Read Kalanga Hoseya 5 Bible Online

Hoseya 5 - Kalanga bible

Hoseya 5

¹Ihwani woku imwi bapirisiti! Bhulutanani imwi Baiziraela! Teedzani imwi be ng'umba ye bumambo! Ngoti kusumikilisiwa kwakalingisana namwi, ngoti makabe muli bhuzhu ku Mizipha, muli gwanga gwakawagwa pezhugwi kwe Tabori.

²Bapanduki bakangina bakapelela mu kubulaya, koga ndowobaloba shamu bose.

³Imi ndoziba kose nge kwa Ifureimi, Iziraela naiye aazosumbikika. Ngoti iwe Ifureimi iwe wanginikana nge bufukula, Iziraela yatemapala.

⁴Mishingo yabo ayitobadumila kubgwilila ku Ndzimu wabo. Ngoti meya ye bufukula imukati kwabo, abatoziba Yahwe.

⁵Kuzwida kwa Iziraela kotendeka nge kwabo, Ifureimi naiye unoligwa nge tjibi tjitje Juda naiye unowa nabo.

⁶Banowoyenda ne ngubi dzabo ne matanga e ng'ombe kunoshaka Yahwe, koga abatowobabona ngoti bakazwidusa mubali.

⁷Abatogalikabgwe kuna Yahwe, ngoti bakazwala bana be zwamba. Ndizo wali Nzano wabo we Mwedzi ugala unowobaja kose ne minda yabo.

⁸Lidza lunyanga mu Gibiya, lunyanga ngagulile mu Rama. Mima ye ngwa ngayihwike mu Bhetiaveni! Bashule kuko iwe Bhenjamini!

⁹Ifureimi inowothukudziwa mu nsi we kusumikilisiwa. Tjandinoleba mu njudzi dze Baiziraela, ndoleba tjili malebeswa.

¹⁰Batungamili be Juda banofanana ne bathu banodusa tjilakidzo tje n'gathu. Ndowobanginilila nge bushongola gwangu se gubakube le vula.

¹¹Ifureimi wakatshambilidzwa, wakatshambigwa pasi mu kusumikilisiwa, ngoti wakazwimisila kutobela midzimu.

¹²Ndonga sole kuna Ifureimi, ndonga ndakabola ku bathu be Juda.

¹³Ifureimi wakati ebona bugwele gugwe, Juda iye ebona mabanga awe, ipapo Ifureimi kayenda ku Asiriya kushaka bhatsho muna mambo. Koga aatotubula kukulapa kene kupodza mabanga awo.

¹⁴Ngoti ndowonga shumba kuna Ifureimi, anga shumbana ku bathu be Juda. Imi, ndowobamwawulanya abe ndiyenda zwangu, ndowobasenga ngono akuna ungabagwila.

¹⁵Kudwapo ndowobgwilila ku magalo angu kuswikila beduma nlandu wabo. Ngono banowondishaka banowondishaka kwazo bali mu kudziyila kwabo.