Read Kalanga Hoseya 14 Bible Online

Hoseya 14 - Kalanga bible

Hoseya 14

¹Shanduka iwe Iziraela, shandukila kuna Yahwe Ndzimu uwo, kana wakaligwa nge tjibi tjitjo.

²Yendani muna matama mubgwilile kuna Yahwe, muswike muti ku bali, “Mutizwiibhatigwe matjinyo edu wose, mutiamutjile nge ngoni ndizo tiduse tjibhayilo tje tjipo tje milomo yedu.

³Asiriya ayingatitjidze, atitowotaswa mbizi. Atitjawobe tingatjati, ‘Midzimu yedu,’ tidwa zwakathamiwa nge maboko edu. Mu muli siyang'wa inowana ngoni.”

⁴Ndowolapa kuzwilasha kwabo ngono abada ndakasununguka, ngoti kugwadzamoyo kwangu kwapela mu bali.

⁵Ndowonga khawa kuna Iziraela, unowothinila se luba linoyi lili. Unowofana miti ye Lebanoni, midzi iye inowonginila pasi.

⁶Thabi dzidze tjetjana dzowokula dzikapasula, bubuya gugwe gowonga gwe mitoba, nnuhwo uwe unowozipa ukanga we Lebanoni.

⁷Unowogala kakale mu ntutshi wangu, ngono unowopasula se thunde. Unowothinila se nzhambi, kazibika se nkumbi we zhambi we Lebanoni.

⁸Iwe Ifureimi, apa ndingashingani nge zwifano? Ndowon'dabila abuya antjengeta. Ndofanana ne nsipuri unogala una mazhani matshwa, mitjelo yenyu inodwa mundili.

⁹Ndiani wakatjenjela? Iye unowohwisisa zwithu izwezwi. Ndiani unothubukanya? Iye unowozwihwisisa. Ngoti zila dza Yahwe dzakalulwama, balulwami banoyenda mudzili koga bapanduki banokuthiwa mudzili.