Read Kalanga Daniyele 9 Bible Online

Daniyele 9 - Kalanga bible

Daniyele 9

¹Mu gole le kutanga le mbuso wa Dariyasi nkololo wa Ahasurusi wakabe ali N'mediya ngo zwagwa ngono kabusa bathu be Bhabhiloni,

²mu gole ilelo ndakati nditjimukushaka kuhwisisa hwalo dzakayengemala ngekwe makole akalebgwa nge nlebesambeli Jeremiya aapiwa ndi Yahwe, kuti alebe kuti Jerusalema inowobe dongo kwe makole ali makumi ali kutendeka (70).

³Ndizo ndakashandukila kuna Yahwe Ndzimu ndibakumbila nge ntembezelo ne kuzwinyima zojiwa ne kuambala jila le saka ne kuzwizhodza nlota.

⁴Ndakatembezela abudza Yahwe Ndzimu wangu ndileba jinyo ledu nditi, “Awu Yahwe imwi Ndzimu nkulu, imwi munolondolodza tjidumano tjenyu ne ludo gusingazunguzike kuna ibabo bose banobhulutana milayo yenyu,

⁵takatjinya, takapambuka mu zila. Takamuthamila mbipo tikamupandukila tikafupatila milayo yenyu,

⁶atizoteedza balanda benyu balebesambeli ibo bakabe belebeleka na bomambo bedu ne makulukota edu na bobatategulu bedu nenge bathu bose be ntuthu belebeleka bali pasi kwe zina lenyu.

⁷Imwi tetshi wedu makalulwama koga iswi Bajuta ne bathu bose be Jerusalema ne Baiziraela bose bapejo ne bakule ne shango dzose dzamakatipaladzila ko takalengudzika tiyitiwa nge zwatakathama.

⁸Awu Yahwe, iswi na bomambo bedu ne makulukota edu na bobatategulu bedu takalengudzika ngoti takamutjinyila.

⁹Tetshi wedu, Ndzimu wedu una ngoni kakale unozwiibhatigwa nenguba tikaupandukila,

¹⁰tikasiubhulutane kene kuli kulondolodza milayo yawo yawakatipa nge balanda bawo balebesambeli.

¹¹Baiziraela bose bakatjuluka nlayo wenyu bakamufupatila, bakalamba tjose kumuteedza. Ndizo ke ngwenu bhiso lose ne sumikiliso dzose dzakakwagwa mu nlayo wa Mushe nlanda wenyu dzapitshigwa ku tili ngoti takamutjinyila.

¹²Matama enyu amakaleba nge kwedu ne nge kwe balauli bedu kuti mowotidelusila tjiga tjikulu aazowila pasi. Akuna mu shango tjakatongoshingikala tjinonga tjakashingikalila Jerusalema.

¹³Koga sekwa kwakakwagwa mu nlayo wa Mushe tjiga itjetji tjatishingikalila ngono atitobona kusheteka tingashaka lubu gwa Yahwe Ndzimu wedu kuti tingashandukila matjinyo edu tikalingisana ne lebeswa lenyu.

¹⁴Ndizo Yahwe bakalulwamisa mbatsha ngono badzidelusila mutili ngoti Yahwe Ndzimu wedu bakatambunuka mu tjimwe ne tjimwe tjabanothama koga takakong'wa nge kubateedza.

¹⁵“Ngono ngwenu Yahwe Ndzimu wedu, imwi makadusa bathu benyu mu shango ye Egipiti nge simba lenyu lisishoma mukabuya mukazwithamila zina limile na nasi, tozha pa muli titi takatjinya, takathama tjisakalulwama.

¹⁶Awu Yahwe imwi munolondolodza bululwami gwenyu, buzani moyo ngekwe Jerusalema nzi wenyu nkulu ne dombo lenyu lakayengemala. Zwibi zwedu ne matjinyo a bobatategulu bedu akathama kuti Jerusalema ne bathu benyu babe madado kuna ibabo bakatipoteleka.

¹⁷Ndizo ke imwi Ndzimu wedu ihwani mitembezelo yangu ne kukumbila kwangu imi nlanda wenyu. Nge kwenyu Tetshi wangu ibeni nge lubu mu bugalo gwenyu gwakayengemala igo gwatjibe dongo.

¹⁸Teyani zebe Ndzimu wangu muti hweni, zhulani mesho enyu mubone nzi wakasenga zina lenyu sekwa wabe dongo, atitomukumbila ngobe tili balulwami aa hwuti ndingekwe ngoni dzenyu ndizo tikumbila.

¹⁹Mutiteedze kaa tetshi wedu! Tetshi wedu kaa mutizwiibhatigwe! Tetshi wedu kaa hwililani ngono muthame tjimwe ngekwako! Nge kwenyu Ndzimu wangu, musinonoke ngoti nzi wenyu nkulu ne bathu benyu ndibo bakasenga zina lenyu!”

²⁰Ndakati nditjalebeleka nditembezela, ndileba matjinyo angu ne matjinyo e bathu bangu Baiziraela ndikumbilila dombo lakayengemala muna Yahwe Ndzimu wangu kuti balibgwilize mu tjimo,

²¹ndakati nditjatembezela Gabhariyele nlume wandakatongobe ndabona mu mbono kutanga, kazha pandakabe ndilipo elibilidza, kwakabe kuli tjibaka tje kunozhisiwa zwibhayilo zwe madekwana.

²²Ngono wakandidwa eti, “Daniyele, ndazha kowokupa butjenjendu ne kukupa hwisiso ngekwe mbono iyeyi.

²³Wati koga utangisa kutembezela dabilo ikabe yabhuda kale, ndiyo yandazha kuwokubudza iyo ngobe uli nthu unodika kwazo. Ndizo ke ngwenu bhulutana uhwisise mbono iyeyi.

²⁴“Makole ali makumi ali kutendeka akawatshiwa katendeka tjibaka tje Ndzimu tjawakabiga kuti unowosunungula bathu bawo ne nzi nkulu wawo mu jinyo ne mu tjibi, unowothama gadzanyo muna bathama bubi, kuzhisa ndulamo isingapele kuti ndizo mbono ne bulebesambeli igogu zwishingikale ne kuzhodza bugalo gwakayengemala kupindisa.

²⁵Ziba kakale uhwisise woku: Kudwa mu tjibaka tjakadusiwa ndaulo kuti kumusiwe Jerusalema kuswikila wakazhodziwa ezha, kowobe kwapinda makole ali makumi ali kutendeka akawatshiwa ne ali makumi ali kutendeka. Jerusalema inowomusiwa koga mu misi yakasima.

²⁶Ngono kowoti shule kwe tjibaka itjetjo wakazhodziwa unowobulawa. Bathu be nlauli unotobela banowozha bakakolomodza nzi nkulu ne bugalo gwakayengemala. Bhelelo ilelo lowozha se vula ye nkubila lowozha ne ngwa ne golomodzo lakalulwamisiwa kale.

²⁷Wakazhodziwa iwoyu unowothama tjidumano tjakasima ne bathu banjinji kwe makole ali kutendeka ngono kowoti gwamu le tjibaka itjetjo lapinda unowomisa zwibhayilo ne zwipo kuti zwisitjadusiwe. Ku tjilungwani tje Ng'umba ye Ndzimu unowobiga tjimwe tjakabipa ngono tjowogalila tjatjose ipapo kudzina iye wakatjibiga elobesiwa ne Ndzimu koga sekwa wakagala wakanlulwamisila.”