Read Kalanga Hoseya 1 Bible Online

Hoseya 1 - Kalanga bible

Hoseya 1

¹Dama la Yahwe lakazha kuna Hoseya nkololo wa Bheeri mu misi ye kubusa kwa Uziya nekwa Jothamu nekwa Ahazi nekwa Hezekiya bomambo be Juda ne mumisi ye kubusa kwa Jeroboamu nkololo wa Joashi mambo we Iziraela.

²Yahwe bakati betangisa kulebeleka ndi Hoseya, bakati kuna Hoseya, “Yenda ulobole nkadzi we fukula ube ne bana be bufukula ngoti shango izhele bupombgwe bukulu nge kusiya Yahwe.”

³Ndizo kayenda kanolobola Gomeri nkololokadzi wa Dibulamu ngono kazwisenga katshibama mwana we tjilisana.

⁴Ngono Yahwe bakadwa Hoseya bakati, “Un'dane zina uti Jezirele[1] ngoti ndowoloba shamu ng'umba ya Jehu tjinyolotjo ndinlobela kubulaya kwaakathama ku Jezirele ngono ndowopedzisa bushe gwe Iziraela.

⁵Mu zhuba ilelo ndowovuna dati le Iziraela mu nkuku wa Jezirele.”

⁶Kazwisenga kakale ngono kawana nkololokadzi. Ipapo Yahwe bakati kuna Hoseya, “Umpe zina uti Loruhama[2] ngoti anditjawohwila ngoni Baiziraela kene kuli kubazwiibhatigwa.

⁷Koga ndowohwila ngoni mbuso we Juda abatjidza imi, anditowobatjidza nge dati kene nge thumo kene nge ngwa kene nge mbizi kene nge bataswi be mbizi, koga ngekwa Yahwe Ndzimu wabo.”

⁸Gomeri wakati athwisa Loruhama zhamu, Gomeri kazwisenga kawana mwana we tjilisana.

⁹Ngono Yahwe bakati, “Untumile uti Loammi[3] ngoti imwi amutemuli bathu bangu nami anditeli Ndzimu wenyu.”

¹⁰“Koga Baiziraela banowowanda kulizana ne nsetje we gungwa usingake ukalizanyidziwa kene ukabagwa. Ngono mu magalo abakadwiwa kukayi ‘Imwi amute muli bathu bangu,’ banowodang'wa, ‘Bakololo be Ndzimu unotjila.’ ”

¹¹Bathu be Juda ne bathu be Iziraela banowoshanganyiwa, ngono bakazwishalulila ntungamili ng'ompela. Ngono banowowanda mu shango ngoti zhuba la Jezirele lowobe gulu.