Read Kalanga Amosi 3 Bible Online

Amosi 3 - Kalanga bible

Amosi 3

¹Ihwani matama awa anolebgwa ndi Yahwe nge kwenyu, imwi bathu be Iziraela, imwi ludzi gose gwabakadusa mu shango ye Egipiti,

²“Ndimwi moga bandakaziba mu misha yose ye shango, ndizo ndowomulobela zwibi zwenyu zose.”

³Apa babili bangayenda bose kuzhe kwe badumana kene?

⁴Apa shumba ingabomba mu ishaka, yamusa kene? Apa shubana ingabomba mu zwimba isakabhata tjimwe kene?

⁵Apa nyuni ingabhatshigwa kusateiwa kene? Apa dati lingalabhuka lisina tjalinobhata kene?

⁶Apa lunyanga gungalila mu nzi nkulu bathu bakasitje kene? Apa mbipo ingawila nzi nkulu isazhisiwa ndi Yahwe kene?

⁷Tjoselele She Yahwe akuna tjimwe tjabangathama basazumbunulila balanda babo ibo balebesambeli.

⁸Shumba yabomba, ndiyani usingake katja kene? She Yahwe balebeleka, ndiani usingowolebesambeli kene?

⁹Mimililani ku matizhilo e bushe gwe Ashidodi ne ku matizhilo e bushe gwe Egipiti, muti, “Kubunganani pezhugwi kwe matombo e Samariya, mubone phipiti hwulu imukati kwayo ne kutshambilidzana ku muili.

¹⁰“Banokubunganyila thundu mu matizhilo abo dzabatola nge simba nenge bupitipiti. Abatoziba shinga tjakalulwama ibabo,” koleba Yahwe.

¹¹Ndizo She Yahwe bakati, “Tjita tjowokomba shango, ngono tjowomukulila, matizhilo enyu e bushe anowotapiwa.”

¹²Yahwe banolebeleka bakati, “Nlisi unoti kazhwabula makumbo mabili, kene itibhu tje zebe mu nlomo we shumba, ndizo Baiziraela bamwe banogala mu Samariya banowotjidziwabo saikoko, bakabhata gwamu le bulawo kene le tjigalo tjinopobedzeka.[2]

¹³Ihwani ikoku, mutendeke ngekwe ng'umba ya Jakubo.” Koleba She Yahwe, Ndzimu Masimbawose.

¹⁴“Mu zhuba landinowoloba Iziraela ngekwe zwibi zwizwe, ndowoloba zwibeso zwe zwibhayilo zwe Bhetele, nyanga dze tjibeso tjinopisigwa zwibhayilo dzowothubugwa dzikawila pasi.

¹⁵Ndowokolomodza ng'umba dzenyu hwulu ne thumba dzenyu ne ng'umba dzenyu dzakanakisiwa nge nyanga dze zhowu dzowokolomogwabo.” Koleba Yahwe.