Read Kalanga Jowele 1 Bible Online

Jowele 1 - Kalanga bible

Jowele 1

¹Dama la Yahwe lakazha kuna Jowele, nkololo wa Phetuwele.

²Teedzani imwi bathuntana! Zhulani zebe mose bagali be shango iyeyi! Apa kwakatongo shingikala kwakajali mu misi ye bupenyu gwenyu, kene mu misi ye bupenyu gwa bobatategulu benyu kene?

³Budzani bana benyu ngekwako, bana benyu babudzebo bana babo, bana be bana benyu babudzebo bana babo.

⁴Kwakasiyiwa ne zwiwong'wani phashu dzakaja. Kwakasiyiwa ne phashu magutegute akaja. Kwakasiyiwa ne magutegute phashwana dzakaja.

⁵Mukani imwi zwidakwa, mulile! Kuwani mose imwi bang'wi be nkumbi we zhambi! Kuwani ngobe matolegwa nkumbi unozipa pa milomo.

⁶Itjaba tjakasima tjangina nge ngwa mu shango yangu. Tjina masimba ne bunji gusibunji, tjina meno anonga e shumba, matungashulo atjo anonga e shumbakadzi.

⁷Tjakathukudza mizhambi yangu, tjakakumba mipaya yangu. Tjakasubula makwati tjikaalashila pasi, thabi dzayo dzatjisala dzili tjena.

⁸Lilani se phokosha yakazwipomba nge jila le saka, ili mu tjililo ngekwe nlume wakabe akambigilidza.

⁹Tjipo tje mathunde ne tjipo tje tjing'o, zwakadzibisiwa kuyisiwa ku Ng'umba ya Yahwe. Bapirisiti bashingili ba Yahwe, banolila.

¹⁰Minda yathukudzika yabe makula, ne pasi panolila, ngekuti mathunde akathukudziwa, nkumbi we zhambi unozipa wakapela, mafuta e ntoba akapela.

¹¹Sunamwani imwi balimi, lilani imwi balimi be nnda we mizhambi, mulilile koroni ne mathunde e bhali, ngobe minda yakafa.

¹²Mizhambi yakafa, mipaya yakawoma, pomegiranati, nlala ne apuli, miti yose imu nnda yakawoma. Ee, nenge bathu bapelegwa nge shatho.

¹³Muzwipombe mulile imwi Bapirisiti, lilani imwi bashingili be tjibeso tjinopisigwa zwibhayilo. Izhani bashingili be Ndzimu wangu, mupitshe busiku makazwipomba nge jila le saka, ngobe tjipo tje mathunde ne tje tjing'o zwakadzibisiwa mu Ng'umba ye Ndzimu wenyu.

¹⁴Muzwimisile kuzwinyima zojiwa! Danani gubungano lakayengemala! Kubunganyilani sholotjena ne bagali bose be shango, ku Ng'umba ya Yahwe Ndzimu wenyu, ngono mulilile kuna Yahwe.

¹⁵Yee mme wee, ilelo zhuba! Zhuba la Yahwe lasedzela. Lozha se golomodzo linodwa ku Ndzimu Masimbawose.

¹⁶Apa zojiwa azwizoshandusiwa mu mesho edu ne kushatha ne ipepkhwe mu Ng'umba ye Ndzimu wedu kene?

¹⁷Mbewu inoputa ili kusi kwe mavinga, ng'umba dze mabiganyilo dzowa. Matula akapkhwanyika, ngobe mathunde akafa.

¹⁸Zwithuwo zogomela seni! Ng'ombe dzakadzimila koga, ngobe kusina fulo, nenge ngubi ye pkhwizi inodziyila.

¹⁹Ndolilila kumuli, Yahwe, ngobe moto wakapedza fulo mu shango, nthuto ukapisa miti yose ye shango.

²⁰Nenge phuka dze shango dzomulilila, ngobe hwobana dzakapkhwa ne moto wakapedza fulo mu shango.