Read Kalanga Hoseya 2 Bible Online

Hoseya 2 - Kalanga bible

Hoseya 2

¹“Bakulu babo be tjilume uti ku bali, ‘Bathu bangu’ ku hazwadzi dzidzo uti, ‘Bahwigwazogwadza.’ ”

²“Tjemelani mme benyu, mubatjemele, ngoti ate bali nkadzi wangu nami atendili nlume wabo. Ngabaduse ndingo ye bufukula mu tjiso tjabo, ne bupombgwe baguduse pakati kwe mazhamu abo.

³Kusajalo ndowobaambula bakasala basakambala ndibathama mbujo kufanana ne zhuba labakazwagwa, ndowobathama bakanga tjilambanyika, ndibashandula bebe shango yakatshwa nge zhuba, ndibe ndibabulaya nge nyota.

⁴Anditowohwila zogwadza bana babe, ngoti bana be bupombgwe.

⁵Ngobe mme babo abazotongogalikabgwe babakazwisenga nge mabhatisa shoni. Ngobe bakazwidwa bakati, ‘Ndowotobela badiwa bangu, ibo banondipa zojiwa zwangu ne vula yangu, banondipa wulu yangu ne jila langu ne mafuta angu ne tjing'o tjangu.’

⁶Ndizo ikweno ndowozwina zila yabo nge mihwa, ngono ndowobaka guma linobadzibila, kuyita kuti basitongo bona zila dzabo.

⁷Banowolonda badi babo koga bakasitongobabhata, banowobashaka koga bakasibabone. Ipapo banowoti, ‘Ndobgwilila ku nlume wangu we kutanga, ngoti ndakabe ndiyita kupinda ngwenu.’

⁸Abatoziba kuti ndimi ndakabapa mathunde ne nkumbi we zhambi ne mafuta, kuti ndimi ndakabe ndimbutitikila siliva ne golide zwabakashingisa muna Bhaale.”

⁹Ndizo wali ndowotola mathunde angu pa kuvung'wa, ne nkumbi we zhambi mu tjibaka tjawo. Ndowotola wulu yangu ne jila langu, zwababe bakafanila kusungila.

¹⁰Ndowobambula mbeli kwe badi babo bakasala bali mbujo mu mesho abo, akuna ungabagwila mu maboko angu.

¹¹Ndowomisa kushatha kwabo kose, mizano yabo ye gole ne gole neye Mwedzi ugala, na bo Sabata babo, mizano yose yakabigwa.

¹²“Ndowothukudza mizhambi yabo ne mipaya yabo yabakati ngekwayo ‘Ikoku i ndipo yangu yandakapiwa ne badi bangu.’ Ndoyithama ishakana, ngono phuka dze shango dzowoyija.”

¹³Ndowobalobela mazhuba e mizano yaakathamila bo Bhaale be bapisila motsha, bezwinakisa nge mang'ina ne ndalama, besalana shule ne badi babo imi bendikangang'wa, koleba Yahwe.

¹⁴“Ndizo wali bonani ndowobawonga abayisa ku tjilambanyika, abe ndilebeleka nabo nge ludo.

¹⁵Kudwa ikoko ndowobagwilizila minda yabo ye mizhambi, ngono ndowothama Nkuku wa Akhori nkoba we kugalabgwe. Ikoko banowondiamutjila sekwa bakathama mu mazhuba e butjetjana gwabo, se mu mazhuba abakabhuda mu shango ye Egipiti.

¹⁶“Mu zhuba ilelo, koleba Yahwe, unowondidana uti, ‘Nlume wangu,’ autowobe utjati, ‘Bhaale wangu.’

¹⁷Ndowodusa mazina abo Bhaale mu nlomo wabo, mazina abo aatjowofa adang'wa kakale.

¹⁸Mu zhuba ilelo ndowobathamila tjidumano ibo ne phuka dze shango ne nyuni dzinowuluka ne zwibumbiwa zwinokambayila pasi. Dati ne thumo ne ngwa ndowozwipedza mu shango, ndizo kuti mose mowogala nge kusununguka.

¹⁹Ndowokubigilidza nge kusingapele, ndowokubigilidza nge ndulamo nenge kutambunuka mu ludo gusingazunguzike nenge mahwilongoni.

²⁰Ndowokubigilidza nge kugalikabgwe, ngono unowoziba Yahwe.

²¹“Mu zhuba ilelo ndowodabila koleba Yahwe, ndowodabila kudzimu, kudzimu kowodabila shango,

²²ngono shango inowodabila mathunde, nkumbi ne mafuta, izwezwi zowodabila Jezirele.

²³Ndowobazwidzikilila mu shango, ndowohwila ngoni bandakadana nditi, ‘Handitjowohwila ngoni.’ Ngono ndowodwa bandakadana nditi, ‘Amute muli bathu bangu,’ nditi ‘Mu bathu bangu,’ ngono ibo banowoti, ‘Imwi mu Ndzimu wangu.’ ”