Read Kalanga Hoseya 8 Bible Online

Hoseya 8 - Kalanga bible

Hoseya 8

¹Longa lunyanga mu nlomo ugulidze! Dzu lowuluka pezhugwi kwe ng'umba ya Yahwe ngoti bathu bakatjinya tjidumano tjangu ngono bakatjuluka nlayo wangu.

²Iziraela unondidana eti, “Imwi Ndzimu wedu, tomuziba!”

³Iziraela wakalamba tjakanaka, ngono tjita tjonlonda.

⁴Bakabiga bomambo kuzhe kwangu, bakabiga makulukota basadumana nami. Bakatola siliva yabo ne golide yabo bakazwithamigwa midzimu inowozhisa golomodzo ku bali.

⁵Samariya, lashila kutjena ndzimu uwo we ifano tje phulu! Bushongola gwangu gwakalingisana nayo. Kowotola tjibaka tjingapani basingatubule kube babuyanana kene?

⁶Kana inodwa mu Iziraela, Phulu iyeyi yakabezhiwa nge mbezhi ate ili Ndzimu. Inowopkhwanyiwa ikabe zwiyenga iyeyije phulu ye Samariya.

⁷Kana bakadzwala phepo, ngono banowovuna tjampupudze. Akuna lushanga gumile akuna tjiako, akuna pangadwa bgwisa. Ha kwabe kungadusa bgwisa bataya babe bowoguja.

⁸Iziraela yamidziwa, ngwenu wali bapakati kwe njudzi se tjija tjisina nshingo.

⁹Ngoti bakayenda ku Asiriya, banonga donki ye shango inoyendayenda yoga Ifureimi wakazwitengesa ku badi.

¹⁰Nenguba bakazwitengesa mu zwitjaba, ngwenu ndowobakubunganya. Tjinyolotjo banowotangisa kutshinda kusi kwe mitolo yabanosengeswa ndi mambo wakasima.

¹¹Nenguba Ifureimi akabaka zwibeso kupisila zwibhayilo zwe tjibi, koga zwibeso izwezo zwikabe zwe kuthama tjibi.

¹²Ndakankwalila kuli kunjinji kwe nlayo wangu, koga kotogwa se tjithu tjisingazibgwe.

¹³Kene bendipa zwibhayilo zwibuya, beja nyama yazo, koga abatoshathisa Yahwe. Ndizo banowokumbula mbipo yabo bakabalobela zwibi zwabo. Banowobgwilila ku Egipiti.

¹⁴Iziraela wakakangang'wa Mbumbi uwe ngono kabaka ng'umba dze bumambo, Juda iye kawatsha mizi mikulu ye matizhilo. Koga ndowotumila moto mu mizi yabo mikulu ngono inowoja matizhilo abo.