Read Kalanga Amosi 2 Bible Online

Amosi 2 - Kalanga bible

Amosi 2

¹Yahwe banolebeleka bakati, “Ngekwe matjinyo akatathikana e bathu be Moabu andingashanduse shamu yangu, ngoti bakapisa mafupa a mambo we Edomu akasala ali nlota.

²Ndizo ndowotumila moto ku Moabu, ngono unowoja matizhilo e Keriyoti. Bathu be Moabu banowofila pakati kwe phipiti, pakati kwe mima ye ngwa ne kulila kwe lunyanga.

³Ndowobulaya mbusi wawo ne hadzasha dzawo.” Koleba Yahwe.

⁴Yahwe banolebeleka, bakati, “Ngekwe matjinyo akatathikana e bathu be Juda, andingashanduse shamu yangu, ngoti bakalamba nlayo wangu, abazolondolodza ndaulo dzangu, koga bakapambusiwa nge manyepkhwa iwo zwawo akabe akasagwa shule ndi bobatategulu babo.

⁵Ndizo ndowotumila moto ku Juda, ngono unowoja matizhilo e Jerusalema.”

⁶Yahwe banolebeleka bakati, “Ngekwe matjinyo akatathikana e bathu be Iziraela, andingashanduse shamu yangu, ngoti banotenganya balulwami nge siliva, bakatenganya bashayi nge shangu.

⁷Banotshambilidza bashayi se banotshamba mavu e shango, belambila bathu banyolo ndingisano dzabo, nkololo na tate babe banowalilana thobo ne mwanadi nng'ompela betjinya zina langu lakayengemala.

⁸Banopituka ne zwitiko pa hwunde ne zwibeso zwe zwibhayilo zwimwe ne zwimwe, bakawala zwiambalo zwatolegwa bana milandu bakongwa ngolipa, beng'wa nkumbi we zhambi wabatolela banobakolota, beng'wila mu ng'umba ye Ndzimu wabo.

⁹“Ngekwenyu ndakalobesa Baamori, ibo bathu bakakula se mikosho, bakasima se mibgweti, ndakabalobesa se miti yadzikunugwa ikaligigwa pasi.

¹⁰Pezhugwi kwa ikoku, ndakamudusa mu shango ye Egipiti, amutungamila makole ali makumi manna mu tjilambanyika kuti munothuwa shango ye Baamori.

¹¹Ndakashalula bamwe be bakololo benyu kube balebesambeli, ne bamwe be bazhuzha benyu abathama Banaziri.[1] Apa ate malebeswa kene Baiziraela?” Koleba Yahwe.

¹²“Koga makathama Banaziri kuti bang'we nkumbi we zhambi, mukadwa balebesambeli mukati, ‘Musitongotja leba zwimbeli.’

¹³Ndowomuzwiyila pasi mu bugalo gwenyu se kunozwiya kara i zhele mathunde.

¹⁴Bana lubilo banowokong'wa ngotizha, bana matatabuko banowopelegwa nge masimba, ne babhayani bana masimba abangagwile butjilo gwabo.

¹⁵Ibabo bakabhata matati ne misebe abangame, bana lubilo abangazwitjidze, kene bakatatha mbizi abangagwile butjilo gwabo.

¹⁶Babhayani bana zwilopa banowongwangwamala balashila zwibhayano zwabo kutjena mu zhuba le sumikiliso.” Koleba Yahwe.