Read Kalanga Amosi 5 Bible Online

Amosi 5 - Kalanga bible

Amosi 5

¹Ihwani matama awa andinoleba nge kwenyu, Baiziraela, ndimulilila.

²Wanyalala mwanadi Iziraela, aangatjalebeleke kakale! Ulele mu shango iye akalashiwa. Akuna ungammusa.

³Etji nditjo tjinolebgwa ndi She Yahwe beti, “Nzi wadusa babhayani bali tjiwulu (1 000) mu Iziraela, kunobhayana unowosaligwa nge bali zana (100) ling'ompela, wadusa bali zana unosaligwa nge bali gumi koga.”

⁴Etji nditjo tjinolebgwa ndi Yahwe ku Baiziraela beti, “Izhani kundili mutjile.

⁵Musiyende ku Bhetele, musingine mu Giligala, kene kuli ku Bheerisheba, ngoti Giligala unowotapiwa, Bhetele unowolobesiwa.”

⁶Izhani kuna Yahwe mutjile, kusajalo banowozha bepisa pisa Iziraela se bhuba le moto, moto iwoyo unowopisabo Bhetele ngono akuna unowoudzima.

⁷Imwi munoshandula lebeswa likababa, mukalashila ndulamo kutjena.

⁸Ibo bakathama nyenyedzi dze Tjiyendan'gwi ne dze Ngulube, banoshandula zhalima lakatizwititi likabe mangwanana, bakashandula masikati bakaathama busiku. Ibo banodana vula dze gungwa bakadzitebulila mu shango. Yahwe ndilo zina labo,

⁹ibo banolobesa bakasima, bakakolomodza matizhilo akasima.

¹⁰Imwi munobenga iye unotjemela pa lubazhe, mukashima banoleba malebeswa,

¹¹se mutshamba bashayi mukabatolela mathunde, kene makabaka ng'umba dze mamo nge mabgwe akabezhiwa, amutowogala mudzili. Kene mukalima minda ye mizhambi yakanaka, amutowong'wa nkumbi yayo.

¹²Ngoti ndoziba kuti matjinyo enyu mangana ne kuti zwibi zwenyu zwingapani. Imwi munodziyidza balulwami, mukatengwa, mukalambila bashayi lebeswa lakabalingisana mu mabazhe.

¹³Ipapo ntjenjedu unowonyalala mu tjibaka itjetjo, ngoti tjibaka tjakabipa.

¹⁴Shingani ndulamo, musithame mbipo, ndizo mutjile. Ipapo Yahwe Ndzimu Masimbawose banowobe namwi sekwa munoleba.

¹⁵Bengani mbipo, mude ndulamo, mulondolodze lebeswa mu mabazhe, pamwe Yahwe Ndzimu Masimbawose banowohwila ngoni malimbelimbe e Iziraela.

¹⁶Ndizo She Ndzimu Masimbawose, Yahwe bakati, “Kowobe ne guwo mu zila dzose ne zwililo zwinogwadza mu mashanganilo. Balimi banowodanigwa kulila, ne nyambi dze balili mu njifu dzikadanigwa kukuwa guwo.

¹⁷Kowobe ne guwo mu minda yose ye mizhambi ngoti ndowomuloba shamu.” Koleba Yahwe.

¹⁸Yee mme wee! Mapalala imwi munoshuba zhuba la Yahwe! Molishubilani zhuba la Yahwe kene? Zhuba ilelo lowobe zhalima, alitowobe tjedza.

¹⁹Kowonga nthu unotizha shumba, ebe eshangana ne nyati, kene se nthu wangina mu ng'umba ebe enayila guma nge luboko nyoka ibe in'luma.

²⁰Apa zhuba la Yahwe alitowobe zhalima lisina tjedza, lakati zwititi lisina njemu kene?

²¹Ndobenga mizano yenyu ye kunamata, ndoyilingila pasi, andingamilane ne mishangano yenyu.

²²Kene mungandipa zwibhayilo zwinopisiwa, nenge zwe mathunde, andingazwiamutjile. Kene mungazhisa zwibhayilo zwe phuka dzenyu dzakakodziwa, zwe mbakiso andingazwiyele njele.

²³Nyaladzani zhoba ye njimbo dzenyu pandili, andingahwilile milidzo ye zwilidzo zwenyu.

²⁴Koga lebeswa ngaliwunge se vula, ndulamo iwunge se gwizi gusingapinde.

²⁵Apa makandipa zwibhayilo ne zwipo mu makole ali makumi manna, muli mu tjilambanyika kene, imwi Baiziraela?

²⁶Makasenga Sakuti mambo wenyu na Kaiwani ndzimwana wenyu we nyenyedzi, zwifano zwamakazwithamigwa.

²⁷Ndizo ndowothama kuti mutapigwe ndiyeno kwe Damasiko. Koleba Yahwe we zina linoyi Ndzimu Masimbawose.