Read Kalanga Jowele 3 Bible Online

Jowele 3 - Kalanga bible

Jowele 3

¹“Ndizo bonani! Mu misi iyeyo ne tjibaka itjetjo, tjandinobuzila Juda ne Jerusalema thundu,

²ndowokubunganya zwitjaba zose, ndowozwidelusila ku guku la Jehoshafati. Ndowobasumikilisa ikweno ngekwe bathu bangu, lukata gwangu Iziraela, ngobe bakabapaladza nge zwitjaba, kakale bakakobana shango yangu.

³Bakakandila bathu bangu, beteetshanya mbisana nge fukula betengesa mwanadi nge nkumbi we zhambi, ngono bakaung'wa.

⁴ “Apa muni kundili kene, imwi Tire na Sidoni ne mituthu yose ye Filisitiya? Apa kuna tjamunondibgwilizilila tjandakathama kene? Ha kuna tjamunondibgwilizilila, ndowomubgwilizila tjamakathama tjinyolotjo.

⁵Ne kuti makanditolela siliva yangu ne golide yangu, makatutila thundu yangu mbuya mu ng'umba dzenyu dze midzimu.

⁶Makatengesela Magiriki bathu be Juda ne Jerusalema, mubayisa kule kule ne shango yabo.

⁷Bonani, ndowobadzonga kuti badwe mu magalo amakabatengesa kuali, amubgwilizila tjamakathama.

⁸Ndowotengesela bathu be Juda bakololo ne bakololokadzi benyu. Banowobatengeselabo bathu be Sheba itjaba tji kule kule.” Kwaleba Yahwe.

⁹Zibisani zwitjaba kuthu ikoku: Muzwilulwamisile ngwa. Musani balume bakasima, balume be ngwa basedzele pejo baitange.

¹⁰Thulani zwikara zwe mapadza enyu makanu, mipanga inosunulila miti ibe mathumo. Usakasima ati, “Ndakasima.”

¹¹Tjimbidzani muswike, imwi zwitjaba kupoteleka, muzwikubunganye ipapaje. Yahwe, delusilani babhayani benyu ko.

¹²“Zwitjaba zwizwimuse, zwizhe ku guku la Jehoshafati. Ndiko kwandinowogala ndisumikilisa zwitjaba zose, kupoteleka kose.

¹³Longani mpanga, mathunde akabidwa. Nginani mutshambe, ngobe panokobolegwa zhambi pazhele, makamba anotutuma, ngobe mbipo yabo yapindilila.”

¹⁴Mibungabunga ye bathu, mu guku linotolegwa thambo, ngobe zhuba la Yahwe labe pejo, mu guku linotolegwa thambo.

¹⁵Zhuba ne mwedzi zowotizwi, nyenyedzi dzowotundubala.

¹⁶Yahwe banobomba kudwa mu Ziyoni, hwi labo lodwa mu Jerusalema. Pezhugwi na pasi kowotengenyeka. Yahwe banowobe mbakililo ye bathu babo, dizhilo le bathu be Iziraela.

¹⁷“Ipapo mowoziba kuti imi Yahwe Ndzimu wenyu, ndogala mu Ziyoni, dombo langu lakayengemala. Jerusalema unowoyengemala, zwita azwitjoupalama kakale.

¹⁸Mu zhuba ilelo, matombo anowodotha nkumbi we zhambi unozipa, matuthu anowowunga nkaka, wobana dzose dze Juda dzowobe dziwunga vula. Nsenya unowowunga udwa mu Ng'umba ya Yahwe, unodilidzila guku le Shitimu.

¹⁹“Egipiti inowobe dongo, Edomu inowobe tjilambanyika tjisingamele tjimwe, ngobe bakathamila bathu be Juda phipiti, bakatebula lopa lisina nlandu mu shango yabo.

²⁰Koga Juda unowogaligwa tjose, ne Jerusalema kunoti ku zwizekugwana zose.

²¹Kutebula malopa kwabo, kwandisakazwiibhatigwa, ndowokuzwiibhatigwa.” Yahwe banogala mu Ziyoni.