Read Kalanga Hoseya 9 Bible Online

Hoseya 9 - Kalanga bible

Hoseya 9

¹Usishathe iwe Iziraela! Usishongozhele se dzimwe njudzi. Kana wakafupatila Ndzimu uwo, unoda mbhayilo we bufukula pa lutombo gumwe ne gumwe.

²Lutombo ne maswinilo e nkumbi we zhambi azwingajise bathu, nkumbi ntshwa unowopela.

³Abatowogala mu shango ya Yahwe, Ifureimi unowobgwilila ku Egipiti, ngono mu Asiriya banowoja zojiwa zwakatemapala.

⁴Abatowotebulila Yahwe tjing'o tje nkumbi we zhambi, naiko zwibhayilo zwabo azwingashathise Yahwe. Zwibhayilo zwakajali zonga zojiwa zwe tjililo, bose banozwija banowotemapala. Zojiwa izwezwi nge zwabo koga, azwitowongina mu ng'umba ya Yahwe.

⁵Mowothamani mu zhuba le mizano yenyu yakabigwa, nenge mu zhuba le nzano wa Yahwe?

⁶Ngoti nenguba bangaleya golomodzo, Egipiti inowobakubunganya, ngono Memifisi unowobatshila. Kungubo tjowomela pabakabiga fumwa yabo ye siliva, kowomela mihwa mu mishasha yabo.

⁷Mazhuba ekulobgwa shamu atjiswika, mazhuba ekupa mbhayilo wakalingisana atjiswika. Iziraela inowoziba ikoku! Nlebesambeli tjilengwe, nlume we meya unopenga ngekwe jinyo lenyu gulu ne lubengo gwenyu bukulu.

⁸Nlebesambeli ntjengeti wa Ifureimi etjengetela Ndzimu, koga matati e nteyi mu zila dzidze dzose ne lubengo gumu ng'umba ye Ndzimu uwe.

⁹Bakanyungila mu mbipo se mu mazhuba e Gibiya. Ndzimu banowokumbula bubi gwabo ngono bakabalobela zwibi zwabo.

¹⁰Iziraela ndakati ndiyiwana, yakabe inga nzhambi we tjilambanyika. Ndakati ndibona bobatategulu benyu, angandinobona phaya dzabidwa kutanga mu mpaya nge tjibaka tjadzo kutanga. Koga bakati beswika pana Bhaale we Pheori, bakazwipa mu ndzimu ihwoyu we ifano unobhatisa shoni bakasala be shimika saikoku kuthu kwabakada.

¹¹Gudzo la Ifureimi lowowuluka se nyuni, akutowobe ne kutshibama kene kuzwisenga.

¹²Nenguba bangalela bana, ndowobulaya kukasiite wasala. Yee mme wee bapalala, ha ndibafupatila!

¹³Ndakabona Ifureimi efanana ne Tire, akadzwagwa mu magalo akanaka. Koga Ifureimi banowozwalila bana babo kubulawa.

¹⁴Yahwe, mubape, mowobapani kene? Mubapeni zwibumbilo zwinowosheta, ne mazhamu asina gwamu.

¹⁵Bubi gwabo gose gwakatangisa ku Giligala, ndiko kwandakatangisa kubabenga ikweno. Ngoti ngekwe mishingo yabo mibiibi, ndowobatatila kuzhe kwe ng'umba yangu. Andingatjabade nge tjimwe tjibaka, batungamili babo bose bapanduki.

¹⁶Ifureimi wakajiwa ndi pongwe, midzi yabo yakawoma, abana mitjelo yabanodusa. Nenguba betshibama bana, ndowobabulaya kene bedika zwabo ku bali.

¹⁷Ndzimu wangu unowobalamba, se basakandihwilila, banowobe bapalali pakati kwe njudzi.