Read Kalanga Hoseya 11 Bible Online

Hoseya 11 - Kalanga bible

Hoseya 11

¹Iziraela wakati atji mwana an'da, nkololo wangu an'dana ku bhuda mu Egipiti.

²Koga andibadana kwazo, ndiko kwabanoyenda tjose kule nami, bebe bebhayila bo Bhaale zwibhayilo bepisila midzimu ye zwifano motsha.

³Koga ndimi ndakadiya Ifureimi kuyenda ndibathamisa tendemana, koga abatoziba kuti ndimi ndakabapodza.

⁴Ndakabakweba nge mitjili ye lubu gwe buthu, ndibakweba nge misungo ye ludo. Ndakadusa jokwi mu mitshibha yabo ngono hakotama kubapatjika zojiwa.

⁵Abatowobgwilila ku Egipiti, koga Asiriya inowobe mambo wabo ngoti bakalamba kushandukila ku ndili.

⁶Thumo lowolila mu mizi yabo mikulu lowokolomodza phanda dze mikoba yabo, thumo lowolila nge mabaka e ndongoloso dzabo.

⁷Bathu bangu bakazwimisila kundifupatila, nenguba bedana Upezhugwizhugwi haangabakudze.

⁸Ndinga kutoboka tjini Ifureimi? Ndinga kulasha tjini Iziraela? Ndinga kuthama se Adima tjini wali? Ndinga kuthama se Zeboyimi tjini? Moyo wangu washanduka mundili, ngoni dzangu dzakula mukuli.

⁹Anditowoshingikadza bushongola gwangu gunotjisa, kene kuli kolomola Ifureimi. Ngoti ndi Ndzimu ate ndili nthu, ndi Wakayengemala pakati kwenyu. Anditowozha ndakagwadza moyo.

¹⁰Banowotobela Yahwe, iye unowobomba se shumba. Unowoti ebomba, bana babe banowozha betetema kudwa ku golombedzo.

¹¹Banowozha betetema se nyuni kudwa ku Egipiti, se njiba kudwa ku shango ye Asiriya. Ngono ndowobagadza mu mizi yabo, kojalo Yahwe.

¹²Ifureimi wakandikomba nge manyepkhwa, Baiziraela ibo nge kutjebela. Koga Juda utjayendayenda ne Ndzimu, unogalika moyo kuna Wakayengemala.