Read Kalanga Daniyele 7 Bible Online

Daniyele 7 - Kalanga bible

Daniyele 7

¹Kwakati mu gole le kutanga la Bhelishazari ali mambo we Bhabhiloni, Daniyele wakabe akaizela mu bulawo gugwe kuli busiku ngono kawolota kakale kabona mbono. Ipapo Daniyele kakwala pasi mawoloto awe.

²Daniyele wakakwala eti, “Mu mbono yangu busiku ndakabona phepo nna dze kudzimu dzidzonga gungwa gulu.

³Ndakabona zwibandana zwikulukulu zwinna zwibhuda mu gungwa, bunna gwazo zwakabe zwisingafanane.

⁴Tjibandana tje kutanga tjakabe tjifanana ne shumba koga tjina mapapilo anonga e dzu. Ndakati ipapo ndakalinga mapapilo atjo kasimugwa. Tjibandana itjetjo tjakanyanyuligwa pezhugwi kudzina tjima nge makumbo mabili se nthu ngono tjikalongwa moyo we nthu.

⁵“Tjibandana tje bubili tjakabe tjilingika se phuka ye mawunde wunde inoyi bhira lubadu gumwe gwatjo gwakamilidzigwa pezhugwi tjakabe tjakaluma mbadu dzili thatu mu nlomo watjo dzili pakati kwe meno atjo, ngono tjikadwiwa kuyi, ‘Milika, ija nyama sekwa ungatubula!’

⁶“Kudwa ipapo ndakati ndilinga abona tjibandana tjimwe, itjo tjakabe tjilingika se ngwe. Mu ikamba tjatjo tjakabe tjina mapapilo manna anonga e nyuni. Tjibandana itjetji tjakabe tjina misholo ili minna ngono tjikapiwa simba kubusa.

⁷“Shule kwaikoku ndakabona mu mbono busiku, ndakabona tjibandana tje bunna tjili mbeli kwangu, tjakabe tjitjisa kwazo kakale tjina masimba. Tjakabe tjina meno e butale, tjipkhwapkhwata, tjitshamba tjizwiya kose kwakabe kwasala nge makumbo atjo. Tjakabe tjisiyana kwazo ne zwibandana zwimwe zwitatu, itjo tjakabe tjina nyanga dzili gumi.

⁸Ndakati nditjakumbula ngekwe nyanga idzedzo, ndikabona lunyanga gutukununu gumela pakati kwe nyanga idzedzo. Ngono nyanga thatu dzikasimugwa kuwanila lunyangana magalo. Lunyangana igogu gwakabe guna mesho anonga e nthu ne nlomo wakabe uleba mazwikudzo.”

⁹“Ndakati nditjakalingisisa abona kubigwa zwigalo zwe bushe ngono iye Wantolo kagala mu tjigalo tjitje tje bushe. Zwiambalo zwizwe zwakabe zwakatjena zwinga kapuku, mavudzi awe ali mabuya enga wulu. Tjigalo tjitje tje bushe tjakabe tjili bhuba le moto makumbgwana atjo ali mithuto ye moto,

¹⁰gwizi gwe moto guwunga gudwa mutjili. Zwiwulu ne zwiwulu zwe bathu zwakabe zwin'shingila. Lubazhe gukatangisa nshingo wago, hwalo dzikazhugwa.

¹¹“Ndakadwilila alingisisa ngoti ndakabe ndihwa lunyangana gwakabhata guleba matama e mazwikudzo. Ndakalingisisa kudza ndibona tjibandana tje bunna tjibulawa, mbili watjo ukalashigwa mu bhuba le moto tjikalobesiwa.

¹²Zwibandana zwimwe izo zwakatolegwa masimba azo ngono zwikaletjedziwa zwikatjila kwe tjibakana.

¹³“Mu mbono dzangu busiku ndakabona kuzha mmwe unolingika se nkololo we nthu ali pakati kwe makole e zhuzhugwi ngono kayenda kuna Wantolo ngono kama mbeli kukwe,

¹⁴ngono kapiwa bushe ne tjedza ne masimba ngono bathu bose ne zwitjaba zose ne njudzi dzose bakan'namata. Bushe gugwe nde gugelile tjatjose nge kusingapele tjose kakale bushe gugwe agutowofa gwakolomogwa.”

¹⁵Ngono ndakadziyidzika kwazo mu nkumbulo ngekwe mbono idzedzi ngoti dzakabe dzinditotomosa ngono imi Daniyele,

¹⁶ndakasedzela pa mmwe we bakabe bali mile thambgwana ngono ambuzwisisa tjingabe tjidwiwa nge mbono idzedzi. Ndizo wakandipa tjeneso nge buzhalo.

¹⁷Wakandidwa kati, “Zwibandana zwinna, mibuso minna inowomuka mu shango.

¹⁸Koga bayengemali be Upezhugwi zhugwi banowotola bushe ngono gowobe gwabo tjatjose nge malebeswa gowobe gwabo nge kusingapele kose.”

¹⁹Ngono ndakada ziba tjeneso ye tjibandana tje bunna, tjakabe tjisiyana ne zwimwe zwibandana kakale tjitotomosa kwazo tjina meno e butale ne matshimba dze phangula, tjibandana tjakapkhwapkhwata tjipkhwapkhwata, tjitshamba tjizwiya kose kwakabe kwasala.

²⁰Kakale ndakada ziba ngekwe nyanga dzili gumi dzakabe dzili mu nsholo watjo ne ngekwe lunyangana gwakamela pakati kwe mamwe guthama kuti mamwe matatu akolomoke, lunyangana gwakabe gulingika gukulila mamwe guna mesho anonga e nthu ne nlomo wakabe uleba matama e mazwikudzo.

²¹Ndakati ndakalingisisa lunyangana igogu gukagwa ne bayengemali ngono gukabakulila,

²²kudzina Wantolo ezha esumikilisa bayengemali be Upezhugwi zhugwi nekuti tjibaka tjatjiswika tjekuti bayengemali batole bushe.

²³Ngono wakandipa tjeneso inoti, “Tjibandana tje bunna mbuso we bunna unowomuka mu shango. Unowobe usiyana ne mimwe yose ngono unowolobesa shango yose ukaizwiyila pasi.

²⁴Nyanga dzili gumi dzimilile bomambo bali gumi banowobepo mu bushe igogu. Kudwa ipapo kowomuka mambo usingafanane na ibabo be kutanga, unowokunda bomambo ibabo batatu.

²⁵Unowoleba kusakanaka ngekwe Upezhugwi zhugwi ngono katshambilidza bayengemali kakale kagwisa kushandula zwibaka zwakabigwa ne milayo. Bayengemali banowobe pasi kukwe kwe tjibaka tje makole matatu ana gaswa.

²⁶Ngono koga lubazhe gowogala, simba la mambo iwoyu unowolitolegwa tjatjose.

²⁷Ipapo simba le bushe gose mu shango lowopiwa bayengemali bathu be Upezhugwi zhugwi. Bushe gugwe gowobe bushe gunogalila tjatjose ne babusi bose banowon'thigamila bakanteta.”

²⁸Eli ndilo bhelelo le ndebeleko iyeyi. Imi Daniyele ndakadziyidzika kwazo kwakadzina kukathama kuti ndisale ndakafubala ngono azwibigila kose ikoku.