Read Kalanga Hoseya 10 Bible Online

Hoseya 10 - Kalanga bible

Hoseya 10

¹Iziraela wakabe enga nzhambi wakapasula, unozwala zhambi dzawo. Mitjelo iye yakati iwanda kawatsha zwibeso zwizwe zwe zwibhayilo se shango iye yakabe ibhudilila kanakisa zwifano zwizwe zwe mabgwe.

²Moyo wabo uzhele kutjebela, ndizo wali bakafanila kusengana ne nlandu wabo. Yahwe banowokolomodza zwibeso zwabo bakabuya bakakolomodza zwifano zwabo.

³Ipapo banowoti, “Atina mambo ngoti takalengudza Yahwe. Koga ne tabe tina mambo wabe wootishingilani?”

⁴Banoleba matama asina nshingo, bebe betuna manyepkhwa bethama zwidumano, ikoku kube kudana kusumikilisana kunozha se madishwa mabiibi mu ngolo dze nnda.

⁵Bagali be nzi we Samariya banotja, betjila pholombe ye Bheti Aveni. Bathu bawo banowoyililila ne bapirisiti bawo banonamata zwifano banowolilila gudzo layo labasiya.

⁶Ifano nge kwatjo tjowosengegwa ku Asiriya, tjili tjipo kuna mambo nkulu. Ifureimi unowobhakhwa nge shoni, Iziraela unowobhatigwa nge shoni zwifano zwakabezhiwa.

⁷Mambo we Samariya inowokolomodziwa, unowonga gwati lakaangama mu vula.

⁸Manamatilo a pezhugwi e Aveni, tjibi tje Iziraela tjowokolomogwa. Mihwa ne zwikungubo zowomela pezhugwi kwe zwibeso zwabo zwe zwibhayilo. Ipapo banowodwa matombo bakati, “Mutizwimbe!” Bebe bedwa matuthu beti, “Mutiwile!”

⁹Kwetjinga kwe mazhuba e Gibiya wakatjinya iwe Iziraela, makalambilako. Apa ngwa ayitowo mukulila mu Gibiya?

¹⁰Pandingada ndowobaloba, njudzi dzowobakubunganila kugwa nabo kubasungila zwibi zwabo zwapaphidzika kabili.

¹¹Ifureimi wakabe ali pholombe yakatebamiswa yakabe ida kushokola, ndakatjengeta ntshibha uwe wakanaka koga ndowothama kuti Ifureimi atshindunule pasi, Juda wakafanila lima, Jakubo wakafanila kulima.

¹²Muzwidzwaligwe ndulamo, muvune ludo gusingapele, tshindunulani pasi pasathu pakaling'wa ngoti tjibaka tje kushaka Yahwe kuti bazhe banise ndulamo pezhugwi kwenyu.

¹³Makalima mukadzwala mbipo, mukaivuna mbipo, muja ntjelo we kutjebela. Se makabiga mu masimba enyu ne mu bunji gwe babhayani benyu.

¹⁴Ndizo phipiti ye ngwa inowonginilila bathu benyu, kunowothama kuti matizhilo enyu wose akolomogwe Shalimani sekwa akathukudza Bhetiarubhele mu zhuba le ngwa bomme pabakapkhwanyigwa pasi ne bana babo.

¹⁵Ndiko sekwa kunowokushingikalila iwe Bhetele, kuyikhwa nge bubi gugo. Zhuba ilelo lowoti linoshwa mambo we Iziraela unowobe abulawa.