³wakapandukila tetshi we kudzimu, ukatola mu ng'umba yawo zwija zwe golide zwakazhisiwa ku kuli iwe ne makulukota awo ne bafumakadzi babo ne balongwana babo ngono mukang'wila nkumbi we zhambi mu zwili. Wakakudza midzimu ye golide ne siliva neye phangula neye butale neyakabezhiwa mu lukuni ne mabgwe, midzimu isingabone kene kuli kuhwa kene hwisisa. Auzoteta Ndzimu iwo wakabhata butjilo gugo ne nge zila dzidzo dzose.

²⁴Ndizoke, Ndzimu watumila luboko kukwala nkwalo iwoyu.

²⁵“Nkwalo wakabe kwakakwagwa kuyi, ‘MENE, MENE, TEKELE PHARASINI.’

²⁶Nkwalo iwoyu udwa kuti, MENE: Ndzimu wakabala mazhuba ekubusa kuko ngono watjiazhisa ku bupelo gwawo.

²⁷TEKELE: Wakabigwa mu tjilizanyo ngono kukawanika uli nlelu kwazo.

²⁸PHARASINI: Bushe gugo gwathubukanyiwa ngono kukapiwa bathu be Mede ne be Pheshiya.”

²⁹Ipapo Bhelishazari kalaula kuti Daniyele aambadziwe hazu ye bushaba gwakabondelela ne itimbi mu ntshibha tje golide ngono kukazibisiwa kuti wapiwa mamo e butatu mu bushe.

³⁰Busiku igogu Bhelishazari mambo we Bhabhiloni kabulawa

³¹ngono Dariyasi we Mede katola bushe ali makole ali makumi ali matathatu ana mabili (62).