Read Kalanga Hoseya 6 Bible Online

Hoseya 6 - Kalanga bible

Hoseya 6

¹Buyani, ngatishandukileni kuna Yahwe, ngoti ndibo bakatimwawulanya, ngono banowotipodza, bakatikubadza, ngono banowozwimba mabanga edu.

²Shule kwe mazhuba mabili banowotimusidzila mu zhuba le butatu banowotimusa, kuti titjilile pabali.

³Ngatizibeni Yahwe, ngatimuseni meya kuziba Yahwe. Kuzha kwabo ku malebeswa se kubhuda kwe zhuba, banowozha kutili se vula, se vula ye tjibodza mashanga mu shango.

⁴Ndingashingani nawe kene Ifureimi? Ndingashingani nawe kene Juda? Ludo gugo gofanana ne fulele inotjimbidza pela, gonga khawa ye mangwanana inoshashamuka.

⁵Ndizo wali ndowomuthubulila nge balebesambeli ndikamubulaya nge matama e nlomo wangu, kusumikilisa kwangu kozha ku muli se lupenyo.

⁶Ngoti tjandinoshaka ludo gusingazunguzike, kusi tjibhayilo kuziba Ndzimu pana kupinda zwipo zwinopisiwa.

⁷Koga bakatjinya tjidumano sa Adamu, bakandishetela kugalabgwe ikweno.

⁸Giliyadi nzi nkulu we bathu babiibi unashambgwa ye matshambo azhele malopa.

⁹Se batoleli bebgwatilila nthu, makoko e bapirisiti anothamabo saikoko. Banobulaya mu zila ye Shekemu bethama milandu inobhatisa shoni.

¹⁰Ndakabona tjakabipa mu bathu be Iziraela. Ikweno Ifureimi wakazwipa mu bufukula ngono Iziraela yatemapala.

¹¹Nawebo, iwe Juda, nsi we kuvuna wakawubigigwa. Ndowobe ndibgwiliza makombolelo e bathu bangu.