Read Kalanga Amosi 4 Bible Online

Amosi 4 - Kalanga bible

Amosi 4

¹Ihwani matama awa, imwi bakadzi be Samariya bapezhugwi, imwi bakakola se ng'ombe dze Bhashani, imwi munodziyidza bashayi, mukatshambilidza banosheta, imwi munodwa balume benyu muti, “Zhisani busukwa ting'we!”

²She Yahwe batuna ngoyengemala kwabo beti, “Tjibaka tjowozha kwakwako kwamunowokwebiwa nge zwihweko, bana benyu bekwebiwa nge zwihweko zwe hwobe.

³Mmwe ne mmwe wenyu unowobhuda nge mikhwe imu guma paakalingisana napo, ngono mowolashigwa ku Harimoni.” Koleba Yahwe.

⁴“Yendani ku Bhetele munotjinya, yendani ku Giligala munowatsha kutjinya kwenyu. Zhisani zwibhayilo zwenyu mangwanana mamwe ne mamwe ne zwe bugumi shule kwe mazhuba matatu mamwe ne mamwe.

⁵Zhisani tjipo tje kuboka tje tjiwunga tjina mbidzo, mumimile muzibise bathu ngekwe zwipo zwenyu zwe moyontjena, muzwikudze ngekwako, imwi Baiziraela ngoti ikoku ndiko kwamunoda kukushinga.” Koleba She Yahwe.

⁶“Ndakazhisa bhamba mu mizi mikulu yose ne kusheteka kwe zojiwa mu magalo enyu wose, nenguba kwakajalo, amuzoshandukila kundili.” Koleba Yahwe.

⁷“Ndakamunyima vula kwasala mwedzi mitatu kuti kuvung'we. Ndakanisa vula mu nzi mmwe, koga anyima mmwe. Anisa vula mu nnda mmwe, koga anyima mmwe, ngono wandakanyima ukawoma.

⁸Bathu bakazwikweba bedwa mu nzi mmwe beyenda ku mmwe beshaka vula koga bakasitongowana yakalizanila kung'wa, nenguba kwakajalo, amuzoshandukila kundili.” Koleba Yahwe.

⁹“Ndakaloba minda yenyu ne mizhambi yenyu ndakailoba nge wuzwi nenge zwimbubgwi. Phashu dzakaja mipaya yenyu ne mitoba yenyu. Nenguba kwakajalo, amuzoshandukila kundili.” Koleba Yahwe.

¹⁰“Ndakamutumila bugwele gunonga gwandakatumila ku Egipiti, ndakabulaya bazhuzha benyu nge thumo, ndakatapa mbizi dzenyu, athama kuti kunuhwa kwe mishasha yenyu kungine mu zwimilo zwenyu. Nenguba kwakajalo, amuzoshandukila kundili.” Koleba Yahwe.

¹¹“Ndakalobesa bamwe benyu, sekwa ndakalobesa Sodoma ne Gomora. Bakasala bakabe benga isikalala tjadzamugwa mu moto kuti tjisipelele. Nenguba kwakajalo, amuzoshandukila kundili.” Koleba Yahwe.

¹²“Ndizo wali tjandinowomoshingila etji, imwi Baiziraela, ngono se ndowomushingila ikoku wali, lulwamisilani shamu ye Ndzimu inozha, imwi Iziraela!”

¹³Bonani, woyu unobumba matombo, kathama phepo. Unozibisa bathu mikumbulo iye, unoshandula masikati kabe busiku. Unotshamba mu magalo apezhugwi e shango. Yahwe, Ndzimu Masimbawose, ndilo zina lile!