Read Kalanga Hoseya 12 Bible Online

Hoseya 12 - Kalanga bible

Hoseya 12

¹Ifureimi wakalisa phepo, unotatamila phepo ye kubhezhuba zhuba lose, bebe bewatsha manyepkhwa ne kumukilana. Unothama nshanganyila ne Asiriya, ebe etumila mafuta e thoba ku Egipiti.

²Yahwe bana nlandu wabanopa Juda, banowoloba Jakubo shamu kuyendidzana ne mipanga iye bebe benlipa kuyendidzana ne mija iye.

³ Mu tjibumbilo wakabhata nkulu uwe nge itshitshino, kati abe nlume kadzulana ne Ndzimu.

⁴Wakadzulana ne ntumwa we kudzimu kakunda, kalila kakumbila makombolelo. Kashangana naye ku Bhetele, ngono kalebeleka naye ikoko.

⁵Yahwe Ndzimu Masimbawose, zina labo ndi Yahwe!

⁶Koga iwe bgwilila ku Ndzimu uwo, usimise mu ludo nemu ndulamo, ulindile Ndzimu uwo usinganyale.

⁷Nseyenyi unoshingisa zwilizanyo zwisiizo unoda kutjebela.

⁸Ifureimi unozwikudza eti, “Ahaa ndakafuma, ndakazwikubunganyila fumwa. Mu fumwa yangu yose iyeyi, akuna nlandu wabangawana ungabe tjibi.”

⁹Ndimi Yahwe Ndzimu uwo, kudwa ku shango ye Egipiti, ndowothama kuti mugale mu mishasha kakale se mu misi ye mizano yenyu yakabigwa.

¹⁰Ndakalebeleka ne balebesambeli, ndimi ndakawatsha mibono adiya nge zwifaniso ndibo.

¹¹Bubi guyapo mu Giliyadi, bathu bako abateli tjimwe. Mu Giligala banothama zwibhayilo zwe mikono. Zwibeso zwabo zowonga matuluthulu e mabgwe mu ngolo dze nnda.

¹²Jakubo wakatizhila ku shango ya Aramu, ngono ikoko Iziraela kashingila kuwana nkadzi, malobolo awe akabe kulisa pkhwizi.

¹³Yahwe bakashingisa nlebesambeli kuzhisa Iziraela edwa ku Egipiti, bakashingisa nlebesambeli kuntjengeta.

¹⁴Koga Ifureimi wakanditanga kwakabipa, ndizo wali Yahwe banowonkhiga nlandu we kutebula malopa ngono banowonlipa nge kulengudzika.