Read Kalanga Hoseya 13 Bible Online

Hoseya 13 - Kalanga bible

Hoseya 13

¹Ifureimi wakabe eti ha elebeleka, balume banotetema, wakabe akakudziwa mu Iziraela. Koga wakabe ne nlandu we kunamata Bhaale ngono kafa.

²Ngono ngwenu banotjinya bepaphulula, bezwithamigwa midzimu ye zwifano nge siliva, beithama nge bunyambi gwabo, kose kuli mishingo ye babezhi. Banoti, “Muzwi bhayile zwibhayilo.” Bathu bebe beputa midzimu ye ifano tje phulu.

³Ndizo wali banowofanana ne fulele ye mangwanana, befanana ne khawa inoshashamuka mangwanana, benga bunye gunowuluka gudwa panoshokolegwa, se busi gunobhuda nge fesitere.

⁴Ndagala ndili Yahwe Ndzimu wenyu koga kudwa ku Egipiti. Akuna mmwe Ndzimu wamunga ziba usi imi, akuna mmwe Ntjidzi andisi imi.

⁵Ndakamuziba amutjengeta mu tjilambanyika mu shango yakawomelela.

⁶Ndakati ndibapa zojiwa bakagutshika, bakati beguta bakazwida ipapo bakandikangang'wa.

⁷Ndizo wali ndowobanginilila se shumba, ndowoyedza ngwe ndibalalila pa zila.

⁸Ndowobatjulukila se bhira yatolegwa bana bayo, ngono ndowomwandawula bhetelo le moyo wabo. Ndowobaja se shumba, se tjibandana tjingabamwawulanya.

⁹Iwe Iziraela ndowokukolomodza, ndiani ungakubhatsha kene?

¹⁰Ungayi mambo uwo, kuti akutjidze? Bangayi batungamili babo mu mizi iyo yose bawakati nge kwabo, “Mundipeni mambo ne batungamili?”

¹¹Ndaka kupa mambo mu kugwadza moyo kwangu, ngono mu bushongola gwangu an'dusa.

¹²Jinyo la Ifureimi lakasungiligwa, tjibi tjitje tjakabiganyiwa.

¹³Zwibhayo zwinonga zwe kutshibama zonzhila, koga iye nkololo usakatjenjela. Ha tjibaka tjiswika aatosedzela pa nkoba we tjibumbilo.

¹⁴Ndowobadzutunula mu masimba e ikumbu, ndowobadzutunula mu lufu. Iwe lufu zwibhayo zwizo zwingayi? Iwe ikumbu kukolomodza kuko kungayi? Imi anditjawobe ne ngoni.

¹⁵Kene angabhudilila pakati kwe bana ba tate babe, phepo yeku bhezhuba inowozha idwa kuna Yahwe itutudza idwa mu tjilambanyika. Misenya iye ye vula inowopela ne tshime lile lowopkhwa. Fumwa imu dula lile inowotapiwa, kose kwakanaka kumulili.

¹⁶Samariya inowosengana ne jinyo layo, ngoti yakapandukila Ndzimu wayo. Inowoligwa nge thumo, ngawana dzayo dzowopkhwanyigwa pasi, bakazwisenga muili banowopalugwa mitumbu.