Read Kalanga Amosi 1 Bible Online

Amosi 1 - Kalanga bible

Amosi 1

¹Awa matama a Amosi mmwe we balisi be Tekowa, ngekwe tjaakabona ngekwe Iziraela mu mazhuba a Mambo Uziya we Juda ne mu mazhuba a Mambo Jeroboamu nkololo wa Joashi we Iziraela, makole mabili mbeli shango isathu ikatengenyeka:

²“Yahwe banobomba kudwa mu Ziyoni, hwi labo lohwika kudwa mu Jerusalema. Mafulilo e balisi anokwakwalala, pezhugwi kwe Dombo le Karimeli kowoma.”

³Yahwe banolebeleka bakati, “Ngekwe matjinyo akatathikana e bathu be Damasiko, andingashanduse shamu yangu, ngoti bakakwiya bathu be Giliyadi nge zwileyi zwe tshipi.

⁴Ndizo ndowotumila moto ku ng'umba ya Mambo Hazaele, ngono unowoja matizhilo a Bhenihadadi.

⁵Ndowokwamula zwiberabero zwe nkoba we Damasiko alobesa bagali be Nkuku we Aveni ne wakabhata ludozo gwe bushe mu Bhetedeni. Bathu be Siriya banowobe batapiwa ku Kiri.” Koleba Yahwe.

⁶Yahwe banolebeleka bakati, “Ngekwe matjinyo akatathikana e bathu be Gaza, andingashanduse shamu yangu, ngoti bakatapa bunji gwe bathu bakagupa Edomu.

⁷Ndizo ndowotumila moto ku mbako dze Gaza, moto unowoja matizhilo awo.

⁸Ndowolobesa nlauli we Ashidodi na iye wakabhata ludozo gwe bushe mu Ashikeloni. Ndowobhayana ne Ekironi ne malimbelimbe e Bafilisitiya anowoloba.” Koleba She Yahwe.

⁹Yahwe banolebeleka bakati, “Ngekwe matjinyo akatathikana e bathu be Tire, andingashanduse shamu yangu, ngoti bakatapa bunji gwe bathu bakagupa Edomu, ngono bakasikumbule bukamu gwabo.

¹⁰Ndizo ndowotumila moto ku mbako dze Tire, moto unowoja matizhilo awo.”

¹¹Yahwe banolebeleka bakati, “Ngekwe matjinyo akatathikana e bathu be e Edomu, andingashanduse shamu yangu, ngoti wakatatamila nkololo wa tate babe nge thumo, kasitongobe ne mahwilongoni, ngono kadzikila mu kugwadzamoyo kukwe kalambila mu bushongola gugwe tjose.

¹²Ndizo ndowotumila moto ku Temani, ngono unowoja matizhilo e Bhozira.”

¹³Yahwe banolebeleka bakati, “Ngekwe matjinyo akatathikana e bathu be Amoni, andingashanduse shamu yangu, ngoti mu ngwa dzabo dzekupaphidza migathu yabo, bakaviya bakadzi bakazwisenga mu Giliyadi.

¹⁴Ndizo ndowopisa nge moto mbako dze Rabha, moto unowoja matizhilo awo, kowobe ne mima inonga ye ngwa ne matutu,

¹⁵mambo wabo unowotapiwa, iye ne hadzasha dzidze.” Koleba Yahwe.