Read Kalanga Daniyele 6 Bible Online

Daniyele 6 - Kalanga bible

Daniyele 6

¹Shule kwe kutola bumambo Dariyasi kabiga balauli bali zana lina makumi mabili (120) kuti bayendise ntuthu uwe wose,

²pezhugwi kwabo Dariyasi kashalula Daniyele ne bamwe babili kuti babe batungamili be balauli ne kulingilila kuti mambo atolashikigwa ne mimwiso iye.

³Ngono Daniyele katjimbidza azwilakidza kuti unotubula nshingo kupinda bamwe batungamili ne balauli kwakayita kuti mambo akumbule kumbiga nlingilili we ntuthu wose.

⁴Ngono ikoku kukathama kuti bamwe batungamili ne balauli bashake tjimwe tjingapinganyidza buyendisi gwa Daniyele koga bakatjishaya ngoti Daniyele wakabe egalikabgwe kakale asina meya dzakalelekela ntome.

⁵Ngono kwakati ku bupelo balume ibaba bakabe beti, “Akuna tjimwe tjakabipa tjatingalingisa Daniyele kuzhe kwe tjimwe koga mu nlayo we Ndzimu uwe.”

⁶Ndizo bakayenda bakanobona mambo bali gupo ling'ompela ngono bakaswika beti, “Mambo wedu Dariyasi, atshene mungatjilila tjatjose!

⁷Iswi tose batungamili ne makulukota ne balauli ne bakumbuludzi tadumana kuti mambo baduse nlayo babuye batshambilidze kuti mmwe ne mmwe unonamata ndzimu kene nthu kuzhe kwenyu imwi mambo mu mazhuba ali makumi matatu (30) anozha alashigwe mu gomba le shumba.

⁸Ndizo ngwenu mambo ngabaduse ndaulo babuye baisaine kuti ndizo ishingikadziwe kuyenda nge nlayo we Bamede ne Bapheshiya kuti ndizo usishandugwe.”

⁹Ndizo Dariyasi katshambisa ndaulo iyeyo.

¹⁰Ngono Daniyele wakati enoziba kuti ndaulo yasainiwa kayenda ku nzi uwe. Ng'umba iye yakabe yakatathikana ngono katathila pezhugwi ku tjing'umbana tjitje tjakabe tjina mafesitere akazhugwa kulingisana ne Jerusalema. Kanamata katatu mu zhuba akathigama ne zwidwi etembezela kakale eboka Ndzimu koga sekwa akabe egala ethama.

¹¹Ngono balume ibaba be zwita zwa Daniyele bakalibilidzila ku ng'umba ya Daniyele ngono bakaswika ben'wana atjatembezela ekumbila bhatsho mu Ndzimu.

¹²Ndizo balume ibaba bakayenda kuna mambo benotjeta Daniyele ngono bakaswika bedwa mambo beti, “Mambo wedu, apa amuzosaina ndaulo kuti mu mazhuba ali makumi matatu ani kene ani ungathigamila ndzimu kene nthu upoga kuzhe kwenyu alashingwe mu gomba le shumba kene?” Mambo bakashandula beti, “Ee ndakasaina na nasi ndaulo imili yakajalo, aingashandugwe sekwa kuli iko mu njendiso ye milayo ye Bamede ne Bapheshiya.”

¹³Ipapo bakadwa mambo beti, “Daniyele, mmwe we bakatapiwa edwa ku Juda aana tjimwe namwi kene nlayo wamakadusa bushe gwedu! Utjatembezela zwe katatu nge zhuba.”

¹⁴Mambo wakati ehwa ikoku, kadziyidzika kwazo kazwimisila kushaka zila ingadzutunula Daniyele, mambo kagwisa na kose kwaanako kudza zhuba limila.

¹⁵Kudwa ipapo zwita zwa Daniyele zwikabgwilila kuna mambo zwiswika zwiti, “Kumbulani bushe gwedu, mambo, kuti kuyenda nge yendiso ye nlayo we Bamede ne Bapheshiya ndaulo yadusiwa ndi mambo kaisainila aizofanila shandugwa,”

¹⁶Ndizo mambo kadusa ndaulo kuti Daniyele atogwe alashigwe mu gomba le shumba. Mambo kadwa Daniyele kati, “Atshene Ndzimu uwo iwo waunoshingila mazhuba wose ungakudzutunula!”

¹⁷Bakazwina gomba ne bgwe ngono mambo kabiga itempa tjitje tje bushe ne tje makulukota awe kulakidza kuti bgwe lisidusiwe ndizo kwakasheta iye wakandzutunula.

¹⁸Ipapo mambo kabgwilila ku ng'umba iye ye bushe ngono kanoizela ne ja asaja naizo zwinoshathisa zwisipo, azobona hwope busiku igogo.

¹⁹Mu mangwanana makulu mambo kabinduka kalibilidzila ku gomba le shumba.

²⁰Mambo wakati asedzela pa gomba kadana Daniyele kan'dana nge hwi lakafubala eti, “Daniyele, nlanda we Ndzimu unotjila, apa Ndzimu uwo waunoshingila mazhuba wose wakugwila mu shumba kene?”

²¹Daniyele kashandula eti, “Atshene mambo bangatjila tjatjose!

²²Ndzimu wangu watuma batumwa bawo be kudzimu bazha bebe bezhalila milomo ye shumba. Ndizo shumba adzizondikubadza ngoti ndawanika kusina tjandatjinya mbeli kwe Ndzimu kene mbeli kwenyu mambo wangu!”

²³Mambo kashatha kwazo ngono kadusa ndaulo kuti Daniyele adusiwe mu gomba le shumba. Ngono Daniyele wakati edusiwa wakawanika kusina ndodwa ne banga munli ngobe wakabe egalabgwe mu Ndzimu uwe.

²⁴Ipapo mambo kadusa ndaulo kuti kusungwe balume bose bakabe batjinya Daniyele zina ngono kukalashigwa ibo mu gomba le shumba bose ne bakadzi ne bana babo. Ngono bakati koga batji mu phepo shumba dzikabagama dzikabavunanya mafupa.

²⁵Ipapo Mambo Dariyasi kakwalila bathu bose ne zwitjaba zose zwe ndimi dzose mu shango eti, “Kunyalala ngakube namwi mose!

²⁶Ndodusa ndaulo kuti mu ntuthu wangu wose nthu mmwe ne mmwe wakafanila kuti atje ne kuteta Ndzimu wa Daniyele. “Ngobe Ndzimu unotjila, kakale ugelile tjatjose, bushe gwawo akuna ungagukolomodza, mbuso wabo nde usingapele.

²⁷Unogwila kakale ukatjidza, unothama makaabadzo ne matjenamiso kudzimu ne mu shango. Wagwila Daniyele mu simba le shumba.”

²⁸Ndizo Daniyele kabhudilila mu tjibaka tje mbuso wa Dariyasi ne tjibaka tje mbuso wa Sirasi mambo we Pheshiya.